Camarilla de la cai Vere
La camarilla de la cai Vere (Vere Street Coterie) foi un grupu d'homes deteníos nuna casa de mariques» (molly house) na cai Vere de Londres en 1810 por sodomía ya intentu de sodomía. Ocho homes fueron finalmente condergaos. Dos d'ellos fueron axusticiaos na forca (acordies cola Llei de sodomía de 1533, promulgada por Enrique VIII, qu'inda taba vixente) y seis fueron condergaos a la picota. Xunto col xuiciu y condena d'Oscar Wilde por un crime similar, esti episodiu ye unu de los mayores acontecimientos na historia de la homosexualidá na Inglaterra del sieglu XIX.
Historia[editar | editar la fonte]
El White Swan («Cisne blancu») na cai Vere de Londres foi fundáu como un club gai (llamaos «molly house» na dómina) a principios de 1810 por dos homes, James Cook (ensin rellación con el navegante) y Yardley (el nome completu ye desconocíu), que se dieron cuenta de que la falta de chamizos gais na ciudá ufiertaba una oportunidá de negociu; ello ye que Yardley afirmó ser heterosexual y tar casáu, que taba nello namái pol dineru.
El club tuviera funcionando menos de seis meses cuando, el 8 de xunetu de 1810, la policía de la cai Bow realizó una redada. Ventisiete homes fueron arrestaos, pero, finalmente, la mayoría fueron puestos en llibertá (quiciabes como resultáu de sobornos) y namái ocho fueron xulgaos y condergaos.
Seis de los homes, culpables d'intentu de sodomía, fueron condergaos, asitiaos na picota nel Haymarket el 27 de setiembre d'esi añu. Los ensames que s'axuntaren a contemplar la escena yeren violentes ya incontrolaes, llanzando diversos oxetos (incluyendo pexe podre, gatos muertos, «bales de cañón feches de folla y, poques gracies, vexetales) contra los homes. Según les noticies de la dómina, les muyeres na multidud fueron especialmente despiadaes. La ciudá entamó una fuercia de vixilancia de 200 condestables armaos, la metá montaos a caballu y la metá a cuerpu, pa protexer a los condergaos de maltratos inclusive mayores.
Un home y un mozu, John Hepburn (46) y Thomas White (16 años, un tamboriteru),[1] fueron condergaos por sodomía, a pesar de nun tar presentes nel White Swan mientres la redada. Dambos fueron colgaos na prisión de Newgate el 7 de marzu de 1811.
La camarilla de la cai Vere tamién ye conocida polos supuestos matrimonios homosexuales realizaos ellí pol reverendu John Church.
La hestoria del White Swan y la camarilla de la cai Vere fueron cuntaes pol abogáu Robert Holloway, que publicó un llibru sobre l'asuntu col títulu The Phoenix of Sodom («El fénix de Sodoma») en 1813.
Ver tamién[editar | editar la fonte]
Referencies[editar | editar la fonte]
- ↑ «Newgate executions 1800 - 1836» (inglés). capitalpunishment.org. Consultáu'l 1 de mayu de 2010.
- Norton, Rictor (1992). Mother Clap's Molly House: Gai Subculture in England, 1700-1830, 1, Gai Men's Press, páx. 302. ISBN 978-0854491889.
| Control d'autoridaes |
|
|---|
Datos: Q7921192