Camaféu

De Wikipedia
Saltar a navegación Saltar a la gueta
Camaféu de Ptolomeo II.

Llámase camaféu a tou relieve llográu en piedra preciosa, xeneralmente, de variáu color y con delicaes figures. Pa los camafeos, les piedres utilizaes yeren les ágates y más entá les variedaes sardónica y ónice, aprovechando la distinción de colores qu'ufierten les agües o capes de tales piedres de suerte qu'apolazando y rebaxando convenientemente la primer capa dexábase la segunda pa fondu y quedaba la primera colos relieves de la figura.[1] Pero tantu agora como nos sieglos pasaos asonsáñense y falsifican estes piedres con vidrios y esmaltes, soldando un relieve de piedra o vidriu con otra piedra de color distintu.

Denominase entalle si la piedra ta grabada en buecu. L'arte de producir camafeos y otros oxetos como entalles llámase glíptica (del griegu glypho, grabar) y ye una forma especial del arte de la Escultura. Les producciones de la glíptica sirvieron dende los tiempos más remotos de la Historia pa realizar sellos, artículos de ornamentación, oxetos piadosos o propios de la superstición.

Historia[editar | editar la fonte]

Camaféu de 1925 ellaboráu en Torre del Greco y espuestu nel Muséu del Corallo.

Antaño yeren bien apreciaos y prueba d'ello son los munchos exemplares llabraos en piedres precioses y dures que se caltienen de la cultura grecorromana y persa.

Mientres los sieglos XIV y XV trabayóse'l nácare en Francia, Alemaña y Flandes, periodu en que los oxetos ellaboraos con dichu material cuntaben con gran prestíu nes cortes franceses. Los viaxes de descubrimientos realizaos mientres esta dómina favorecieron la entrada de materies primes exótiques n'Europa como caniles de narval, ámbare, xade, cascos xigantes de tortúa y estrañes conches marines. Estos artículos amenaron l'interés pola hestoria natural y aguiyaron la imaxinación de xoyeros, artesanos y grabadores.

Nel sieglu XVI afayóse que les conches de los cipreidos y los cásidos yeren particularmente afeches pa la talla de camafeos. Nel sieglu XVIII, mientres el periodu neoclásicu, alicóse l'interés poles artes antigües que condució al florecimientu de talla de conches, pese al faigo de menos que teníen por considerase imitación al tar ellaboraes con un material inferior. A partir d'entós, fueron sumiendo los centros artesanales hasta quedar namái en dos  ciudaes: Idar-Oberstein (especializada na talla mecánica d'ágates) n'Alemaña y en Torre del Greco n'Italia onde se tallen artesanalmente.

Ver tamién[editar | editar la fonte]

  • Vasía de Portland

Referencies[editar | editar la fonte]

  1. Bustamante, Miguel (1844). «Los camafeos o piedras finas grabadas en relieve», en Ignacio Cumplido: El museo mexicano o miscelánea de amenidades curiosas e instructivas 1, 455-456. Consultáu'l 3 de marzu de 2013.