Bangor (Gales)

De Wikipedia
Saltar a navegación Saltar a la gueta


Wikiproyeutu: Nuvola Asturian flag.svg Asturies - Cymru Nuvola welsh flag simplified.svg
Bangor (Gales)
Bangor from Bangor-mountain.jpg
Alministración
Monarquía na MancomunidáBandera del Reinu Xuníu Reinu Xuníu
Nación constitutivaBandera de Gales Gales
Área principalGwynedd
Tipu entidá ciudá
Códigu postal LL57
Xeografía
Coordenaes 53°13′N 4°07′W / 53.22°N 4.12°W / 53.22; -4.12Coordenaes: 53°13′N 4°07′W / 53.22°N 4.12°W / 53.22; -4.12
Bangor (Gales) is located in Reinu Xuníu
Bangor (Gales)
Bangor (Gales)
Bangor (Gales) (Reinu Xuníu)
Demografía
Más información
Prefixu telefónicu 01248
Estaya horaria UTC±00:00
Llocalidaes hermanaes Soest
Cambiar los datos en Wikidata

Bangor ye una ciudá del norte de Gales, perteneciente al condáu de Gwynedd.

Oríxenes[editar | editar la fonte]

Catedral de Bangor.

Los oríxenes de la ciudá vencéyense a la construcción d'un cenobiu pol santu celta Deiniol a mediaos del sieglu VI. La palabra Bangor remanez d'una palabra galesa que designaba un tipu de corralada, como'l qu'había orixinalmente nel llugar del cenobiu. Nel mesmu llugar atópase la catedral actual, anque l'edificiu de la see ye más modernu, y sufrió munchos cambeos a lo llargo de los sieglos. L'obispáu de Bangor ye ún de los más antiguos de Gran Bretaña. La población cunta tamién cola High Street (Cai Mayor) más llarga de Gales. Ysgol Friars, la Escuela de los Flaires, foi fundada en 1557.

Dempués d'una llarga esistencia sele, la población vivió una importante crecedera cuando en 1718 faise pasar la ruta postal Londres-Dublín por Bangor y Porthaethwy. La empresa de Richard Pennant, qu'abrió la cantera de Penrhyn, a la vecina Bethesda, y xunió con Bangor con una llinia ferrial pa poder embarcar la cayuela qu'estrayía, acabó de dar l'impulsu que la ciudá precisaba. A mediaos del sieglu XIX, Bangor yera la ciudá más importante del norte de Gales.

La ciudá[editar | editar la fonte]

Ye see episcopal y ciudá universitaria. Tien una población de 13.725 persones (según el censu del 2001).

El cai Y Garth.

Bangor llinda al sur col Monte Bangor (Bangor Mountain, magar la zona residencial de Maesgeirchen, construyida orixinalmente pol conceyu como barriu de proteición oficial (council housing), queda al este de tala llomba, cerca de Porth Penrhyn. La Bangor Mountain tapa'l sol a zones de la High Street, Glan Adda y Hirael, de forma que de payares a marzu dalgunos tramos de la High Street queden dafechu na solombra. Pol términu municipal pasen dos ríos: el Adda, enriáu, que trescurre soterrañu hasta resurdir al oeste de Y Faenol, y el ríu Cegin, que desagua en Porth Penrhyn, na llende este de la ciudá. Porth Penrhyn foi un puertu importante mientres el sieglu XIX, como puerta d'esportación de la cayuela estrayida de la cantera de Penrhyn, considerada la más grande del mundu d'esti mineral.

Bangor tien un muelle de 472 metros de llargu, que ye'l segundu más llargu del país y el novenu de les Islles Britániques. El so nome ye Y Garth (Garth Pier n'inglés), y tuvo a piques de ser baltáu en 1974 pola so mala traza; una campaña pol so caltenimientu consiguió que fuera rexistráu como monumentu protexíu. Les xeres de restauración entamaron en 1982 y enllargáronse hasta 1988. La estación de Bangor pertenez a la Llinia Costera del Norte de Gales, que va de Crewe a Caergybi. Bangor ye l'estremu oeste del North Wales Path, un senderu costeru de 60 milles (unos cien kilómetros) qu'acaba en Prestatyn.

Asítiase frente a la islla d'Anglesey (Ynis Môn en galés), de la que la dixebra l'estrechu de Menai (en galés, l'Afon Menai, el ríu Menai). Dos pontes, la Ponte Britannia y la Ponte Grog y Borth traviénsela.

Cultura y deportes[editar | editar la fonte]

Universidá.

Bangor ye ciudá universitaria dende 1884. Nes facultaes de la Prifysgol Cymru (Universidá de Gales) estudien unos ocho mil alumnos. Bangor ta asitiada nuna área predominantemente galohablante: un 46,7% de la población declara que fala galés (y esto a pesar de que la mayoría de los estudiantes de la universidá vienen de fuera de Gales).

La población acoyó los Eisteddfod Nacionales de Gales de los años 1890, 1902, 1915, 1931, 1940 (anque namá nes ondes de radiu), 1943, 1971 y 2005, amás d'unu estraoficial en 1874.

El emisores de radio llocales son la Champion FM 103, n'inglés y galés, y la Storm FM, qu'emite dende la universidá.

Bangor tien un equipu de fútbol, el Bangor City FC, que xuega na Welsh Premier League (primer división galesa). Ganó delles lligues y copes, y representó a Gales en delles competiciones europees.

Otres imaxes[editar | editar la fonte]

Enllaces esternos[editar | editar la fonte]