Aikikai

De Wikipedia
Saltar a: navegación, buscar
Aikikai
合気会
Tamién Fundación Aikikai, Aikikai Hombu
Fecha de fundación c.1940
País d'orixe Flag of Japan.svg Xapón
Fundador Morihei Ueshiba (14 d’avientu de 1883 – 26 d’abril de 1969)
Cabezaleru actual Moriteru Ueshiba (nacíu’l 2 d’abril de 1951)
Sede central Aikikai Hombu, Tokyo
Artes enseñaes Aikido
Escueles proxenitores Daito-ryu Aiki-jujutsu, Tenjin Shin'yo-ryu, Yagyu Shingan-ryu
Escueles derivaes Sociedá Ki, Shodokan Aikido, Yoseikan, Yoshinkan, Yoshokai
Prauticantes Steven Seagal, Christian Tissier, Yoshimitsu Yamada, Nobuyoshi Tamura, Isamu Takeshita, Seiichi Sugano
Deporte olímpicu Non
Sitiu Oficial http://www.aikikai.or.jp

Aikikai ye la escuela orixinal del Aikido. Diríxela dende Xapón la Fundación Aikikai, y el so cabezaleru ye’l Doshu (heriede familiar del fundador del Aikido). A nivel mundial ta representada pola Federación Internacional d’Aikido.

Fundación Aikikai[editar | editar la fonte]

La Fundación Aikikai (財団法人合気会, Zaidan Hōjin Aikikai) ye la organización orixinal del Aikido. Funciona como una sociedá anónima en Xapón dende 1940. Ta dirixida pol Doshu, el socesor actual del fundador del Aikido. El Kai (会) del nome significa simplemente xunta o club.

La Fundación Aikikai dirixe’l Hombu dojo, tamién llamáu Sede Central Mundial del Aikido. Dacuando llámenlu Aikikai Hombu pa estremalu de les sedes centrales d’organizaciones d’aikido más tardíes. Ta asitiáu en Tokyo. El términu "hombu" pue a veces usase llibremente a respeutive de los instructores de rangu cimeru del Hombu dojo, o de la mesma Fundación Aikikai.

La Fundación Aikikai tamién lleva un dojo satélite, l’históricu Iwama dojo n’Ibaraki (unos 100 Km al nordeste de Tokyo).[1]

La Fundación Aikikai unvia de cutiu instructores per tou Xapón. Tamién tien la xera de dar, pa tol mundu, certificaos de grau y títulos d’instructor llexitimaos pol Doshu.

Doshu[editar | editar la fonte]

Doshu Morihei Ueshiba, O’Sensei

Doshu (道主, Dōshu) tórnase lliteralmente a “Maestru de la Vía”. Ye’l títulu que representa al cabezaleru del Aikikai. (Anque’l mesmu términu podría usase como títulu n’otres disciplines, en xaponés el so significáu más común ye específicu de la Fundación Aikikai.)

El sistema de que l’heriede d’una escuela d’artes marciales sía’l primer fíu del cabezaleru (yá sía natural o adoptáu a estos efeutos) yera común nos koryu (escueles tradicionales), y denómase iemoto. Otres artes usen davezu’l títulu Soke pal cabezaleru.

  • El Fundador (開祖 Kaiso) Morihei Ueshiba (1883-1969) creó l’arte del Aikido. Poro, tamién yera’l primer Doshu, pero davezu ye más conocíu como O'sensei (Gran Maestru).
  • El segundu Doshu (二代道主) Kisshomaru Ueshiba (1921–1999) llevó’l lideralgu de la organización y asumió’l títulu de Doshu en 1969 acabante morrer so padre Morihei Ueshiba. Kisshomaru foi la primer persona n’Aikido en ser normalmente tratada de Doshu. Socediólu’l so fíu Moriteru.
  • El tercer Doshu (三代道主) Moriteru Ueshiba (nacíu en 1951) ye’l doshu actual. Ye nietu del fundador del Aikido y asumió’l títulu de Doshu en 1999.

Ye d’esperar qu’a Moriteru lu soceda como Doshu’ fíu, Mitsuteru Ueshiba (nacíu en 1980),[2] al que llamen de momentu "Waka (若) Sensei".


Hombu dojo[editar | editar la fonte]

Aikikai Hombu Dojo

Coordenaes: 35°41′56.9″N 139°42′51.5″E / 35.699139, 139.714306


L’Hombu dojo de Tokyo ye la sede central del Aikikai. Oficialmente denómase Sede Central Mundial del Aikido y alminístrala ensembre la Fundación Aikikai. A veces llámenlu Aikikai Hombu pa estremalu de les sedes centrales d’organizaciones posteriores d’aikido. Hombu (本部 honbu) ya una pallabra común que significa "sede central".

L'Hombu dojo cuenta con unos 30 instructores, la mayoría de rangu “Shihan”. Ente ellos tán el Doshu y Hiroshi Tada, 9u dan.

La direición del Hombu dojo ye Wakamatsu-cho, Shinjuku, Tokyo, Xapón (endenantes distritu Ushigome de Shinjuku.)

El dojo abriólu’l fundador del Aikido n’abril de 1931. De primeres llamábase Kobukan Dojo (“dojo de la casa del guerreru imperial”), pero llamóse "Hombu Dojo" dempués de la Segunda Guerra Mundial.[3]

En 1967 la estructura orixinal en madera d’un pisu sustituyóse por un edificiu modernu de cinco pisos con 250 esteres de tatami d’entrenamientu en total. La principal área d’entrenamientu ye de 100 tatami (170 m2). Hai otres dos árees d’entrenamientu, usaes davezu pa clases de principiantes, clases pa neños, pa muyeres, o pa seminarios (gakko) suxetos a inscripción per tiempu llendáu.

Hai clases los siete díes de la selmana. Les clases normales y pa principiantes tán abiertes a tolos prauticantes d’Aikido que sían miembros del Aikikai.

Tamién hai un piñu d’estudiantes que viven nel dojo como parte del programa d’”uchi-deshi” (alumnos internos.)

Escuela Aikikai d’Aikido[editar | editar la fonte]

Dientro de Xapón hai aproximao otres 1.800 sales d’entrenamientu afiliaes al Hombu. Tán auníes na Federación d’Aikido de Tou Xapón.

Fuera d’allí hai unes 100 organizaciones foranes d’aikido reconocíes pol Hombu, que son en principiu organizaciones nacionales d’aikido que representen caúna munchos dojos y estudiantes. Los graos de los estudiantes nestes organizaciones tán llexitimaos a costa fecha pol Hombu (que tien procedimientos pa los exámenes y recomendaciones de graos d’aikido y títulos d’instructor, lo qu’en principiu asegura daqué xuntura internacional y val pa prevenir qu’instructores locales farfantones esaxeren los sos rangos.) Sicasí, reconocimientos aparte, tolos grupos estranxeros d’aikido son orgánicamente independientes de la Fundación Aikikai.

A los estudiantes de los dojos reconocíos del mundu enteru dan-yos en xunto, de manera informal, el nome coleutivu d’escuela Aikikai d’Aikido, masque esta “escuela” nun ye una organización oficial. La so téunica d’aikido pue denomase estilu aikikai, anque esto paez abarcar un espectru más ampliu d’estilos técnicos que les escueles d’aikido más tardíes y minoritaries.

Federación Internacional d’Aikido[editar | editar la fonte]

La Federación Internacional d’Aikido (IAF, poles sigles n’inglés) ye la principal organización mundial d’aikido. Ye una organización qu’acueye organizaciones miembru de más de 40 naciones (por casu la Federación d’Aikido de Tou Xapón ye miembru). Tolos miembros han tar reconocíos pol Hombu, asina que la IAF solamente representa la escuela Aikikai. La IAF ye nominalmente una organización democrática, pero resérvase un papel especial pal Doshu y pa la xunta d’instructores veteranos al envís de protexer la integridá "téunica y moral" del aikido. Actualmente la IAF almite solamente una organización miembru por país y da a cada miembru un votu igual (a semeyanza de les Naciones Xuníes, lo que nun supón necesariamente una representación igual pa cada estudiante d’Aikikai).[4]

La IAF fai la demostración del aikido nos Xuegos Mundiales (non olímpicos pero patrocinaos pol Comité Olímpicu Internacional), y representa al aikido nel mundu. La IAF tamién organiza’l Congresu Internacional d’Aikido cada cuatro años, facilitando l’entrenamientu conxuntu d’estudiantes d’aikido de distintos países, que comparten les enseñances de los maestros d’aikido más veteranos del mundu, y tamién ye una canal pa la comunicación oficial col Hombu.

La IAF formóse en 1976. El presidente de la IAF dende 1996 ye Peter Goldsbury, tamién profesor de mitoloxía comparada na Universidá d’Hiroshima. Goldsbury espubliza mui bien dellos artículos sobre aikido na AikiWeb. L’anterior presidente foi Giorgio Veneri.[5]

Estilu Aikikai d’Aikido[editar | editar la fonte]

L’Aikikai nun ye propiamente un estilu d’aikido sinón qu’abarca dellos estilos téunicos. Esti fechu esplícase polo variao de la primer xeneración d’instructores, que tenía caún la so propia interpretación del arte, arriendes d’otres influyencies. Inda asina, l’Aikikai descríbese davezu como un estilu al comparalu coles organizaciones d’aikido dixebraes. L’Aikikai suel describise como’l más tradicional; hai que tener en cuenta que permaneció lleal a la familia Ueshiba y, poro, llámenlu a veces Ueshiba Aikido. Caltién munchos aspectos que valoraba Morihei Ueshiba, como’l sistema d’entrenamientu non-competitivu (al aviesu del desendolcu de Kenji Tomiki). Sicasí nun se centra tanto n’interpretaciones espirituales en comparanza cola Sociedá Ki.

L’estilu propiu de Morihei Ueshiba evolucionó por demás a lo llargo de la so vida. Les téuniques d’aikibudo qu’enseñaba enantes de la guerra taben polo xeneral más cerca del aikijujutsu mientres que de la qu’avieyaba diba dando-y más importancia a la téunica fluyida, y esto nun dexa de reflexase na xente del aikido qu’estudió nes distintes époques. Nel Yoshinkan, fundáu por Gozo Shioda, ponse l’énfasis na forma correuta más que na fluyidez y el “timing” contribúi a la so imaxe como un estilu más "duru" que l’Aikikai. Seiseki Abe dixo:

"No que se refier al Aikido que [O'Sensei] prauticaba nos sos últimos años, hasta les rapacines, los vieyos y los neños podíen facelu. Esto constitúi una gran diferencia. Supongo que vos paez una diferencia no intenso o estricto del entrenamientu. Enantes de la guerra, había intensidá y téunica fuerte, al aviesu de les téuniques que fortalecen a los nuesos compañeros como pasa agora."[6]

Piénsase polo xeneral que les armes algamen más importancia nel estilu Iwama, pero esti estilu cuasi vien ser un sub-estilu del Aikikai. Kazuo Chiba dicía que l’estilu d’entrenamientu nel Hombu concentrábase menos nel rigor físicu per aciu de la demografía:

"Un bon númberu de miembros del Iwama Dojo yeren llabradores de la zona, trabayadores duros qu’echaben el día pa los eros. Teníen güesos fuertes y una gran fortaleza física, combinada con un peculiar calter local conocíu como “Mito kishitsu”, una castra de chapeta cercana a la valentía. Esta yera dafechu una cultura abondo distinta de la del Hombu Dojo en Tokyo. Al tar na capital del Xapón, los miembros del Hombu yeren oficinistes, intelectuales, empresarios, políticos y estudiantes universitarios."[7]

Referencies[editar | editar la fonte]

  1. Sitiu web del dojo d’Ibaraki
  2. Interview with Masaki Tani aikidojournal.com
  3. History of Aikido, Aikido FAQ
  4. Questions answered by IAF chair Prof. Peter Goldsbury, Aikido Journal
  5. Interview with Giorgio Veneri by Simone Chierchini. Sportales.com/martial-arts/giorgio-veneri-my-point-of-view-on-traditional-aikido/
  6. Interview with Seiseki Abe by Stanley Pranin (February 1982)
  7. T.K. Chiba, Memorial Address for Saito Sensei, Aikido Journal.