Aición Xacintu

De Wikipedia
Saltar a navegación Saltar a la gueta

La aición Xacintu (Akcja Hiacynt, en polacu) foi una operación masiva de los servicios secretos de la policía de la Polonia comunista, llevada a cabu ente los años 1985 y 1987, coles mires de crear una base de datos nacional de tolos homosexuales polacos y de la xente cola que taben en contautu,[1] cola resultancia de 11.000 persones fichaes.

Precedentes[editar | editar la fonte]

La llexislación polaca dexó de condergar la homosexualidá en 1932[2] polo que mientres la Segunda República Polaca los homosexuales nun fueron escorríos con tanta intensidá.[3] La situación camudó tres la Segunda Guerra Mundial al siguir el gobiernu de la República Popular de Polonia les tesis estalinistes sobre la homosexualidá, desenvueltes nos años 1930 que consideraben la homosexualidá como una anormalidá y una dexeneración capitalista. Los círculos homosexuales empezaron a ser xixilaos nos años 1960 pola Milicja Obywatelska o pola Słożba Bezpieczeństwa y los primeros archivos policiales empezaron a crease nos 70. Anque esti procesu atayóse de primeres de los 80 por causa de la llei marcial.

La operación[editar | editar la fonte]

Les razones oficiales qu'adució la propaganda del réxime pa empecipiar la operación fueron:[4]

  • Mieu al apocayá descubiertu virus del HIV, y los homosexuales yeren consideraos un grupu de riesgu.
  • Control de los grupos homosexuales de delincuentes.
  • Lluchar contra la prostitución.

Anque lo más probable ye que los funcionarios de la Słożba Bezpieczeństwa (SB) quixeren axuntar pruebes comprometedores que pudieren ser utilizaes más palantre pa chantajear a los individuos investigaos. D'esta forma estes persones taríen más dispuestos a collaborar colos servicios d'intelixencia. Tamién s'especuló con que fuera parte d'una operación más amplia de llucha contra la oposición anticomunista.

La operación Xacintu empezó'l 15 de payares de 1985 por orde del ministru d'interior Czesław Kiszczak.[2] Esa mesma mañana funcionarios de la SB arrestaron a numberoses persones, sospechoses de ser homosexuales o de tener conexones con ellos, n'universidaes, fábriques y oficines a lo llargo de toa Polonia.[5] A los que s'arrestó abrióse-yos un espediente especial llamáu Karta homoseksualisty (Carta d'homosexual) y a dalgunos obligóse-yos a roblar la siguiente afirmación:

Yo (nome y apellíu) soi homosexual dende la mio nacencia. Tuvi delles pareyes na mio vida, toos ellos adultos. Nun toi interesáu nos menores d'edá.

Amás de roblar el documentu a los arrestaos tomábense-yos les buelgues dixitales, dalgunos fueron coaccionaos pa describir les intimidaes de la so vida sexual y pa denunciar a los sos conocíos.

La operación duró hasta 1987, anque s'añedir archivos hasta 1988. Envalórase qu'unos 11.000 homosexuales fueron fichaos, y agora esos archivos son denominaos "Rozowe kartoteki" (archivos roses). Los miembros de los colectivos LGBT pidieron al Institutu nacional de la memoria (IPN) que destruya estos archivos pero'l IPN contestó qu'esto sería illegal.[4]

Consecuencies[editar | editar la fonte]

Por cuenta de l'aición Xacintu la comunidá gai polaca fíxose más clandestina[6] y despintaron la so orientación sexual inclusive más de lo que yá acostumaben. La persecución provocó que munchos homosexuales decidieren abandonar Polonia. La operación foi bien criticada nos medios de comunicación occidentales, y el gobiernu polacu negó les acusaciones. El voceru del gobiernu Jerzy Urban, preguntáu sobre l'asuntu n'avientu de 1988 por Kay Winthers del Baltimore Sun,[4] negó que tal operación realizárase.

El 8 d'avientu de 1988 el profesor Mikołaj Kozakiewicz faló de la operación col xeneral Kiszczak, qu'almitió que los servicios de seguridá polacos teníen "archivos roses", pero dixo que solo había documentación sobre individuos arreyaos n'actividaes delictives. Kozakiewicz más tarde afirmó que tenía pruebes de que los archivos tamién conteníen información sobre homosexuales que nun taben arreyaos en nengún delitu. Mientres la mesma xunta dambos tamién trataron la tema de la creación de la primer organización LGBT llegal en Polonia.

En setiembre de 2007 dos activistes LGBT Szymon Niemiec y Jacek Adler fixeron un pidimientu públicu por escritu al Institutu nacional de la memoria por qu'investigaren los delitos del réxime comunista contra los homosexuales y al xeneral Kiszczak.[7] El 15 de febreru de 2008 l'institutu afirmó sobre la tema que la operación foi llegal según la llexislación vixente nel momentu, y negáronse a abrir una investigación. Y alegaron que la operación Xacintu foi una aición de calter preventivu que'l so propósitu yera infiltrarse nos herméticos círculos homosexuales ya investigar les sos conexones cola delincuencia entamada.[7] Lo que foi duramente criticáu na comunidá LGBT.

Aición Xacintu na cultura popular polaca[editar | editar la fonte]

En 2015, el 30ᵘ aniversariu de los fechos, publicáronse dos llibros que falen de l'Aición Xacintu:

  • Archivos rosa (en polacu Różowe Kartoteki), de Mikolaj Milcke (ed. polaca Dobra Lliteratura), hestoria novelada d'un políticu derechiegu, que na so mocedá foi deteníu en virtú de l'aición Xacintu.
  • Codename Xacintu (pol. Kryptonim Hiacynt), de Andrzej Selerowicz, (ed. polaca Queermedia).

Ver tamién[editar | editar la fonte]

Enllaces esternos[editar | editar la fonte]

Referencies[editar | editar la fonte]

  1. Iwona Zielinska Who is afraid of sexual minorities? Homosexuals, moral panic and the exercise of social control. (20110209064846). Academia polaca de ciencies, Varsovia, y Centru d'investigación criminológica, Universidá de Sheffield
  2. 2,0 2,1 New from Poland:Gai March Banned (enllaz rotu disponible n'Internet Archive; ver l'historial y la última versión). (inglés)
  3. Emplegar les lleis d'indecencia pa escorrer a los homosexuales. Vease voz Polonia na enciclopedia glbtq (n'inglés)
  4. 4,0 4,1 4,2 Wokól akcji Hiacynt en Innastrona.pl (polacu)
  5. Wokól akcji Hiacynt (polacu)
  6. «Copia archivada». Archiváu dende l'orixinal, el 9 de febreru de 2011. Consultáu'l 14 d'avientu de 2013. (inglés)
  7. 7,0 7,1 IPN nie zajmie się sytuacją homoseksualistów w PRL (polacu)
Acción Xacintu