Tachi

De Uiquipedia
Saltar a: navegación, buscar
Tachi forxáu por Bishu Osafune Sukesada nel sieglu XVI. La saya, o vaina, va en llaca aogai-nashiji, con rebilicoques d’oru.
Tachi forxáu en 1997 por Matsuda Tsuguyasu copiando un modelu de finales de la era Heian (sieglu XI).

El tachi (太刀) ye una espada xaponesa. Delles fontes dicen que ye más curváu y dalgo más llargu que la katana. Pero Gilbertson, Oscar Ratti, y Adele Westbrook, pela so parte, afirmen qu’una espada recibe’l nome de tachi cuando cuelga del obi (cintu o faxa) col cortu p’abaxo, y que la mesma espada ye katana cuando lleva’l cortu p’arriba y va sometida pela faxa.[1] L’estilu d’espada "tachi" abandonóse col tiempu en favor de la katana.

Los daito (espaes llargues) anteriores a la katana teníen de media unos 78 cm. de llargor de cortu, más que la media de la katana, d’unos 70 cm. Contrariamente a la forma tradicional de llevar la katana, el tachi llevábase colgando del cintu col filu cortante p’abaxo, y usábase davezu na caballería. Los tachi que se diferencien del llargor mediu lleven delantre los prefixos ko-, pa los "curtios", y ō- pa los "grandes" o "llargos ". Por casu los tachi curtios, más cercanos al tamañu d’un wakizashi, llamábense kodachi. El tachi más llargu qu’esiste (consideráu un ōdachi), del sieglu XV, tien más de 3,7 metros de llargor total (2,2 m. de cortu), pero créyese que ye ceremonial. Nel añu 1600 munchos antiguos tachi foron acurtiaos pa convertilos en katanes. La mayoría de los fueyes de tachi que queden güei son o-suriage (que tienen la espiga orixinal cortada en dalgún puntu), polo que ye raro ver un tachi ubu (cola espiga orixinal ensin alteriar) orixinal firmáu.

Usu[editar | editar la fonte]

El tachi usóse principalmente a caballu, onde podíen desenvainalu amañosamente pa cutir a los soldaos d’infantería enemigos. Inda yera un arma efeutiva en tierra, pero más difícil d’usar. Por eso foi desarrollándose la uchigatana (antepasáu de la katana).

El tachi foi’l predecesor de la katana como arma blanca de guerra de los bushi (clas guerrera) del Xapón feudal, y al evolucionar a un diseñu más tardíu, entrambos estremábense de cutiu namái que por cómo los llevaben y pola manera d’axustar les fueyes.

Nes invasiones mongoles de Xapón demostróse qu’había dellos puntos débiles nel tachi qu’habíen llevar al desendolcu de la katana.[2]

Más tarde na hestoria del Xapón feudal, nos periodos Sengoku y Edo, dellos guerreros d’altu rangu pertenecientes a lo que yá yera la clas dominante, llevaben la so espada al estilu tachi (cortu p’abaxo), en vez de cola “saya” (vaina) ciñida col cintu col cortu p’arriba.[3]

Cola xuba del militarismu de la era Showa enantes y na Segunda Guerra Mundial, l’exércitu y l'armada imperial xaponeses llevaron tachis llamaos Shin guntō y Kai guntō.

Referencies[editar | editar la fonte]

  1. 各時代の特徴 ― 財団法人 日本美術刀剣保存協会 ―
  2. Tachi Japanese Sword
  3. Leon Kapp, Hiroko Kapp, Yoshindo Yoshihara. "The Craft of the Japanese Sword".Kodansha International. Japan, 1987. Pag. 168. isbn =978-0870117985

Enllaces esternos[editar | editar la fonte]