Soteriu

San Soteriu
Nome	Soterius (lla.), Soter (gr.)
Data de nacencia	103?
Llugar de nacencia	Fondi (Italia)
Aniciu del papáu	166
Fin del papáu	175
Predecesor	Anicetu
Socesor	Eleuteriu

San Soteriu nació en Fondi (Italia), haza'l 103 y foi elixíu papa en tiempos de les persecuciones que contra los cristianos ordenare l'emperador Marcu Aureliu y que provocaren la muerte del predecesor Anicetu. Soteriu, anque nacíu n'Italia, yera d'orixe griegu, lo qu'esplica'l so nome que deriva del griegu y significa salvador.

L'historiador Eusebiu de Cesarea na so Historia de la Ilesia recoyó delles frases de Dionisiu, obispu de Corintu, en rempuesta a una carta unviada anteriormente por Soteriu pa esa ilesia na que Dionisiu agradez al obispu de Roma pola so valirosa eshortación pela qu'invita a los fieles a una firme profesión de la fe en xunión col so obispu y presbíteru. San Dionisiu añede que la carta del Papa caldrá ser lleída na celebración llitúrxica xunto cola Primera Epístola de Clemente. Dalgunos estudiosos afirmen qu'anque aparentemente la carta de Soteriu a los corintios se perdió, ye posible que pudiere identificase cola nomada Segunda epístola de Clemente.

D'esti papa nun se tienen mayores noticies o referencies del so pontificáu. Anque se sabe que s'enfrentó a la herexía de Montanu y que cursó varios decretos, ente los qu'hai ún nel que prohibe a les monxes tocar los vasos y los corporales, y fornir l'inciensu en cualquier oficiu sagráu. Amás, confirmó que'l matrimoniu ye un sacramento ensin nengún valir si nun foi bendecíu por un sacerdote.

Esti papa, que pasó a la historia col alcuñu de "papa de la caridá", morrió'l 22 d'abril de 175 tres sufrir martiriu.

Predecesor: Anicetu

166-175

Socesor: Eleuteriu