Mega Drive

Mega Drive
Tipu	modelu de dispositivu electrónicu
Orixe del nome	Xénesis
Parte de	videoconsoles de cuarta xeneración
	← Master System y SG-1000 Mark III Sega 32X, Sega Mega-CD y Sega Saturn →

Sega Mega Drive ye una videoconsola de sobremesa producida por SEGA, llanzada al mercáu en 1988. Esta videoconsola ye la socesora direuta de la Sega Master System y la primera videoconsola de 16 bits de Sega. Compitió escontra la SNES de Nintendo, como parte de les videoconsoles de cuarta xeneración. N'Europa, incluyendo España, la consola llegó en 1990. En tolos países d'América sacante Brasil, la consola comercializóse sol nome de Sega Genesis y tuvo un mercáu ampliu. La primer versión de la Mega Drive asoleyóse en Xapón n'ochobre de 1988. Descontinuóse en 1998, anque hai dellos fabricantes con llicencies que siguen cola so fabricación, incluyendo a Majesco y Tect Toy sol nome de Genesis 3 y munchos otros clones ensin llicencia. La consola cuntó con un xuegu (Virtua Racing) que yera tridimensional dafechu, gracies al chip SPV (Sega Virtua Processor) mui paecíu al chip FX de Super Nintendo, pero a diferencia d'esta, Sega namái lu usó nesti videoxuegu.

Antecendentes

Desendolcu

Inda la Sega Master System foi un ésitu de ventes n'América del Sur y Europa, nun llogró espertar l'interés de los mercaos de Xapón y Estaos Xuníos, que metanes de los 80 taben apoderaos por Nintendo col 92% y 95% del mercáu, respeutivamente. P'algamar una drástica medría de ventes, Sega desendolca una máquina nueva que superaria téunicamente al meyor hardware del mercáu d'entós: los ordenadores de 16 bits Commodore Amiga y Atari ST.

Darréu que los xuegos arcade System 16 de Sega son nesi momentu bien populares, el direutor executivu de SEGA, Hayao Nakayama, decide que la nueva consola sía tamién de 16 bits. El procesu de diseñu final acaba apurriendo 3 plaques arcade nueves: Mega-Tech, Mega Play, y System C. Los xuegos recreativos desendolcaos pa eses plaques puen portase de mou cenciellu y rápidu a la consola nueva.

Llanzamientu

La Sega Mega Drive llanzóse en Xapón en 1988. En 1989 SEGA nun algama acutar los derechos llegales del nome n'Estaos Xuníos. Poro, conozse a la consola como Sega Genesis nel restu d'América, quitante en Brasil (país onde tamién se llanzó la Master System a finales de los 80's).

La consola llanzóse n'Europa y el restu del mundiu en 1990 sol nome orixinal.

Gracies a llanzamientos clave como Sonic the Hedgehog y a un catálogu de xuegos deportivos ampliu, la consola foi perbién recibida pol públicu d'Estaos Xuníos, onde lideró'l mercáu ente 1991 y 1994, compitiendo direutamente cola TurboGrafx 16 de NEC Corporation, y sobremanera cola SNES.

Notes

Referencies

Enllaces esternos