Llandra

De Uiquipedia
Saltar a: navegación, buscar
Bacteria Bordetella pertussis vista al microscopiu. Tinción de Gram.

La Llandra, o Llande, o tos ferina, (tamién conocida como tos convulsiva) ye una enfermedá infeutocontaxosa aguda, causada por cocubacilos de la especie Bordetella pertussis. Carauterízase pola inflamación traqueobronquial y accesos típicos de tos violenta, espasmódica con sensación d'afogu, que terminen con un ruíu estridente (tos convulsiva o convulsa).

La infección contáxase aína demientres la primera etapa, enantes qu'entame la tos intenso. La so complicación pue afeutar al sistema nerviosu y el miocardiu. Magar qu'esta malura pue sofrise a cualesquier edá, los más afeutaos son los neños de menos de cinco años. Espárdese demientres la primavera y el branu. Nos paises desarrollaos la so presencia ye baxa gracies a la vacunación.


Síntomes[editar | editar la fonte]

El tiempu que trescurre dende la esposición hasta'l desendolque de los síntomes (períodu d'incubación) estímase ente tres y quince díes. Na etapa d'aniciu (etapa catarral) parez una filapriega o resfriáu común. Preséntase con espirríos, enroxecimientu de los güeyos y calentura xeneral sonce. Apaez una tos breve, seco ya enritante que persiste. La primera estaya, dura polo xeneral dos selmanes, enantes qu'espoxiguen los síntomes secundarios de tos más grave.

L'apaición de la tos carauterística, señala l'entamu de la segunda etapa. Les crisis asocédense a intervalos regulares, repitiéndose a vegaes de sópitu, y otres con intervalos de delles hores. Polo xeneral, produzse un arrebexu darréu de la crisis.