Little Rock
Little Rock ye la capital del estáu d'Arkansas, nos Estaos Xuníos, y tamién la del condáu de Pulaski. Ye, colos sos 184.422 habitantes (U.S. Census Bureau, 2005), la ciudá más poblada del estáu, y forma parte d'un área metropolitana (nomada Little Rock-North Little Rock-Conway) na que vivíen, en 2007, 666.401 persones. Allugada casi nel centru xeográficu del estáu, recibe'l so nome d'una peña que hai nel ríu Arkansas. L'esplorador francés Jean-Baptiste Bénard de la Harpe dio-y el nome de Le Petite Roche a esa piedra que, dende cuantayá, valía-yos de referencia a los navegantes que remontaben el ríu Arkansas, y fizo un puesto comercial a la vera d'ella. Años dempués, en 1821, lo qu'entá nun yera una ciudá (seríalo dende 1831 namái) convirtióse na capital del territoriu d'Arkansas, formáu dos años primero.
La so actividá económica ye mui variada. Acueye la mayoría de les oficines de l'alministración estatal, y tamién un importante centru de formación de personal sanitariu, la University of Arkansas for Medical Sciences. Tien un importante puertu fluvial, y una cadarma empresarial mui importante: Blue Cross and Blue Shield, Entergy, Raytheon, Metropolitan National Bank, Siemens, AT&T Mobility, Kroger... tienen fábriques o la so sé central na ciudá.
[editar] Enllace esternu
Páxina web oficial de la ciudá
Esti artículu ye un entamu, enantándolu, aidarás a meyorar la Uiquipedia
