Jaroslav Hašek

De Uiquipedia
Saltar a: navegación, buscar

Jaroslav Hašek (1883 - 1923) foi un novelista, humorista y periodista checu, famosu pola so novela satírica Les aventures del soldáu Švejk na Gran Guerra. Ta Consideráu el principal autor de la Praga del entamu del sieglu XX, anque a diferencia d'ésti últimu qu'escribía n'alemán, mandábase de la llingua checa pa llegar a un públicu más popular.

Jaroslav Hašek nació en Praga'l 30 d'abril de 1883. A los 13 años perdió a so padre, depresivu y alcoholicu.

A los quince años empieza a trabayar como asistente nuna botica. Más tarde, con un diploma de l'Academia comercial de Praga, entra na Slava Bank, pero échenlu al pocu tiempu por mor de la so afición a la bebida.

Bien ceo, Hašek militó activamente nel movimientu anarquista, collaborando na prensa política de llingua checa y llegando a ser director del periódicu Komuna. En Praga llevó una vida picaresca, con actividaes como'l robu y tráficu de perros, falsificando certificaos de pedigrí.

En 1910 casó cola escritora Jarmila Mayerová, qu'acabó abandonándolu al poco de nacer el so fíu Richard. Per esta época, tres d'un intentu de suicidiu, pasó una temporada nun hospital psiquiátricu.

Na Primera Guerra Mundial sirvió nel exércitu austriacu nel frente de Galitzia y en Bohemia, antes de pasar a Hungría. En 1915, la so unidá rindióse a los rusos que lu internaron nun campu de concentración n'Ucrania, y más tarde nos Urales.

A la fin de la guerra, en 1918 entró como voluntariu al serviciu de los bolxeviques, que lu nomaron comisariu políticu del Quintu Exércitu. Paralelamente militó na Lexón Checa, una organización nacionalista que trataba de lliberar a los checos de la tutela del Imperiu austro-húngaru.

En 1920 volvió a Praga con una muyer rusa cola que casara ensin divorciar de Jarmila. Nesta ciudá, capital de la nueva Checoslovaquia, entamó la redaición de la novela satírica Les aventures del bravu soldáu Švejk na Gran Guerra (Osudy dobrého vojáka Švejka za světové války). La obra debía constar de seis volumes, pero al morrer el 3 de xineru de 1923 sólo tenía peracabaos tres.

Estos tres tomos, con un cuartu que terminó d'escribir el so amigu periodista Karel Vanek, publicáronse de manera póstuma.

En 1991 publicáronse otros escritos inéditos suyos, agrupaos col títulu de L'escándalu de Bachura y otros rellatos.

En 2005, l'escultor Karel Nepraš fizo un monumentu ecuestre dedicáu a l'acordanza de Jaroslav Hašek nel barriu praguense de Žižkov, onde'l creador del soldáu Švejk viviera.