Isótopu estable

De Uiquipedia
Saltar a: navegación, buscar

Un isótopu estable d'un elementu químicu ye aquel que nun se desintegra pa dar llugar a otros nucleidos, como faen los non estables o radiactivos (estos últimos emiten partícules o radiación electromagnética al desintegrase). Un elementu químicu tien ún o varios isótopos, de los que toos, dalgunos o nengún, puen ser isótopos estables. Por exemplu, el tecneciu nun tien isótopu estable dalu, mentes que l'estañu tien diez.

Conócense unos 2.500 nucleidos, de los que son estables menos de 300. La representación del númberu de neutrones (N) frente al númberu de protones (Z o númberu atómicu) indicándose los isótopos estables denómase carta de Segrè (diseñada pol físicu Emilio Segrè).

La rexón d'estabilidá definida por esta gráfica ye estrencha, cumpliéndose que pa númberos másicos (A) pequeños el númberu de protones y de neutrones ye asemeyáu, mentes que según aumenta A, la rellación N/Z tamién aumenta (hasta un valor d'aprosimadamente 1,6).

Los nucleidos que tán a la drecha d'esta franja d'estabilidá son nucleidos con demasiaos protones pa los neutrones que tien, y los núcleos ruempen por repulsión. Los nucleidos que tán a la esquierda son nucleidos con demasiaos neutrones pa los protones que tien, y produzse un procesu de decaimientu convirtiendo neutrones en protones.

Vióse que pa Z=43, Z=61 o Z>83 nun hai nucleidu estable dalu.

La fuercia nuclear fuerte ye la encargada de caltener xuníu'l nucleu atómicu, magar que la fuercia electromagnética faiga que los elementos col mesmu signu de carga llétrica (los protones, que tienen toos una carga positiva) se repelan. Sicasí, la fuercia nuclear tien un radiu d'acción bien pequeñu, lo que desplica que nun s'atopen núcleos estables pa Z>83 porque, al aumentar el númberu de protones, aumenta'l tamañu del nucleu, polo que la fuercia nuclear fuerte vese sobrepasada pola fuercia electromagnética, que llogra llegar a espulsar dalgún protón.