Concord, New Hampshire

De Uiquipedia
Saltar a: navegación, buscar
Llocalización de Concord dientro del condáu de Merrimack, y d'esti dientro l'estáu

Concord ye la capital del estáu de New Hampshire, nos Estaos Xuníos, y centru alministrativu del condáu de Merrimack. Sodividida nos barrios de Penacook, East Concord y West Concord, tien una población (2010, U.S. Census Bureau) de 42.695 habitantes.

El territoriu qu'anguaño ye Concord yera, primero de la colonización, el llar de la tribu nomada Pennacook. Dempués, el 17 de xineru de 1725 la provincia de la bahía de Massachussetts asignó-y a esti territoriu'l nome de Plantación de Pennacook, que foi desarrollada por dellos colonos de Haverhill (Massachussetts) dirixíos pol capitán Ebenezer Eastman entre 1725 y 1727. El 9 de febreru de 1734 algamó l'estatus urbanu col nome de Rumford. Tres d'una engarradiella rellacionada coles llendes de la ciudá cola vecina de Bow, el gobernador Benning Wentworth camudó'l nome de la ciudá pol actual de Concord, que tentaba de reflexar la nueva situación de concordia y harmonía ente les ciudaes vecines.

Vista de la cúpula del capitoliu estatal dende la plaza Eagle

Nel sieglu XIX Concord espoxigó enforma. En 1807 Samuel Blodget abrió un canal con compuertes pa permitir el pasu de barcos pola Amoskeag Falls (cascada de Amoskeag), ríu abaxu de la ciudá, lo que permitió la comunicación fluvial de Concord y Boston al traviés de la canal de Middlesex. Eso, y la posición central de la ciudá dientro l'estáu, ficieron d'ella la opción más racional cuando hebo qu'escoyer una capital estatal. El so capitoliu, construyíu en 1819, ye'l más antiguu del país nel qu'entá sigue axuntándose'l parllamentu estatal. Tamién nesi sieglu la ciudá convirtiose nún ñudu ferroviariu, pel que salíen los productos testiles que se fabricaben en Penacook aprovechando l'agua del ríu Contoocook pa xenerar enerxía.

Anguaño la so economía céntrase nel sector servicios. L'alministración estatal ye la mayor empleadora de la ciudá, y el segundu l'hospital de Concord.





Enllaces esternos[editar | editar la fonte]