Body Pump

De Uiquipedia
Saltar a: navegación, buscar

El Body Pump ye un tipu d’acondicionamientu físicu empobináu al fortalecimientu muscular completu, con música y coreografiáu, que forma parte del conceutu Body Training System creáu pola empresa Les Mills en 1991, responsable de clases d’acondicionamientu físicu en más de 10.500 clubes deportivos y ximnasios de tol mundu. El body pump ye la clas d’acondicionamientu físicu más asemeyada al “body building” o culturismu.

Dirixida por un monitor, una clas de body pump dura unos 55 minutos. Hai tamién un formatu de clas de 45 minutos que quita los exercicios dedicaos a los bíceps y tríceps.

Los prauticantes usen peses de diferente tamañu, bien soles o, más davezu, fixaes a una barra d’halterofilia; un “step” (escalón) d'aeróbic y un tapiz de ximnasia. La carga de pesu varia según los exercicios, según faigan intervenir un grupu muscular potente como’l de los muslos o, pela cueta, músculos pequeños como los de los brazos. Por supuesto depende tamién de les capacidaes musculares del prauticante.

L’oxetivu del body pump ye desendolcar l’endurecimientu muscular a traviés de munches repeticiones, por oposición al trabayu de fuercia pura u se busca agrandar la masa muscular. Esti oxetivu esplica en parte que les muyeres representen el 70% de los alumnos nes clases. El body pump fai trabayar tol cuerpu.

La clas de body pump tien llugar con música; cada canción fai trabayar un grupu muscular, siempre nel mesmu orde. Los movimientos tán coreografiaos y siguen el ritmu de la música. Les coreografíes duren un trimestre y son concebíes en Nueva Zelanda y esportaes de siguío al mundu enteru. Los monitores pueden mecer canciones antigües coles nueves, pero tienen que siguir les conseñes xenerales, sobre too a respeutive l’orde de los exercicios acordies a los grupos musculares solicitaos.

Una de les carauterístiques d’una clas de body pump ye l’ambiente musical que permite tresformar un trabayu muscular nuna sesión más prestosa. Les canciones duren ente cuatro y seis minutos y básense davezu en cachos de rock modernu o de pop-rock remezclaes pa la ocasión al envís de cuadrar meyor col ritmu y velocidá de los exercicios y al corte en bloque de 32 pasos.

Programa[editar | editar la fonte]

La clas de body pump, d’unos 55 minutos, compónse de 10 canciones, de les qu’ocho faen trabayar un grupu muscular diferente, a les que s’amiesten una canción previa de calentamientu y una canción final d’estiramientu.

Exercicios
  1. Calentamientu: cola carga más llixera, exercicios de calentamientu de tolos grupos musculares.
  2. Piernes y flexones: entrenamientu de les piernes enclicándose de diferentes maneres, tamién con un efeutu cardiovascular por aciu d’una gran carga.
  3. Pectorales: trabayu con movimientos del tipu “press de banca” col envís de muscular sobre too los pectorales y, secundariamente, los costazos y los tríceps.
  4. Llombu: exercicios a base de tirar y de llevantar ensin emplegar los costazos. Los músculos del llombu son solicitaos en primer llugar. Esta canción tien tamién un efeutu cardiovascular importante.
  5. Tríceps: trabayu de los tríceps, yá sía en posición tumbada con movimientos d’estensiones y de desarrollos, yá sía faciendo planches, elevaciones y estensiones traseres con un pesu aisláu.
  6. Bíceps: exercicios de llevantamientos y de flexones col envís de desarrollar los bíceps.
  7. Abertures: trabayu de los músculos de les piernes, sobre too cuádriceps y glúteos, a base de movimientos de fondos y a veces d’abertures.
  8. Costazos: pa reforzar los costazos, sobre too los deltoides, los exercicios consisten en llevantamientos llaterales de discos, en tiraes, en planches y en desarrollos penriba la tiesta.
  9. Abdominales: fortalecimientu de los abdominales a base de cambeos, de llevantamientos de piernes y de los tradicionales abdominales, opcionalmente utilizando pesos sobre’l pechu o calteníos na mano.
  10. Vuelta a la calma: exercicios d’estiramientu pa finar la sesión.

Ente canción y canción los prauticantes faen un rápidu estiramientu de los principales músculos trabayaos.

Efeutos sobre l’organismu[editar | editar la fonte]

Como ye posible variar la dificultá según los pesos emplegaos, el body pump ye vidable pa los non deportistes o pa persones que tienen sobrepesu. La clase desaconséyase pa les persones que carecen de tendinitis.

El body pump permite al prauticante remocicar la figura y afinar la masa muscular. Permite desaniciar una parte de la masa muscular graso por aciu de mui bien de repeticiones nun periodu de cuatro a seis minutos por grupu muscular. El consumu calóricu ye importante.

Según Les Mills, una clas de body pump consume hasta 600 kcal y tien distintos beneficios como l’ameyoramientu de la condición física xeneral y de la fuercia. Esculpe los músculos y aporta una sensación de llogru.

Facilidá de los exercicios y prauticantes[editar | editar la fonte]

Magar que los movimientos son fáciles y d’asimilación cenciella, ye fundamental facelos bien y garrar el pesu acionáu en visu a nun mancase. Los programadores encamienten un reposu d’un día ente dos sesiones.

Les muyeres son mayoría nes clases, lo qu’amuesa que’l body pump ye un tipu d’acondicionamientu físicu dafechu anque pueda plasmar la utilización d’una barra d’halterofilia.

Enllaces esternos[editar | editar la fonte]