Bóveda

De Uiquipedia
Saltar a: navegación, buscar
Wikipedia:Llista d'artículos que toa Wikipedia tien que tener
Conxuntu de bóvedes gótiques na Ilesia de Saint-Séverin, París.

Una bóveda ye una obra de mampostería o fábrica de forma curva, que sirve pa cubrir l'espaciu entendíu ente dos murios o una serie de pilastres alliniaes.

Ye una estructura bien apoderada pa cubrir espacios arquitectónicos amplios con pieces pequeñes. La so xeometría puede ser de simple o doble combadura. N'edificaciones modernes el términu aplícase a estructures de cubiertes curvaes, nes que la espesura ye bien pequeña comparada col anchu y el llargor.

Tantu nes antigües bóvedes como nes modernes la solicitación predominante nos sos elementos ye de compresión. Les sos tensiones aseméyense a les d'un arcu, o un conxuntu d'arcos conformando una superficie.

Los materiales emplegaos na so construcción pueden ser de piedra, llamaos doveles, lladriyu, aceru, formigón armáu, etcétera. Les doveles pueden dir apareyaes ensin trabazón, anque lo habitual ye que se xunan con un material aglomerante o morteru.

Na Hestoria de l'Arquitectura les bóvedes, de lladriyu o piedra, tuvieron un papel destacáu na edificación que perdieron cola xeneralización de les técniques y materiales de construcción modernos: primero l'aceru y dempués el formigón armáu fixeron posible edificaciones de grandes lluces, antes namá abovedaes.

Sicasí, les bóvedes de formigón armáu son utilizaes abondosamente n'inxeniería civil pa construyir galeríes, túneles, cubiertes de grandes lluces y, polo xeneral, toes aquelles obres onde los elementos trabayando a flexón resulten desventayosos dende un puntu de vista técnicu y económicu.