Arcadia Planitia

De Uiquipedia
Saltar a: navegación, buscar
Arcadia Planitia
Arcadia Planitia - topography map.jpg
Mapa topográficu d'Arcadia Planitia.
Tipu d'accidente xeolóxicu Planitia
Rexón de Marte
Diámetru mediu 2.923,7 km[1]
Altitú  ?
Coordenaes 56,01° N 188,63° E[1]
Procedencia del nome nome d'un antiguu accidente xeolóxicu.[1]

Arcadia Planitia ye una suave llanura de Marte, compuesta por depósitos de laves fresques y colaes volcániques asentaes na Época Amazónica. Al oeste fai frontera con Utopia Planitia y al este coles tierres altes de Tharsis, al sur alcuentrense les llanures d'Elysium Planitia y Amazonis Planitia, al norte queden les grandes estensiones del restu de la Vastitas Borealis (rexón a la que pertenez esta llanura). Les sos coordenaes centrales son 56,01° N 188,63° E[1] y tien un diámetru mediu según el USGS de 2.923,7 km[1]. El so nome vien d'un antiguu accidente xeolóxicu qu'apaecía nun mapa de Giovanni Schiaparelli fechu nel añu 1882; Arcadia fai referencia a una antigua rexón de Grecia.

Esta ye una llanura con mui poca variación d'altitú, que ta ente 0 km y -3 km respeuto al datum marcianu.[2] Como munches otres llanures del hemisferiu norte de Marte, Arcadia amuesa unes marques carauterístiques casi poligonales, que mui posiblemente tean asociaes con suelos compuestos d'una mestura de xelos, llamarga y pequeñes roques; na Tierra puen atopase esti tipu de patrones y trazos nos suelos de permafrost del árticu.[3] Otres formes xeolóxiques qu'indiquen la presencia pasada de xelu y una posible presencia actual de los mesmos, son los cuetos totalmente redondiaos y erosionaos, y los pequeños fueyos y torques fotografiaos col sistema Themis de la Mars Odyssey.[4]

La sonda Mars Odyssey pudo fotografiar dellos cráteres con capes concéntriques de depósitos brillantes lo mesmo al interior de los cráteres como al esterior, asina como abondos regueros brillantes que partíen de les crestes del borde d'esos cráteres, crestes enforma erosionaes y degradaes, y tamién apaecíen erosionaos enforma los depósitos de material asociaos a los nacimientos d'estos cráteres; estes carauterístiques suxeren la presencia de xelos superficiales o soterraos que seríen los causantes d'esta intensa erosión.[5]

Referencies[editar | editar la fonte]

Ver tamién[editar | editar la fonte]

Otros artículos[editar | editar la fonte]

Enllaces esternos[editar | editar la fonte]