Algodón de zucre

De Uiquipedia
Saltar a: navegación, buscar
Dos neñes xintando un algodón de zucre.
Muyer preparando algodón de zucre nun quioscu d'una feria.

L'algodón de zucre ye una clas de zucre filáu que se prepara con una máquina especial y viéndese en feries y n'otros eventos festivos. El color más popular ye'l rosa, magar que tamién lu hai moráu o azul. L'algodón de zucre ye dulce y tien un tactu paecíu al del algodón cuando ta secu, tornando pegañosu cola humedá y derritiendo aína na boca. Nun tien munchu arume pesie a que la máquina cola que se fai sí lu suel tener. Tamién ye una llambionada popular nos espectáculos circenses.

L'algodón de zucre féxose popular en 1904 y sigue siéndolo anguaño. Les máquines modernes furrulen d'un xeitu mui paecíu a les orixinales. La parte central de les mesmes tien un pequenu concu nel que se vierte'l zucre y se-y axunta un colorante. Una fonte de calor averada al borde derrite'l zucre filtrándose per una bayura de pequenos furacos y solidifícase al contautu col aire, faciendo unos filos finos. La persona qu'emplega la máquina da-y vueltes a un palu nel gran recipiente metálicu al que lleguen los filos, recoyéndolos y faciendo una ñube d'algodón de zucre.

Como la mayor parte l'algodón de zucre ye aire, les raciones acostumen a ser grandes, polo xeneral mayores que la tiesta d'un adultu, resultando pergrandes pa los neños. Magar que pueden provocar caries al tar compuestos de zucre, nun son especialmente calóricos pues la cantidá real ye poca: una ración típica tien menos zucre qu'una llata de refrescu típica, polo xeneral una cuyaradina.