Xulio Arbesú

De Wikipedia
Saltar a navegación Saltar a la gueta
Xulio Arbesú
Vida
Nacimientu

Samartín del Rei Aurelio1957

(61/62 años)
Nacionalidá Bandera d'España España
Estudios
Llingües castellanu
Oficiu
Oficiu escritor
Cambiar los datos en Wikidata

Escritor de Samartín del Rei Aurelio.

Biografía[editar | editar la fonte]

Nacíu en San Martín del Rei Aurelio, plena cuenca minera asturiana, en 1957, Xulio Arbesú, tres pasar por delles rames de la lliteratura y de la música, y tres probar col cine, tien evolucionao nel ámbitu artísticu camín d’una especialización peculiar. Autodefínese como especialista en diversidá. La so pasión verdadera ye’l llenguaxe propiu de cada estaya del arte. Eso ye lo que mueve’l so instintu creativu pela novela (“Potestas”, “Misión Pelayo”, “Un raposu en Tresmonte”, “El pisu d’enriba”, “Eternu negociu” “El valor del rei”), l’ensayu (“El destín treshumanu”, “Los deseos del dineru”, “La informatización del transporte”, “Fui maquinista en la minería”), el cuentu (“Cuentos con neños”), el teatru (“Les siete novies del rei”), la composición musical ("Viento", "Lo que tu eres", “La mina que nun cierra”, “La lloca”, “Me acuerdo del agua”, “Alegremente”, “Yo que vengo”...), y tamién el cine, col llargumetraxe musical “Bailandia”, del que fue productor, guionista y director.

Obra[editar | editar la fonte]

Narrativa[editar | editar la fonte]

Novela Historica:[editar | editar la fonte]

  • Potestas - Premiu de novela Xosefa Xovellanos 2002. Gonzalo Pelaiz, la infanta Sancha, la reina Urraca, l’obispu Pelayo, Aldonza Pelaiz, Teresa la infanzona, Vela’l Santu, el rei Alfonso Raimúndiz, el conde Suero Vermúdiz, la reina Berenguela... personaxes que salten del pergamín vieyu a la vida nuna historia que-y concierne a Asturies. ¿Lleal o rebelde? ¿Astutu o inxenuu? ¿Perdedor o ganador? ¿Buenu o malu? Gonzalo Pelaiz, el Potestas, el conde d’Uviéu, preséntase equí con humanidá complexa y plenamente medieval, descubriéndose, pasu a pasu, hasta’l capítulu caberu. Aldeanos incendiarios, poderes inestables, obispos cobiciosos, condes arguyosos, amores ensin futuru, machismu non cuestionáu, pelegrinos sinceros, concilios trafullaos, ilesies romániques en construcción, castiellos asaltados, torneos engafentaos, barcos na mar ensin llendes, mensaxeros con priesa, conspiradores, milagros, reliquies, pecáu, victories y derrotes... Un mundu estremáu del nuestru con xente fecho de la mesma pasta que nós.
  • El valor del rei - La cuerda de “El valor del rei” ta texida con tres filos, que son tres voces, la d’Aurelio, el rei qu’afuxe; la d’Adosinda, una muyer coles idees mui clares y mui medievales; la de Mauregato, el persiguido.

Novela d actualidá:[editar | editar la fonte]

  • Un raposu en tresmonte - Premiu de novela de l'Academia de la Llingua Asturiana 2002.La vida furtiva, dura y en ciertu mou feliz d’un home qu’anda escondíu pel monte completamente solu porque nun se pue dexar ver. La so cara y el so delitu son demasiao famosos como p’arriesgase a ser reconocíu por cualquier persona. Un home qu’experimenta una lliberación inesperada na vida salvaxe. Pero la vida pasada persíguelu hasta’l cumal del monte.
  • El pisu d'enriba - obra escrita xunto con Adolfo Camilo Díaz, gana'l Premiu de novela Xosefa Xovellanos en 2007. Un problema, una protagonista engafentada, un par de cuyaraes corioses de sentíu del humor, un plizcu de socioloxía permoderna, xingar el frascu pa mecelo too bien, y tomalo en cuatro o cinco veces. Esa ye la receta d’El pisu d’enriba, un manual pal activista desesperáu y non violentu (polo menos non mui violentu), una manera de ver cómo somos y preguntase por qué somos asina. La historia de Mariví escontra’l ruíu.
  • Eternu negociu - Premiu Narraciones Trabe del añu 2011. Esta novela ta narrada en primera persona y presente, dalgo muncho más complexo y poco común que la primer persona y pasáu. El narrador nun cuenta lo que-y pasara, sinón que vive lo que-y ta pasando, o lo que ta pensando, diciendo o escuchando nel momentu. Trátase d’un bisturí lliterariu eficaz p’adentrase na sicoloxía d’ún de los personaxes nos que Xulio Arbesú más tien profundizao, un home enllenu de defeutos y contradicciones, d’un tipu bien identificable na nuestra sociedá. Martín Vallina ye un empresariu ricu qu’a los cuarenta años decide que se quier casar y contrata a un sicólogu pa que lu ayude a encontrar la candidata perfecha. Pa él l’asuntu tien muncho de negociu, pero non un negociu cualquier, sinón l’eternu negociu.

Novela Xuvenil:[editar | editar la fonte]

  • Misión Pelayo - novela xuvenil n'asturianu que recibe'l Premiu "Llectures pa rapazos" de l'Academia de la Llingua Asturiana 2001. Reeditada en 2014 por Suburbia Ediciones. Tres xóvenes d’anguaño viaxen nel tiempu con una misión periodística: contactar con Pelayo, el xefe rebelde qu’entamó n’Asturies la reconquista de la península ibérica, invadida polos islamitas en 711. Y non solo cumplen el so cometíu de conocer a Pelayo de primera mano tres munches aventures, sinón que lleguen a vese metíos na llexendaria batalla de Cuadonga. Pero ellos vienen d’otra dómina y tienen que tornar a ella con tola información recoyida. Nun va ser fácil salir d’un flecu del tiempu que s’esboroña.

Cuentos:[editar | editar la fonte]

  • Cuentos con neños - colección de rellatos curtios espublizada nel añu 2005. Unos rapacinos que nun entienden un chiste picardiosu oyíu a los mayores; un güelu qu’entretién coles imáxenes d’una revista a la nietina sentada enriba les piernes; unos críos que-y tienen mieu al agua nun cursu de natación; un padre que lleva a los fíos d’escursión y duermen pola primer vegada albentestate; una axitada esperiencia pedagóxica nun campamentu; una reciella guajes xugando nel ríu; dos neñinos y un paisanín solos nel monte... Miraes a la infancia en rellación colos adultos. Pilancos, enquices, disgustos, griesques. Tamién ternura, satisfaición, belleza, procuru. CUENTOS CON NEÑOS ye sobre too amor pola vida y respetu pola inocencia, con unes migayes de reflexón sobre les nuestres costumes: les bones, les males y les que tán por definir. Nun son cuentos pa neños.

Ensayu[editar | editar la fonte]

  • La informatización del transporte- ensayu sobre'l tresporte futurista escritu en castellanu (2008)
  • Fui maquinista en la minería- Nesti llibru Xulio Arbesú pon la so pluma a disposición de la memoria prodixosa de so padre, qu’a los 87 años cuenta con llucidez y gran cantidá d’anécdotes y detalles, la so llarga trayectoria llaboral, primero nes locomotores del tren de vía estrecha de Duro Felguera y Hunosa y darréu como maquinista d’estracción nel pozu Cerezal. Trátase d’un documentu prestosu sobre unos tiempos que ya nun van tornar
  • Los deseos del dineru - Premiu d'ensayu "Máximo Fuertes Acevedo" concedíu pola Conseyería d'Educación, Cultura y Deporte del Principáu d'Asturies nel añu 2012.
  • Asina viaxaremos en 2050 - Ye previsible que na metá del sieglu XXI el tresporte per tierra s’asemeye poco al de finales del sieglu XX. El desarrollu basaráse na implantación d’una rede informática que va controlar la conducción. La rede va desencadenar cambios radicales: van desapaecer los vehículos de más de quince places; va separase la velocidá por aciu de la elevación sobre columnes en puente contínuu llixeru; les ciudaes van ser plenamente peatonales, a nivel de cai va circulase obligatoriamente con lentitú; les mercancíes van circular per conductos; va xeneralizase’l viaxe de puerta d’orixe a puerta de destín en vehículu públicu... Esti llibru contién la esplicación de cómo se va llegar gradualmente a esi escenariu. “Asina viaxaremos en 2050”, en publicación virtual, ye una adaptación pa un públicu xeneral del llibru más técnicu “La informatización del transporte”, editáu por KRK.

Música[editar | editar la fonte]

Tien desendolcada la so faceta musical poniendo-y música a los poemes de "La mina que nun cierra" (Foru pola Poesía, 2007), obra coleutiva de los poetes del Valle del Nalón interpretada pol grupu Mures.

Viento:[editar | editar la fonte]

La cantante valenciana Celina Jiménez interpreta la canción VIENTO/VIENTU, de Xulio Arbesú. Esta canción, por aciu de la metáfora del vientu, fala de la condición del ser humanu como emigrante y refuxáu a lo llargo de époques y países estremaos. Toos venimos d’una raza d’emigrantes, toos podemos ser refuxaos cualquier día.

Les imáxenes básense en dellos primeros planos de la cantante y sobre too en planos de 27 actores y actrices nel papel d’emigrantes y refuxaos de tiempos diferentes.

Hai una versión en castellano

https://www.youtube.com/watch?v=clXus0BxiIg

y otra n’inglés: Wind.

https://www.youtube.com/watch?v=I_0Y_1jpf7I

La LLoca:[editar | editar la fonte]

El tangu “La Lloca” fue compuestu por Xulio Arbesú pa la voz y la personalidá artística d’Anabel Santiago y tamién pa la escultura llamada oficialmente “La madre del emigrante” y popularmente “La Lloca” debío al desgarru que se ve nel so xestu. Trátase d’una obra de Ramón Muriedas asitiada enriba la playa del Rinconín, en Xixón. Cola so lletra asturiana y la so música arxentina, esti cantar representa como la estatua el drama de l’Asturies emigrante.

La Lloca ganó’l “Premiu al Meyor Cantar N’asturiano” de 2016, concedíu pola Conseyería de Cultura del Principáu d’Asturies.

https://www.youtube.com/watch?v=kZ045-YIVmM

Nana de la tierra:[editar | editar la fonte]

Esti cantar de Xulio Arbesú forma parte del llargumetraxe musical Bailandia, pero en realidá ye una versión con dellos cambios de la canción “Desde la luna”, que formaba parte del discu “La mina que nun cierra”. Nos dos casos la canta Liliana Fernández, con una voz dulce y expresiva, exquisita sobre too nesta versión de la canción como nana. La escena de la muyer embarazada que canta al empar pa la criatura del so propiu vientre y pal planeta enteru, como partes d’un mesmu destín, ye una de las más belles y significatives de la película.

https://www.youtube.com/watch?v=2w6Kxi9llog

Cine[editar | editar la fonte]

Tamién tien rodáu un llargometraxe musical que lleva por títulu "Bailandia", que se presentó nel edificiu históricu de La Tabacalera en Madrid el 15 de marzu de 2014. Nesti proyeutu participaron más de 70 actores y baillarines.

Aquí puede verse completa:

https://www.youtube.com/watch?v=rF89hHfiHXs&t=11s


Referencies[editar | editar la fonte]


http://www.lne.es/cuencas/2014/03/15/julio-arbesu-presenta-hoy-madrid/1557000.html?utm_medium=rss

http://www.lne.es/nalon/2012/12/20/xulio-arbesu-gana-premio-maximo-fuertes-ensayo-asturiano/1343915.html

http://www.elcomercio.es/20091118/cultura/xulio-arbesu-gana-premio-20091118.html

http://www.asturies.com/node/6903

http://www.presspeople.com/nota/xulio-arbesu-presenta-ultimas-publicaciones-dia

http://www.europapress.es/asturianu/noticia-suburbia-ediciones-anuncia-reedicion-novela-xuvenil-mision-pelayo-xulio-arbesu-20140114123318.html

http://www.asturnews.com/index2008.php?idn=13681