Centru de Terminoloxía Asturiana

Centru de Terminoloxía Asturiana
organización y base de datos
Historia
Fundación	xineru 2009
Fundador	Academia de la Llingua Asturiana Softastur
Web oficial

El Centru de Terminoloxía Asturiana (TERMAST) ye'l centru encargáu de la coordinación xeneral de les xeres terminolóxiques venceyaes a la llingua asturiana y surde el 15 xineru de 2009 per aciu del pautu robláu ente tres entidaes asturianes: l'asociación Softastur, el Colexu d'Inxenieros n'Informática del Principáu d'Asturies y l'Academia de la Llingua Asturiana.

La idea cimera de TERMAST ye la ellaboración de propuestes terminolóxiques d'aplicación a los nuevos usos de la llingua asturiana y la disponibilidá de consulta al traviés d'una estaya concreta dientro de la páxina web de l'Academia de la Llingua Asturiana.

A la escontra d'otros entamos y propuestes normatives de l'Academia, TERMAST quier que seyan iniciatives individuales o grupales concretes les que dean a la conocencia pública la so particular propuesta de solución a los problemes terminolóxicos del asturianu nos estremaos contestos comunicativos: ámbitu científicu, de les nueves teunoloxíes, económicu, sociolóxicu, humanísticu...

Estes propuestes tarán al algame de los usuarios de la llingua asturiana, de mou que sedrán éstos —col so usu o refugu— los que dirán dándo-yos calter de normalidá, de mou que llueu d'ello l'Academia pueda dir inxiriéndolos dientro de los sos calces normativos.

El primer trabayu del TERMAST ye “Términos básicos d'Economía y Empresa” de Guillermo Ovidio Villa Balbona y Fernanda Valdés Rodríguez, que s'espublizó en papel, anque non tolos trabayos del Centru van espublicen impresos. El segundu trabayu, de momentu tovía non imprentáu, trata sobre terminoloxía xurídica, y cuerre al cargu de Nicolás Bartolomé Pérez.

Rellación de trabayos asoleyaos

Títulu	Autor	Espublización	Enllaz
Términos básicos d'economía y empresa	Guillermo Ovidio Villa Balbona y Fernanda Valdés Rodríguez	5 d'ochobre de 2009	Abrir
Terminoloxía xurídica y alministrativa	Nicolás Bartolomé Pérez	17 de febreru de 2010	Abrir
Terminoloxía matemática	Rubén Fernández Martínez	14 d'abril de 2010	Abrir
Terminoloxía médica	Xesús González Rato	30 d'abril de 2010	Abrir
Terminoloxía postal	Xandru Martino Ruz	16 de xunetu de 2010	Abrir
Terminoloxía física	Rubén Fernández Martínez	10 d'avientu de 2010	Abrir
Terminoloxía educativa	Rodrigo Fernández Joglar	18 d'avientu de 2011	Abrir
Terminoloxía de teoría de la lliteratura	Ricardo Saavedra	25 d'abril de 2012	Abrir
Terminoloxía de turismu	Inaciu Galán y González	12 d'avientu de 2012	Abrir
Terminoloxía de meteoroloxía	Ruben Fernández Martínez	30 d'abril de 2013	Abrir
Terminoloxía de teatru y artes escéniques	Belarmino Daniel Álvarez Álvarez y Antón Caamaño Vega	31 de xineru de 2014	Abrir
Terminoloxía de fútbol	David Fernández Fernández	11 de xunu de 2014	Abrir
Términos de bioloxía	Xosé B. Álvarez Álvarez	24 d'abril de 2015	Abrir
Términos de sociollingüística	Héctor García Gil	21 d'avientu de 2016	Abrir
Terminoloxía musicolóxica: xéneros musicales tradicionales asturianos	Rodrigo Fernández Joglar	26 de febreru de 2018	Abrir
Terminoloxía eleutoral básica	Héctor García Gil	3 de mayu de 2018	Abrir
Terminoloxía de bioquímica y bioloxía molecular	Xurde Menéndez Caravia	11 d'abril de 2019	Abrir
Terminoloxía de botánica	Bertu Ordiales García	23 d'avientu de 2020	Abrir
Terminoloxía de xuegos de rol	Nicolás Bardio	22 de marzu de 2021	Abrir
Terminoloxía de deportes y pruebes olímpiques	David Fernández Fernández	8 de xunetu de 2021	Abrir
Terminoloxía de cine	Pablo A. Quiroga Prendes	22 de febreru de 2023	Abrir
Términos de bioteunoloxía ya inxenería biomédica	Xurde Menéndez Caravia	22 de marzu de 2024	Abrir

Ver tamién

• TERMCAT

Enllaces esternos

• Páxina web oficial (n'asturianu)

• Datos: Q20615294