Centru de Terminoloxía Asturiana

De Wikipedia
Saltar a navegación Saltar a la gueta

El Centru de Terminoloxía Asturiana (TERMAST) ye'l centru encargáu de la coordinación xeneral de les xeres terminolóxiques venceyaes a la llingua asturiana y surde el 15 xineru de 2009 per aciu del pautu robláu ente tres entidaes asturianes: l'asociación Softastur, el Colexu d'Inxenieros n'Informática del Principáu d'Asturies y l'Academia de la Llingua Asturiana.

La idea cimera de TERMAST ye la ellaboración de propuestes terminolóxiques d'aplicación a los nuevos usos de la llingua asturiana y la disponibilidá de consulta al traviés d'una estaya concreta dientro de la páxina web de l'Academia de la Llingua Asturiana.

A la escontra d'otros entamos y propuestes normatives de l'Academia, TERMAST quier que seyan iniciatives individuales o grupales concretes les que dean a la conocencia pública la so particular propuesta de solución a los problemes terminolóxicos del asturianu nos estremaos contestos comunicativos: ámbitu científicu, de les nueves teunoloxíes, económicu, sociolóxicu, humanísticu...

Estes propuestes tarán al algame de los usuarios de la llingua asturiana, de mou que sedrán éstos —col so usu o refugu— los que dirán dándo-yos calter de normalidá, de mou que llueu d'ello l'Academia pueda dir inxiriéndolos dientro de los sos calces normativos.

El primer trabayu del TERMAST ye “Términos básicos d'Economía y Empresa” de Guillermo Ovidio Villa Balbona y Fernanda Valdés Rodríguez, que s'espublizó en papel, anque non tolos trabayos del Centru van espublicen impresos. El segundu trabayu, de momentu tovía non imprentáu, trata sobre terminoloxía xurídica, y cuerre al cargu de Nicolás Bartolomé Pérez.

Rellación de trabayos asoleyaos[editar | editar la fonte]

Títulu Autor Espublización
Términos básicos d'economía y empresa Guillermo Ovidio Villa Balbona y Fernanda Valdés Rodríguez 5 d'ochobre de 2009
Terminoloxía xurídica y alministrativa Nicolás Bartolomé Pérez 17 de febreru de 2010
Terminoloxía matemática Rubén Fernández Martínez 14 d'abril de 2010
Terminoloxía médica Xesús González Rato 30 d'abril de 2010
Terminoloxía postal Xandru Martino Ruz 16 de xunetu de 2010
Terminoloxía física Rubén Fernández Martínez 10 d'avientu de 2010
Terminoloxía educativa Rodrigo Fernández Joglar 18 d'avientu de 2011
Terminoloxía de Teoría de la lliteratura Ricardo Saavedra 25 d'abril de 2012
Terminoloxía de turismu Inaciu Galán y González 12 d'avientu de 2012
Terminoloxía de meteoroloxía Ruben Fernández Martínez 30 d'abril de 2013
Terminoloxía de teatru y artes escéniques Belarmino Daniel Álvarez Álvarez y Antón Caamaño Vega 31 de xineru de 2014
Terminoloxía de fútbol David Fernández Fernández 11 de xunu de 2014
Términos de bioloxía Xosé B. Álvarez Álvarez 24 d'abril de 2015
Términos de sociollingüística Héctor García Gil 21 d'avientu de 2016
Terminoloxía musicolóxica: xéneros musicales tradicionales asturianos Rodrigo Fernández Joglar 26 de febreru de 2018
Terminoloxía eleutoral básica Héctor García Gil 3 de mayu de 2018
Terminoloxía de bioquímica y bioloxía molecular Xurde Menéndez Caravia 11 d'abril de 2019

Ver tamién[editar | editar la fonte]

Enllaces esternos[editar | editar la fonte]