Real Stadium Club Ovetense

Real Stadium Club Ovetense
Situación
País	España
Autonomía	Principáu d'Asturies
Provincia	Provincia d'Asturies
Conceyu	Uviéu
Estáu	España
Datos
Tipu	club de fútbol
Fundáu en	1914
Desapaecíu en	1926
Categoría	Campeonatu Rexonal d'Asturies
Uniforme
Titular Alternativu
Real Stadium Club Ovetense Real Uviéu

El Real Stadium Club Ovetense, o abreviadamente Stadium Ovetense, foi un club de fútbol español de la ciudá d'Uviéu, fundáu en 1914 y desapaecíu en 1926 en fundiéndose col otru club esistente na ciudá, el Real Club Deportivo Oviedo, pa dar pasu al Real Uviéu. Yera teníu pol equipu de les clases populares de la ciudá n'oposición al Real Club Deportivo Oviedo que lo yera de les clases pudientes.

Historia

Tres la so fundación el club apostó'l Campeonatu Rexonal d'Asturies, consiguiendo'l títulu na temporada 1924-25, primer vegada qu'un equipu de la ciudá d'Uviéu consiguir tres 8 temporaes, dende l'empiezu de la competición, de dominiu del Real Sporting de Xixón.

L'alliniación del equipu que llogró'l campeonatu, taba encabezada pol porteru Óscar Álvarez, eternu sustitutu de Ricardo Zamora na partería de la Seleición Española, acompañáu de Mariscal, Trucha; Xusto, Julio Alonso, Vigón; Montalbán, “Tiesu”, Paladini, Barril y Servando. Esti once yera dafechu de xugadores asturianos y, sacante trés d'ellos, nacíos n'Uviéu.

Esti ésitu dio-y derechu a participar en 1925 na competición nacional d'aquel momentu: la Copa del Rei. Apostó la liguilla de cuartos de final xunto col Celta de Vigo y el Club Deportivo Español de Valladolid, quedando esaniciáu tres un bagaxe de 1 victoria, 1 empate y 2 derrotes.

Na temporada siguiente, 1925-26, el tercer puestu del Stadium Uvieín y la decepcionante actuación del Deportivu Uviéu nel campeonatu rexonal, motivó que se buscara la fusión de dambos clubes con vistes a formar un equipu más poderosu capaz d'apoderar el fútbol rexonal y más concretamente al Real Sporting de Xixón. Tres mediación d'Óscar Álvarez, el 14 de marzu axuntáronse les directives de dambos clubes p'afitar les condiciones del alcuerdu, el 26 de marzu volvieron axuntase pa dar el so alcuerdu final, fecha que se tien pola de fundación del nuevu club, y finalmente roblóse l'acta de fusión el 26 d'abril de 1926.

Un interés rellacionáu con esti club ye que Santiago Bernabéu, el que fuera presidente del Real Madrid, perteneció mientres unes selmanes del branu de 1921 a la disciplina del Stadium Uvieín por cuenta de un treslláu a Uviéu por motivos llaborales. Llegó a xugar dellos partíos amistosos ya inclusive a actuar d'árbitru nun partíu ente la Seleición Vasca y el Deportivu Uviéu.

Uniforme

Vistía camiseta a rayes verticales negres y marielles, o azules y marielles, y pantalón negru.

Estadios

• Campu de Maniobres de Llamaquique: Usáu yá dende los primeros partíos que se xugaron n'Uviéu a principios del sieglu XX.

• Vetusta: Taba asitiáu nel barriu de Fozaneldi. Inauguróse'l 23 de setiembre de 1923 con un partíu ente'l Stadium Uvieín y el Racing de Madrid rexistrándose la resultancia de 0-2. Dexó d'usase tres la fusión y sumió tres la Guerra Civil.

Xugadores

• Óscar Álvarez. Porteru. Foi convocáu pa la Seleición Española, como suplente de Ricardo Zamora, 9 vegaes siendo xugador del Stadium Oventense y 2 como xugador del Real Uviéu. Como tal tuvo presente nos Xuegos Olímpicos de París de 1924 anque nun llegó a debutar. Consiguió coles mesmes, yá como xugador del Real Uviéu, ser el porteru menos goliáu de Segunda División nes temporaes 1931-32 y 1932-33.

• Ulpiano Villazón. Mediu. Foi convocáu pola seleición española de fútbol mientres xugaba nel Stadium, pero nun llegó nunca a debutar.

Palmarés

• Campeonatu Rexonal d'Asturies (1): 1924-25

Ver tamién

• Real Uviéu

Bibliografía

• (2001) De Fozaneldi al Parque del Oeste. 80 años de fútbol n'Uviéu. La Nueva España.
• «Real Uviéu. La so historia en númberos.». Consultáu'l 5 de febreru de 2010.

Referencies

• Datos: Q6102154