Sistema Interestatal d'Autopistes

El Sistema Interestatal d'Autopistes (Interstate Highway System, nomáu oficialmente Dwight D. Eisenhower National System of Interstate and Defense Highways) ye una rede d'autopistes que formen parte del Sistema Nacional d'Autovíes (National Highway System) de los Estaos Xuníos. La so construcción foi autorizada pola Llei d'Axuda Federal pa la Construcción d'Autopistes de 1956 (Federal Aid Highway Act of 1956). La cadarma del sistema estiéndese por tolos estaos continentales del país, y tien tamién rutes en Ḥawai, Alaska y Puertu Ricu.

La primer llei de sofitu presupuestariu federal a la construcción de carreteres remóntase a 1916 (Federal Aid Road Act of 1916), y de magar entamó un esfuerciu públicu pa construir una rede nacional de carreteres que continuó cola primer Llei d'Axuda Federal pa la Construcción d'Autopistes, la de 1921 (Federal Aid Highway Act of 1921). Tres de la llegada de Dwight D. Eisenhower a la presidencia del país en 1953 la so alministración desendolcó una propuesta pa la construcción d'un sistema interestatal d'autopistes, que garró rangu de llei en 1956. El proyeutu diose por completáu en 1992, magar que delles de les rutes propuestes al principiu nun se ficieran y que dellos tramos de delles autopistes nun cumplen colos estándares federales pa esti tipu de víes y habíen ser consideraes autovíes más qu'autopistes. El coste total de construcción del Sistema Interestatal sería l'equivalente, en términos de valor en 2018, a 521.000 millones de dólares. El sistema proyeutáu orixinalmente camudó bien de veces demientres la so esistencia, cola creación de nuevos nomes pa les autopistes y la estensión de los esistentes a fasteres ayenes a lo proyectao orixinalmente.

Magar que la mayor parte de les perres gastaes en construyiles aportoles el gobiernu federal los estaos son los propietarios de los tramos de les interestatales que percuerren el so territoriu. Toles autopistes deben cumplir los estándares federales pa esti tipu de víes, qu'inclúin l'accesu controláu (y prohibíu a dellos tipos de vehículos y a peatones), la esistencia nel so percorríu d'un númberu mínimu de semaforos y la so señalización acordies coles especificaciones de la llei federal. Les autopistes interestatales numbérense según un esquema pol que les principales nómense con un númberu d'una o dos cifres, mentantu que les rutes más pequeñes nómense con un númberu de trés cifres, nes que les dos primeres correspuenden a l'autopista principal de la que nacen. El Sistema ye financiáu parcialmente al traviés d'un fondu federal que saca los sos ingresos d'un impuestu sobre'l combustible. Magar que la llexislación federal prohibía nún principiu qu'hobiera peaxes nelles hai dellos estaos que cobren por circular per elles.

Referencies[editar | editar la fonte]

Enllaces esternos[editar | editar la fonte]