Selmana Negra

De Wikipedia
Saltar a navegación Saltar a la gueta

La Hestoria[editar | editar la fonte]

Esti festival cellébrase dende l'añu 1988 fasta anguaño, entamos del sieglu XXI, con una vocación de cambéu de cutio, xunto cola decisión de ser un acontecimientu popular, pal preste de la xente en xeneral y non sólo d'una élite, carauterístiques que foren esenciales pa la permanencia de la Selmana Negra y pal so afitamientu como un festival ú la folixa, la cultura, la gayola y los esmolecimientos sociales conviven complementándose.

Dirixida dende los sos entamos pol escritor asturmexicanu Paco Ignacio Taibo II, la Selmana Negra anicióse como un modestu festival qu'axuntaba a escritores de novela policiaca y ufría arriendes música y otres artes escéniques al públicu. La Selmana Negra de Xixón medrara a lo llargo venti años fasta convertise nún de los mayores festivales europeos en cuantes al númberu d'asistentes, calculáu en más d'un millón a lo llargo de los diez díes qu'anguaño dura la so celebración, con conciertos masivos nos que participaren músicos de la talla de Willie Colón, Los Lobos, Mano Negra, Georges Moustaki o Dixebra cola presencia d'autores de primera llinia mundial nuna llista que suma yá millares de criyadores lliterarios y de testimoñu.

A lo llargo de los años, la Selmana Negra de Xixón reinventóse a sí mesma incesantemente, sumando estremaes propuestes como la lletura de poesía a la medianueche, que se tornara nuna les actividaes con más asistencia y au participaren, llevando como anfitrión anualmente al poeta asturianu Ángel González, l'arxentinu Juan Gelman, el mexicanu Juan Bañuelos, Joaquín Sabina y Luis García Montero, ente otros.

Amás de la lliteratura policiaca que-y da orixe, la Selmana Negra de Xixón inclúi ente la so oferta a autores de cómic, de novela hestórica y de ciencia ficcióncomo Yoss autor cubanu que nun pudo dir nel últimu momentu o Khristo Poshtakov qu'aprució conxunto al so editor mazcaráu de Blues Brothers, abriendo asina espacios pa la criyación plástica y el testimoñu visual per aciu d'esposiciones.

Anualmente, la Selmana Negra ye pública y regala llibros, de cutio con participación d'autores amigos y visitantes de la Selmana Negra: escritores, dibuxantes, autores de cómic y fotógrafos.

Dientro de la Selmana Negra rialícense amás otros festivales, como'l Alcuentru Intenacional de Fotoperiodismu dirixíu pol Premiu Pulitzer asturianu Javier Bauluz, trayendo a Xixón a los principales esponentes del fotoperiodismu mundial, y l'Asturcón, la convención asturiana de ciencia fición, que nel so intre tamién fora anfitriona de la convención española de ciencia fición y fantasía. Demientres unos años rializóse al empar un festival de maxa.

Too esto fora puntualmente sorrayáu pol diariu del festival, A Quemarropa, que se publica tolos díes del festival ufriendo a los sos lletores información de lo asocedío el día anterior y de lo previsto pal día de publicación, arriendes de criyación y comentarios de destacaes plumes asistentes a la Selmana Negra.

Por toó esto, la Selmana Negra fora tema de documentales europeos y americanos y puntu d'interés de la prensa demientres los diez díes de la so rialización.

La Selmana Negra, a diferencia de les selmanas comunes, dura diez díes.

Ente les actividaes de la Selmana Negra, l'Asociación Internacional d'Escritores Policiacos otorga'l Premiu Internacional de Novela Dashiell Hammett a la meyor novela policiaca escrita n'español.