Seiken Shukumine

Seiken Shukumine
Vida
Nacimientu	Nago, 9 d'avientu de 1925
Nacionalidá	Xapón
Muerte	Itō, 26 de payares de 2001 (75 años)
Oficiu
Oficiu	karateka

Seiken Shukumine, nacíu’l 9 d'avientu de 1925 n'Arime, actual ciudá de Nago, n'Okinawa, Xapón, y fináu'l 26 de payares de 2001 n'Ito, prefeutura de Shizuoka, foi un karateca xaponés que fundó l'estilu Gensei Ryu y el nuevu arte marcial del Taido.

Cuando tenía cinco años, el so padre, direutor d'escuela primaria, confió la educación física del neñu a un maestru de kárate, Anko Sadoyama (1880 - ?). Esti fíxolu descubrir el kárate, amenando enforma les sos capacidaes físiques. Cuando entró nel institutu en 1938, Shukumine entamó a prauticar Kendo, pero más atrayíu pol kárate llogra que lu almita como discípulu un espertu poco conocíu de kárate, Soko Kishimoto (1862 - 1945). Kishimoto tuvo bien pocos discípulos a lo llargo de tola so vida, pero amás de Shukumine ye bien conocíu Seitoku Higa (1920 -), más tarde fundador del Bugeikan y primer presidente de la Federación de Kárate y Kobudo d'Okinawa (Okinawa Karate Kobudo Rengokai).

Kishimoto, que s’enchipaba porque nunca tuviera un maestru y porque tolo aprendiera a base d'amarraces (kake dameshi), foi en realidá, según delles fontes, discípulu de “Bushi” Takemura (1814? - 1896), esti mesmu discípulu de “Tode” Sakugawa (1782 - 1862?). Por mor d'esta filiación, val dicir que l'estilu prauticáu por Kishimoto yera de la llinia Shuri-te dientro’l kárate okinawense, mientres qu'al paecer Anko Sadoyama prauticaba’l Naha-te (según cunta Shukumine nel so llibru “Karate-do Tanren Sankagetsu”). En cualquier casu, Seiken Shukumine prauticaba escurque un kárate poco ortodoxu basáu sobre too n'embabucar y n'atacar d'esmenu los puntos vitales.

Na Segunda Guerra Mundial, Shukumine foi almitíu como voluntariu nuna escuadra suicida de submarinos de bolsín (kôryû^[1]) de la marina imperial basada en Yanai, prefeutura de Yamaguchi. Llibró d'una muerte segura gracies a la rindición de Xapón. Kishimoto morriera nel mesmu 1945, cuando la batalla d'Okinawa.

Acabante la guerra Seiken Shukumine siguió prauticando y empecipió a desendolcar nueves téuniques col envís de crear el so propiu estilu de kárate. Al poco de pasar de la isla principal, Honshu, a la isla de Kyushu, tornará un tiempu a la so isla nativa d'Okinawa, pa volver finalmente a Honshu y allugase na ciudá d'Ito, na prefeutura de Shizuoka. Paez que n'alcordanza de Kishimoto aidó una temporada a ún de los sos antiguos condiscípulos de cuando’l vieyu maestru, Seiichi, qu'había dar nome al Gensei Ryu (玄制流: "la escuela de dir en cata de la verdá fonda y asoleyala per aciu de la forma"). El 2 d'ochobre de 1955, Shukumine participó nuna demostración televisada de dellos estilos de kárate, organizada pola cadena NTV (Nippon Television), xunto con Seiichi Akamine (Goju Ryu), Kanki Izumigawa (Goju Ryu), Hidetaka.Nishiyama (Shotokan), Ryusho Sakagami (Shito Ryu), Yasuhiro Konishi (Ryobukai). Fixo ente otres coses el kata koshokun-dai, asina como una francedura d'un apilamientu de 34 teyes. En 1955 algama’l grau de 8ᵘ Dan Kyoshi de la Dai Nippon Butokukai.

Dende 1962 aproximao, dempués de dalgo más d'una década desendolcando’l kárate Gensei Ryu y per aciu de delles diverxencies, concretamente al respeutive de les normes de competición, colos otros estilos de kárate que daquella tentaben d'apautase pa crear una organización común (la Federación Xaponesa de Karate, JKF), y escurque tamién debío a discutinios internos, Shukumine decide dir dexando’l mundu del kárate pa crear un nuevu Budo al que va nomar Taido (Tai: 躰 = 身 + 体 el cuerpu y l'espíritu en xunto; Do: 道 la vía). D’esta miente, yá dafechu comprometíu col Taido, el 23 de xineru de 1965 funda l'Asociación Xaponesa de Taido y el Taido Honin (Institutu del Taido). El 19 de payares de 1967 organízase’l primer campeonatu nacional de Taido, asina como’l primer campeonatu nacional universitariu qu'habrá celebrase de siguío tolos años hasta’l día de güei. En 1983 créase la Federación Mundial de Taido (WTF) y organízase’l primer campeonatu internacional en Tokyo en 1984. En 1987 organízase en Suecia’l primer campeonatu européu de Taido, que llueu va tener llugar cada cuatro años. En 1993 celébrase en Tokio’l primer campeonatu del mundu, qu'asina mesmo va tener llugar cada cuatro años.

Seiken Shukumine muerre’l 26 de payares de 2001 na so casa d'Ito, d'un paru cardiacu, a la edá de 75 años. Dexaba muyer, un fíu y dos fíes.

Notes[editar | editar la fonte]

↑ Kôryû o tamién kôhyôteki-chôgata: ye un submarín de bolsín de 26 m. de llargor con una tripulación de 5 homes, atalantáu pa la defensa final de Xapón contra’l final de la guerra. Forníu de mano con dos torpedos, armáronlu en realidá con un sistema d'autodestrucción destináu a facelu españar al contautu col so oxetivu.

Bibliografía[editar | editar la fonte]

SHUKUMINE Seiken, "Shin Karate-do kyohan (Nuevu Manual de Kárate)", Ed.Bungeisha, 1964, en xaponés.
SHUKUMINE Seiken, "Taido Gairon (Tratáu sobre’l Taido)", Ed.Gendai Shorin, 1988, en xaponés.
SHUKUMINE Seiken, "Karate-do tanren sankagetsu (Tres meses entrenando Kárate)", Ed.Bungeisha, 1978, en xaponés.
BISHOP Mark, "Okinawa Karate - Teachers, styles and secret techniques", Ed.Black, 1989, n'inglés. De la páxina 159 a la 164 fala de Shukumine, Kishimoto, Bushi Takemura, el Taido y el Gensei Ryu.

Enllaces esternos[editar | editar la fonte]

[1] Asociación Francesa de Taido
[2] Asociación de Taido de los Estaos Xuníos
[3] Asociación de Taido del Reinu Xuníu
[4] Asociación Australiana de Taido
[5] Asociación Portuguesa de Taido

[1] Kôryû o tamién kôhyôteki-chôgata: ye un submarín de bolsín de 26 m. de llargor con una tripulación de 5 homes, atalantáu pa la defensa final de Xapón contra’l final de la guerra. Forníu de mano con dos torpedos, armáronlu en realidá con un sistema d'autodestrucción destináu a facelu españar al contautu col so oxetivu.

[1]