Pozu San Xurde

Pozu San Xurde
	pozu y mina carbón
Llocalización
País	España
Autonomía	Principáu d'Asturies
Provincia	provincia d'Asturies
Conceyu	Ayer
Coordenaes	43°10′45″N 5°45′33″W / 43.179268°N 5.759124°O
	Pozu San Xurde Pozu San Xurde (Asturies)

El Pozu San Xurde foi una esplotación vertical de carbón asitiada nel pueblu ayeranu de Caborana. Foi inaugurada nel añu 1942, siendo'l primer pozu afondáu nel conceyu d'Ayer y peslló en 1995, añu en que se fai ausiliar del próximu Pozu Santiago, fasta'l zarru d'esti n'avientu de 2018, finando asina cola minería nel conceyu d'Ayer.

Historia[editar | editar la fonte]

Dende 1967, va formar parte del Área Ayer del grupu HUNOSA, xunto colos pozos Santiago y San Antonio, qu'hasta entoncies yeren de la Sociedá Hullera Española. El so estáu de caltenencia ye bonu, cuntando con un castillete de 31,5 metros y una fondura de 151 metros. La fechura d'esti pozu propúnxola Antonio Cifuentes nel añu 1920, sicasí, la so idea cayería nel escaezu, quiciabes poles abondoses capes de carbón qu'entá se podíen estrayer nos grupos de monte, desaniciando los propietarios la idea polo costoso de tala obra. Por embargu, nel añu 1936, l'inxenieru direutor de la Sociedá Hullera Española, va recuperar el proyeutu de Cifuentes, unviando delles cartes a caún de los inxenieros de los grupos de monte ayeranos pa entrugá-yos sobre'l so paecer no tocante al afondamientu d'un pozu vertical, énte'l acabamientu de les capes de carbón nes mines de monte.

Los grupos colos que se faló foron:

Grupu Melendreros
Grupu Vanguardia
Grupu Llegalidá
Grupu Cutrifera-Morea
Grupu Marianes
Grupu Comenencia
Grupu dos amigos

Les obres d'afondamientu del pozu entamaron en 1939, y dieron acabamientu en 1942, añu nel que foi inauguráu y nomáu como San Xurde. El castillete montóse ente 1940 y 1941 pola empresa Duro Felguera. No tocante al so nome, esti nun foi'l mandáu nin por Antonio Cifuentes, que na so carta atalantaba l'afondamientu de trés pozos nel conceyu d'Ayer (cuasi acierta, pos seríen cuatro los que s'afondaren) nomaos por él mesmu como "San Antonio", "Santiago" y "San Claudio", nin pol inxenieru qu'unvía'l escritu, pos namái falaba de la construcción del pozu Santiago. El casu ye que, ensin tener claru'l motivu, dióse-y el nome col que lu concemos anguaño, San Xurde. Tiénse noticia d'un accidente'l 7 de mayu de 1948, nel qu'hebo cuatro muertos. El pozu foi visitáu en dos vegaes polos ministros de Industria, los señores Demetrio Carceler Segura, en 1943 y Joaquín Planell Riera, en 1953.

Fontes y bibliografía[editar | editar la fonte]

Guillermo Fernández Lorenzo. Los tres primeros pozos mineros en Aller-Asturias, 2019.

Referencies[editar | editar la fonte]

Enllaces esternos[editar | editar la fonte]