Palaciu de San Román de Panes
| Palaciu de San Román de Panes | |
|---|---|
| Bien d'Interés Cultural | |
| palaciu y monumentu | |
 | |
| Llocalización | |
| País |  España |
| Autonomía |  Principáu d'Asturies |
| Provincia | provincia d'Asturies |
| Conceyu | El Valle Baju de Peñamellera |
| Coordenaes | 43°19′14″N 4°35′18″W / 43.3206°N 4.5882°O |
  Palaciu de San Román de Panes Palaciu de San Román de Panes (Asturies) | |
| Historia y usu | |
| Apertura | sieglu XVII |
| Patrimoniu | |
| BIC | RI-51-0011546[1] |
 | |
El palaciu de San Román de Panes alcuéntrase nel barriu de San Román, dientro de la parroquia de Panes, capital del conceyu de Peñamellera Baxa, nel Principáu d'Asturies. Alcuéntrase a 156 km de la capital de la provincia y a 50 m d'altitú sobre'l nivel del mar.
El palaciu de San Román ta venceyáu al señoríu de Colosía y a la ilesia de san Xuan de Ciliergo, d'orixe románicu, asitiáu a bien poca distancia de la casa. Mientres el sieglu XVI los señores de Colosía yá exercíen el patronatu sobre esta ilesia.
Ensin dulda ye'l conxuntu d'edificios más interesante, completu y meyor calteníu de les cases pertenecientes al llinaxe de los Mier, qu'apoderó dellos de los conceyos estremu orientales de la rexón.
El palaciu de San Román adscríbese a la tipoloxía culta d'edificación, carauterizada por intervención d'un arquiteutu o maestru d'obres en tou lo referente a les proporciones de la traza, ordenación de los espacios, calidá constructiva de los materiales o soluciones arquiteutóniques.
Una de les carauterístiques d'esti tipu de construcciones rurales ye la integración nel paisaxe y l'harmonía d'estos en rellación a la redolada. La calidá constructiva de los materiales, la escala y proporciones, coles mesmes que les téuniques constructives emplegaes son valores qu'hai que tener en cuenta dende'l puntu de vista históricu.
Estes carauterístiques son patentes nesti casu na fachada principal y na distribución de los espacios interiores, ente que'l restu de les fachaes caltienen una marcada influencia tradicional d'acentu popular, visible na distribución y tamañu de los vanos, usu de corredor de madera y emplegu de materiales de menor calidá, como mampostería.
El conxuntu del palaciu de San Román ye'l más completu, meyor calteníu y de mayor calidá de tolos esistentes nes Peñamelleres. La so redolada inmediata, entá ensin grandes alteraciones, dexa ver claramente l'espaciu qu'ocupaba una propiedá señorial compuesta por finques, tierres de llabor, pumarada, güertes, y praos. La ordenación de los edificios dientro del conxuntu foi posible yá que la topografía na que s'inscribe ye la más llana del conceyu, de por sí montascosu, ocupando una nidia fastera con estenses finques alredor, nel marxe derechu del ríu Deva. Nel pasáu y según consta nel Rexistru de la Propiedá de Llanes, les propiedaes colindantes estendíense al otru llau de la carretera, que delimita la finca anguaño pel llau norte (carretera N 621), onde s'atopa la ilesia románica de San Xuan de Ciliergo.
El conxuntu del palaciu de San Román coles sos finques y praos q'arredólenlu constitúi'l meyor exemplu d'edificaciones históriques civiles del conceyu, onde l'adecuación de l'arquiteutura a la redolada caltiénese ensin alteraciones.
El propiu palaciu de San Román, que data del sieglu XVII, tamién de la familia Mier, taba formáu pola casona de planta rectangular de dos pisos y altillu, y una capiya exenta de nave única.
Referencies[editar | editar la fonte]
- ↑ «base de datos de monumentos de Wiki Loves Monuments» (13 payares 2017).
- Esti artículu ye una obra derivada de la disposición relativa al procesu de declaración o incoación d'un Bien d'Interés Cultural publicada nel BOE Nᵘ 20 el 20 d'ochobre de 2005 (testu), que ta llibre de restricciones conocíes en virtú del derechu d'autor de conformidá colo dispuesto nel artículu 13 de la Llei de Propiedá Intelectual española.
| Control d'autoridaes |
|
|---|
Datos: Q6058193
Multimedia: Palace of San Roman de Panes