Padre Casares

De Wikipedia
Saltar a navegación Saltar a la gueta

Padre Casares ye una de les series de más éxitu de la TVG. Esta producción ta protagonizada por Horacio Casares, un sacerdote modernu recién salíu del seminariu que llega a la villa de Louredo, un conceyu mariñán de 1.000 habitantes, en relevu de don Crisanto, un cura vieyu que llevaba tola vida dedicáu a la so parroquia. Esta situación va trae-y dellos problemes d'adaptación. Destaquen nel pueblu les griesques ente’l cura vieyu y l'alcalde, d'ideoloxía comunista y que quier un pueblu atéu; y ente les beates –mermuradores y de misa diaria- y la mocedá del pueblu, con valores nuevos sobre la so sexualidá. Toes estes engarradielles centren l'argumentu cómicu de los capítulos. Mesmamente, la confrontación cristianos/ateos pue vese nel mesmu usu que los personaxes faen del topónimu del pueblu: Santo Antonio de Louredo/Louredo.

L’éxitu de la serie llevo a qu'otres televisiones adaptaran los guiones a la so realidá cultural. Asina, podemos ver los mesmos argumentos pero con cambios que reflexen l'ámbitu territorial al que se dirixen: los paisaxes; l'arquiteutura de los edificios; los nomes y apellíos de los personaxes; la música y llingua cambien na versión en gallegu, castellán y catalán. Too ello gracies a les adaptaciones de Canal Sur (Padre Medina), Canal 9 (Senyor Rector) y IB3 (Mossèn Capellá). Amás, TeleMadrid y Castilla-La Mancha TV emitieron la serie orixinal doblada al castellanu.