Octubre

De Wikipedia
Saltar a navegación Saltar a la gueta

Octubre foi un periódicu de conteníu políticu asoleyáu pol Movimientu Comunista d'Asturies (MCA).

El so primer númberu foi editáu nel añu 1975 y nél manifestábase qu'Octubre «pretende ser un arma de combate para la clase obrera y el pueblo (...) aspira tamién a contribuir a la unidad de todos los que luchan por el socialismo». El nome escoyíu pretendía ser un homenaxe a la revolución d'ochobre soviética y a l'asturiana del 34.

Permaneció na clandestinidá hasta'l númberu 10, pasando a partir d'entós a contar con depósitu llegal, y siendo asoleyáu durante dellos númberos más. Contaba con una tirada d'unos 700 exemplares y nel tiempu de clandestinidá l'aparatu d'impresión del Movimientu Comunista d'Asturies asitióse en llugares estremaos pa torgar l'acción represiva. El repartu facíenlu los propios militantes y tamién, nos últimos númberos de vida del periódicu, en dellos quioscos. Nes sos páxines víen la lluz artículos escritos en llingua asturiana y castellana.

El MCA distribuía tamién n'Asturies el so periódicu estatal Servir al Pueblo, igualmente la organización xuvenil del partíu, Mocedaes Revolucionaries d'Asturies asoleyaben el so propiu periódicu: Andecha Xoven.