Les aventures de Jo, Zette y Jocko

De Wikipedia
Saltar a navegación Saltar a la gueta
Wikipedia:Correxir

Les aventures de Jo, Zette y Jocko ye una historieta creada pol belga Hergé, el creador de la célebre serie Les aventures de Tintín. La serie ta protagonizada por dos neños, Jo y Zette Legrand, y la so mascota, el monu Jocko.

Jo, Zette y Jocko apaecen en dellos títulos de Les aventures de Tintín.

Historia[editar | editar la fonte]

En 1935, seis años dempués de l'apaición de Tintín nes páxines de Le Petit Vingtième, el padre Courtois, direutor del selmanariu francés Coeurs Vaillants, suxurió a Hergé que creara una nueva serie d'historietes pa la so revista. El padre Courtois taba a la gueta d'unos personaxes qu'encarnaren los valores familiares meyor que Tintín, un mozu qu'escarecía de familia.

Inspirándose nun monu de xuguete llamáu Jocko, Hergé creó a Jo Legrand, a la so hermana Zette y a la so mascota, el monu Jocko, y tamién a los padres de Jo y Zette, l'inxenieru Jacques Legrand y la so muyer, ama de casa. La primer aventura d'estos nuevos personaxes, El rayu secretu, apaeció en Coeurs Vaillants el 19 de xineru de 1936, y enllargóse hasta xunu de 1937.

Ente 1936 y 1957 apaecieron trés aventures completes de Jo, Zette y Jocko, que se recoyeríen en cinco álbumes. Hergé, sicasí, atopaba un tanto fadia la obligación de faer apaecer siempres a los padres de los protagonistes, casi siempres nel papel de rescatadores. Estes constricciones terminaron per faer -y dexar la serie a finales de la década de 1950.

Títulos[editar | editar la fonte]

  1. El "Manitoba" nun contesta (Le Manitoba ne Répond Plus). Tomu 1 de El rayu secretu.
  2. La erupción del Karamako (L’Eruption du Karamako). Tomu 2 de El rayu secretu.
  3. El testamentu de Mr.Pump (Le Testament de Monsieur Pump). Tomu 1 de El Stratoneff H.22.
  4. Destín Nueva York (Destination New York). Tomu 2 d'El Stratoneff H.22,
  5. El valle les cobres (La Vallée deas Cobres)

Le Thermozéro[editar | editar la fonte]

Le Thermozéro ye la sesta aventura de Jo, Zette y Jocko, que quedó ensin finase. Entamó a realizase en 1958, pero diba ser una aventura de Tintín del mesmu títulu. Hergé pidiera al historietista Greg (Michél Regnier) que creara un guion pa una nueva historieta de Tintín. Greg inventó dos posibles hestories, una titulada Les Pilules ("Les píldores"), y Le Thermozéro, y fixo esbozos d'unes poques páxines de la segunda.[1] Sicasí, el proyeutu foi abandonáu en 1960, cuando Hergé decidió caltener el control absolutu sobre la so obra.

Poco dempués, Hergé decidió resucitar Le Thermozéro, pero teniendo como protagonistes, en llugar d'a Tintín, a Jo, Zette y Jocko. Dio instrucciones al so estrechu collaborador Bob de Moor por qu'escribiera una nueva trama. Bernard Tordeur, de la Fundación Hergé, suxurió, na conferencia alrodiu de Tintín que tuvo llugar nel Muséu Nacional Marítimu de Greenwich el 15 de mayu de 2004, que llegó a realizase un storyboard del álbum, asemeyáu al qu'esiste de Tintín y l'Arte Alfa, enantes que'l proyeutu terminara per refugase .[2] Supuestamente, esti storyboard caltiense nos Archivos Tintín.

Apenes se sabe nada alrodiu de la trama, anque se cree que l'acción desendólcase en Berlín.

Enllaces esternos[editar | editar la fonte]