Estación de radio militar de Pierre-sur-Haute

De Wikipedia
Saltar a navegación Saltar a la gueta
Estación de radio militar de Pierre-sur-Haute
La estación de radio militar de Pierre-sur-Haute. Vense les dos torres d'usu militar, nel centru'l repetidor de la Télédiffusion de France, los barracones militares y l'helipuertu.

La estación de radio militar de Pierre-sur-Haute ye un complexu de 30 hectárees (0,3 kilómetros cuadraos) utilizáu pa les comunicaciones de les Fuercies Armaes de Francia. Nel mesmu llugar allúgase tamién un repetidor d'usu civil operáu por Télédiffusion de France[1] y un radar de la Direction générale de l'Aviation civile. Les instalaciones tán allugaes en Pierre-sur-Haute, una elevación de 1634 metros d'altitú de los Montes de Forez, na parte norte del Macizu Central. Alministrativamente los terrenes tán repartíos ente les comuñes de Sauvain y Job, na frontera rexonal que dixebra los departamentos de Ródano-Alpes y Auvernia.

Historia[editar | editar la fonte]

En 1913 construyóse un telégrafu ópticu nos terrenes onde años después se llevantaríen les instalaciones militares. Anguaño caltiense namái un edificiu históricu, n'estáu de ruina, anque caltien el semáforu na so parte alta.[1]

En 1961, mientres la Guerra Fría, la OTAN solicitó al Exércitu francés que construyera una de les sos estaciones de la rede de tresmisiones n'Europa, el conocíu sistema ACE High. Nesta rede de tresmisiones por microondes, la estación de Pierre-sur-Haute (que'l so códigu yera FLYZ) tenía d'actuar como repetidor ente les estaciones de Lachens (FNIZ), nel sur, y Mont-Août (FADZ), al norte.[2][3] Emplegáronse cuatro tresmisores de 10 kW y dieciséis receptores. En 1974, la Fuercia Aerea Francesa tomó'l relevu na xestión de les instalaciones. En 1988 la OTAN empezó l'esmantelamientu del sistema ACE High.

Usu[editar | editar la fonte]

La estación de comunicaciones de Pierre-sur-Haute anguaño ta xestionada pola Fuercia Aerea Francesa, dependiendo de la Base Aérea de Lyon – Mont Verdun, a 80 kilómetros de distancia. Ye una de les cuatro estaciones de radio militares repartíes de norte a sur en Francia, en constante comunicación coles otres trés: Lacaune, Henrichemont y la base aérea de Rochefort.[4] El propósitu principal de la estación de radio ta rellacionáu coles tresmisiones de mandu d'unidaes operatives. Les órdenes a la Force de Frappe, qu'opera les armes nucleares de Francia, tendríen de pasar por estes estaciones repetidores en casu d'utilizase.[1]

La estación de radio ye parte del Commandement Air des Systèmes de Surveillance d'Information et de Communications (Comandu Aereu de Sistemes de Vixilancia d'Información y de Comunicaciones) dende la so creación el 1 de xunu de 1994; y darréu tamién, dende'l 1 de xineru de 2006, de la Direction interarmées des réseaux d'infrastructure et des systèmes d'information (Direición conxunta d'infraestructura de redes y sistemes d'información).[4]

La estación militar ta mandada por un mayor (suboficial de rangu OR-9 nel códigu OTAN). El personal militar permanente ye d'unos 20 soldaos, ente los qu'hai especialistes electricistes y mecánicos.[1]

Seguridá[editar | editar la fonte]

El perímetru de la estación de radio militar ta arrodiáu por un barganaz y una alambrada metálica. El personal militar y los emplegaos civiles apuerten a les instalaciones per helicópteru o per un camín asfaltáu de 4 kilómetros. Dicha vía ta cerrada al públicu.

Interés de los medios[editar | editar la fonte]

A primeros d'abril de 2013 la estación militar de radio atraxo l'interés de los medios dempués de conocese que l'axencia d'intelixencia francesa DCRI (Direction Générale de la Sécurité Intérieure: Direición Xeneral de Seguridá Interior) intentó suprimir l'artículu de la Wikipedia en francés que falaba sobre'l complexu, so'l pretestu de motivos de seguridá. La solicitú refugóse por cuenta de que tolos datos proveníen de medios públicos. Dempués d'ello, conocióse que la DCRI citara nes sos oficines a un bibliotecariu de Wikipedia en francés, Remy Mathis, pa facelo baxo l'amenaza de que, en casu de negase, sería encarceláu nel intre o multáu severamente. Tamién recibió l'amenaza de que cualquier wikipedista francés que volviera a redactalu sedría acusáu de los mesmos cargos. Esti desaniciólu; pero, después de dar avisu de los fechos, l'artículu foi recuperáu por una voluntaria suiza gracies a la vixilancia de la comunidá de Wikipedia.[5][6][7]

Referencies[editar | editar la fonte]

  1. 1,0 1,1 1,2 1,3 (en francés) La base militaire de Chalmazel. Télé Loire 7. 2004. http://www.tl7.fr/la-base-militaire-de-chalmazel-1981.html. Consultáu 'l 5 d'abril de 2013. 
  2. «Troposcatter Communication Networks» (30 de xunu de 2012). Consultáu'l 22 d'avientu de 2015.
  3. «Das ACE High System» (german). acehighsystemeurope (17 de febreru de 2013). Consultáu'l 22 d'avientu de 2015.
  4. 4,0 4,1 «Histoire succincte des "SSIC" (systèmes de surveillance, d'information et de communications) de l'armée de l'air». Association Nationale Air des Télécommunications et du Contrôle (30 de xunu de 2012).
  5. «French Intelligence Agency Forces Removal of Wikipedia Entry» (inglés). Slashdot. Consultáu'l 22 d'avientu de 2015.
  6. «La DCRI accusée d'avoir illégalement forcé la suppression d'un article de Wikipédia», artículuo en francés nel diariu Le Monde (París) del 6 d'abril de 2013.
  7. Martínez, Iván (15 d'abril de 2013). Wikipedia y la censura de los servicios secretos de Francia. eldiario.es. http://www.eldiario.es/turing/Wikipedia-Francia_0_121088689.html. Consultáu 'l 22 d'avientu de 2015. 

Enllaces esternos[editar | editar la fonte]

Coordenaes: 45°39′11″N 3°48′30″E / 45.653071°N 3.808447°E / 45.653071; 3.808447