Bandera de Timor Oriental

La bandera nacional de Timor Oriental (en portugués Bandeira de Timor-Leste) ye ún de los símbolos oficiales de Timor Oriental. La bandera ye collorada, con un triángulu isósceles de collor prietu, que tien la base nel llau del mástil una estrella blanca de cinco puntes nel centru, superpuestu sobre un triángulu isósceles mariellu de mayor tamañu, tamién basáu nel llau del mástil y estendíu hasta'l puntu central de la bandera.

Historia

La bandera de Timor Oriental ye oficial de magar 2002. Ye la mesma bandera que foi adoptada orixinalmente cuando'l país declaró la so independencia de Portugal en 1975, siete díes anantes de ser invadíu por Indonesia. Na medianueche del 19 de mayu de 2002, fecha d'aniciu del que ye de magar Día de la Independencia, arriose la bandera de les Naciones Xuníes ya izose la del nuevu país independiente, Timor Oriental.

Acordies cola constitución del país el triángulu mariellu (collor PMS 123 de la escala Pantone) representa "la güelga del colonialismu na historia de Timor Oriental". El triángulu prietu representa "l'oscurantismu que tien de ser vencíu", y la base collorada (PMS 485) representa "la llucha pola lliberación nacional". La estrella, o "lluz que guía", ye blanca pa representar la paz.

Descripción oficial de la bandera

La Constitución de la República Democrática de Timor Oriental establez na so parte I, nel artículu 15, que:

"1. La Bandera Nacional ye rectangular, y ta formada por dos triángulos isósceles de bases superpuestes, siendo un triángulu prietu con una altura igual a un terciu de la llonxitú que se superpon al mariellu, que tien una altura igual a la metá de la llonxitú de la bandera. Nel centru del triángulu de collor prietu hai una estrella blanca de cinco puntes, que simboliza la lluz que guía. La estrella blanca tien una de les sos puntes dirixida al estremu superior izquierdu de la bandera. El restu de la bandera ye de collor roxu. 2. Los collores representen: el mariellu, el rastru del colonialismu; el prietu, l'oscurantismu que tien de ser vencío; el mariellu, la llucha pola lliberación nacional; y el blancu la paz.".

Banderes históriques

• 
  La bandera de Portugal, na so forma adoptada en 1667, foi usada nel Timor portugués de 1702 a 1707.
• 
  La bandera de Portugal, na so forma adoptada en 1707, foi usada nel Timor portugués de 1707 a 1750.
• 
  La bandera de Portugal, na so forma adoptada en 1750, foi usada nel Timor portugués de 1750 a 1816.
• 
  La bandera de Portugal, na so forma adoptada en 1816, foi usada nel Timor portugués de 1816 a 1830.
• 
  La bandera de Portugal, na so forma adoptada en 1830, foi usada nel Timor portugués de 1830 a 1910.
• 
  La bandera de Portugal, na so forma adoptada en 1910, foi usada nel Timor portugués de 1910 a 1975.
• 
  Bandera de Xapón, usada nel país demientres la ocupación xaponesa del Timor portugués demientres la Segunda Guerra Mundial (1942–1945).
• 
  Bandera de guerra del exércitu imperial xaponés (1942–1945).
• 
  Enseña de la Marina Imperial xaponesa (1942–1945).
• 
  Estandarte del Emperador de Xapón (1942–1945).
• 
  Propuesta de 1965 pa l'adopción d'una bandera pal Timor portugués (nun foi oficial nunca).
• 
  Bandera usada tres de la declaración unilateral d'independencia, demientres los nueve díes que pasaron de la declaración a la invasión indonesia del país (28 de payares a 7 d'avientu de 1975).
• 
  Bandera de la provincia indonesia de Timor Timur, nome que recibió Timor Oriental demientres la ocupación indonesia (1976–1999).
• 
  Bandera de les Naciones Xuníes, usada demientres l'alministración del territoriu de Timor Oriental pola ONX (1999–2002).

Otres banderes

Bandera del CNRT

Los representantes de los partíos y organizaciones polítiques de Timor Oriental qu'acudieron a la Primera Convención Nacional de Timor Oriental, cellebrada en Portugal n'abril de 1998, suxirieran una bandera diferente, la del CNRT (Conselho Nacional de Resistência Timorense, Conseyu Nacional de la Resistencia Timorense). La popularida d'esta organización fizo qu'hobiera un consensu ente los participantes en la Convención p'adoptar la so bandera como una bandera oficial temporal pa Timor Oriental. Foi sustituyida pol diseñu anterior, el de 1975, en 2002.