Llerandi (parroquia)

Llerandi

Llerandi ye una parroquia del conceyu asturianu de Parres. Ocupa los 11,13 km² del estremu suroccidental del conceyu, y llenda: al norte cola parroquia de Viabañu, al este cola de Parres y La Güera Deu, al oeste cola de Los Montes y el conceyu de Piloña y al sur colos conceyos de Ponga, parroquia de Cazu y Amieva, parroquia de Sebarga. Tien una población de 107 habitantes (INE, 2013) repartíos ente los llugares de Cibidiellu, Llerandi y Priaes.

Nel llugar de Llerandi, asitiáu na fastera occidental de la xerra homónima, alcuéntrase la ilesia parroquial, consagrada a San Cosme. Llerandi alcuéntrase a 10 km de Les Arriondes capital del conceyu. La ilesia ta nel barriu nomáu La Llomba'l Trabe y foi construyida en 1952 dempués de que l'anterior quemárase demientres la Guerra Civil con capital indianu y de los vecinos. Amás d'ella, podemos alcontrar nesti núcleu, sodividíu nos barrios de Bon, Viesques, La Teyera, El Caleru, El Colláu, Cimalavilla, La Fuentina, La Portiella, El Regueru, Friera, La Llosiquina, La Llinariega, La Ruñada, La Pinganiella, San Cosme, La Llomba`l Trabe, Solería, L'Argumal y La Llosa'l Ríu, bonos exemplos de casones tradicionales, magar que n'estáu ruinosu munches d'elles, y un bon númberu d' horros.