Eduardo Arrojo Martínez

Amestar enllaces
De Wikipedia
Eduardo Arrojo Martínez
Vida
Nacimientu Avilés, 1952 (71/72 años)
Nacionalidá España
Cambiar los datos en Wikidata

Eduardo Arrojo Martínez (1952, Avilés) ye un políticu asturianu del PSOE.

Biografía[editar | editar la fonte]

Nació en 1952 na llocalidá asturiana d'Avilés. Estudió Ciencies Económiques na Universidá Complutense de Madrid, darréu trabayó nel Serviciu d'Estudios del Ministeriu d'Industria y Enerxía y dempués ingresó por oposición nel cuerpu d'Inspectores Financieros y Tributarios del Estáu, con destín na Delegación de Facienda de Madrid. Foi amás profesor de Teoría Económica nel ICADE y participó na Comisión d'Estudiu y Valoración del Patrimoniu Sindical y Históricu de la Unión Xeneral de Trabayadores (UXT).[1]

Conseyeru de Facienda y Economía[editar | editar la fonte]

El 18 de xunu de 1983 foi nomáu Conseyeru de Facienda y Economía nel primer gobiernu autonómicu asturianu, dirixíu pol socialista Pedro de Silva.[2] Dexó'l cargu en septiembre de 1986 en siendo nomáu Secretariu Xeneral d'Asistencia Sanitaria, dependiente del Ministeriu de Sanidá, entós dirixíu por Julián García Vargas, so la presidencia de Felipe González.[3]

Secretariu Xeneral d'Asistencia Sanitaria[editar | editar la fonte]

Eduardo Arrojo foi, dende 1986 hasta 1989, Secretariu Xeneral d'Asistencia Sanitaria, una secretaria creada explícitamente para xestionar l'aplicación de la Llei 14/1986 Xeneral de Sanidá, que garantizaba asistencia sanitaria universal a nacionales y estranxeros n'España.

Arrojo foi nomáu col enfotu de dotar al Institutu Nacional de la Salú (INSALUD) d'una estructura empresarial. Sería l'encargáu de temes económicu-financieros, de personal y de producción.[3]

El gobiernu destituyó-y en 1989, tres completase'l procesu de universalización de l'atención sanitaria y la creación del actual Sistema Nacional de Salú. Foi unu de los artífices del cambéu nel sistema de financiamientu de la sanidá n'España, que dende entós ta financiáu mayoritariamente pol Estáu.[4]

Empresa privada[editar | editar la fonte]

Foi director de la división d'hospitales de Sacyr y en 2009 foi nomáu director xeneral d'Aucalsa, la empresa concesionaria de l'autopista del Güerna, A-66, que conecta Llión con Asturies.[1][5]

Referencies[editar | editar la fonte]

  1. ↑ 1,0 1,1 Cuartas, Javier (10/07/2009). «El ex consejero de Economía Eduardo Arrojo, nuevo director general de Aucalsa, concesionaria del Huerna» (castellanu). La Nueva España. Consultáu'l 24/11/2020.
  2. ↑ Fuente, Carlos (21/06/1983). «Pedro de Silva mantiene a 5 de los 10 consejeros del anterior Gobierno de Asturias» (castellanu). El País. Consultáu'l 24/11/2020.
  3. ↑ 3,0 3,1 «Eduardo Arrojo será nombrado secretario general de Asistencia Sanitaria» (castellanu). El País (18/09/1986). Consultáu'l 24/11/2020.
  4. ↑ Criado, Azucena (16/12/1989). «El Gobierno destituye a Arrojo, responsable de asistencia sanitaria» (castellanu). El País. Consultáu'l 24/11/2020.
  5. ↑ «El asturiano Eduardo Arrojo, nuevo director general de Aucalsa» (castellanu). El Comercio (10/07/2009). Consultáu'l 24/11/2020.
Sacáu de «https://ast.wikipedia.org/w/index.php?title=Eduardo_Arrojo_Martínez&oldid=3603764»