Deontoloxía profesional

De Wikipedia

El términu deontoloxía profesional fai referencia al conxuntu de principios y regles étiques que regulen y guíen una actividá profesional. Estes normes son les que determinen los deberes mínimamente exixibles a los profesionales nel desempeñu de la su actividá. Por esti motivu, suelen emanar del propiu coleutivu profesional, quienes se encarguen de recoxelos por escrito nos códigos deontolóxicos. A día de güei, práuticamente toles profesiones desarrollaron los sos propios códigos y, nesti sen, pue falase de una deontoloxía profesional periodística, de una deontoloxía profesional médica, deontoloxía profesional de los abogaos, etc. Ye importante nun confundir deontoloxía profesional con ética profesional. Cabe distinguir, que la ética profesional ye la disciplina qu'estudia los conteníos normativos de un coleutivu profesional, ye dicir, el so oxetu d'estudiu ye la deontoloxía profesional, mientres que, tal como se apuntaba al comienzu del artículu, la deontoloxía profesional ye'l conxuntu de normes vinculantes pa un coleutivu profesional.

Introducción[editar | editar la fonte]

A lo llargo de la historia hubo diverses menes d'entender la ética y distintes propuestes morales consideraes como orientadores de la vida humana. Ye posible dicir que la Ética ye una parte de la Filosofía Práutica que se ocupa del fechu moral y de los problemas filosóficos que nacen de la conducta humana. La ética por tanto nun inventa la vida moral sinón que se llimita a reflexionar sobre ella. Dende la perspeutiva del discursu moral esiste la presunción, amás, de que el ser humanu ye llibre. Esta consideración dexa abiertu'l campu de posibilidaes d'actuación de los seres humanos y nel exerciciu d'esa llibertá prodúcense confliutos que constituyen la clave de la vida moral y sobre los que la ética, como reflexión teórica, trata de dar lluz, pa encauzar adecuadamente la praxis, la aición humana. Por otra parte, les profesiones tán conociendo un auxe innegable nos nuesos díes. Les profesiones y l'exerciciu profesional representen una ocasión pa que los propios miembros del coleutivu expliciten los llazos morales que la so actuación tien col Bien Común. L'exerciciu profesional ye un de los principales llugares nos que se xuega el despliegue de les potencialidaes del individuu y, al tiempu, un campu de problemes morales y dilemas éticos. Tou profesional tien derechos y obligaciones, ta y debe tar sometiu a controles sociales más o menos rigurosos y esixen-y responsabilidaes de perdistintes en rellación colos sos actos. Independientemente de la propia conciencia, que debiere ser quien más rixiera'l cumplimientu de los códigos morales, existe la figura de Los colexos profesionales pa mantener, promover y defender la deontoloxía. Vixilen el cumplimientu de determinaos niveles de exixencia, de competencia y de calidá nel desempeñu del trabayu de los sos colexaos. La deontoloxía ye de sumu interés pal mundu profesional, y en concreto, pa profesiones que comporten elevada responsabilidá social (médicos, abogaos, docentes, psicólogos, periodistas…), y vien a desarrollase buscando un equilibriu ente un determinau estilu de vida moral (lo qu'enantes denominábemos êthos o caráuter moral) y un alto nivel de profesionalidá téunico-científica. Esta doble dimensión de toa profesión (la moral y la téunica) tien que vivise con armonía y equilibriu pa una mayor dignificación de cualquier actividá laboral. Les normes deontolóxiques son incomprensibles ensin la referencia al contextu o grupu social nel que son obligatories. La obligación circunscríbese a esi grupu, fuera del cual pierden la obligatoriedá. La deontoloxía profesional tien un caráuter heterónomu, nel sen de que los suxetos creadores de les normes deontolóxiques son externos y diferentes a los destinatarios de les mismes.

Orixe del conceutu[editar | editar la fonte]

El términu deontoloxía procede del griegu: to deon (lo conveniente, lo debido) y loxía (conocimientu, estudiu…); lo que significa, en términos xenerales, l'estudiu o la ciencia de lo debío. L'oxetu d'estudiu de la Deontoloxía son los fundamentos del deber y les normes morales. El conceutu de deontoloxía fpo acuñau por Jeremías Bentham na so obra Deontoloxía o ciencia de la moral, onde ofrez una visión novedosa d'esta disciplina. Pa Bentham, la deontoloxía aplícase fundamentalmente al ámbitu de la moral; ye dicir, a aquelles conductes del home que nun formen parte de les hipótesis normatives del drechu vixente, aquelles aiciones que nun tan someties al control de la llexislación pública. Lo cual suxiérenos una de les intenciones de la redaición de los códigos deontolóxicos de les diverses profesiones: explicitar la dimensión estrictamente moral d'una profesión, aquellos comportamientos exixibles a unos profesionales, aunque nun ten dellimitados xurídicamente, o quiciabes, por ello mesmo. Bentham considera que la base de la deontoloxía ye l'utilitarismu, lo que significa que los actos de les persones considérense buenos o malos en función de la felicidá que puedan xenerar. Según esti marcu teóricu, el fin de una aición debe ser consiguir la máxima felicidá pal mayor númberu de persones. D'esti mou, toa aición que conduza a esi fin, será aceptada como moralmente correuta. ¿Qué ye aquello a lo que podemos denominar bien en sí o bien incondicional? Nel nuesu contextu sociocultural actual, ye la dignidá de cada persona, que debe ser admitida y garantizada xurídicamente y defendida políticamente. La dignidá ye aquello que debe constituir el nucleu principal de toa ética filosófica y de toda deontoloxía profesional que se precie. Emmanuel Derieux sostuvo que gracies a la deontoloxía, la ética profesional adquier un reconocimientu públicu; y ye que la moral individual faise trascendente nel campu de la profesión. La deontoloxía surde como una disciplina que se ocupa de concretar normes nel ámbitu profesional pa alcanzar unos fines.

Deontoloxía y Ética profesional[editar | editar la fonte]

Estos dos términos suelen usase como sinónimos, pero nun lo son. Ye importante destacar les principales diferencies entrambos:

DEONTOLOXÍA PROFESIONAL:

-Orientada al deber.

-Recoyida en normes y códigos "deontolóxicos".

-Eses normes y códigos son mínimos y aprobaos polos profesionales d'un determináu coleutivu profesional (periodistas, médicos, abogaos,...).

-Ubícase ente la moral y el drechu.

ÉTICA PROFESIONAL:

-Orientada al bien, a lo bueno.

-Nun se encuentra recoxida en normes nin en códigos deontolóxicos, ta rellacionada colo que piensa el propiu individuu (conciencia individual/profesional).

-Nun ye exixible a los profesionales d'un determináu coleutivu (periodistas, médicos, abogados, ...) -Parte de la ética aplicada.

La concencia profesional[editar | editar la fonte]

La concencia humana ye individual, pero tien varies dimensiones: la concencia reflexiva (porque ye consciente de sí mesma) y la concencia ética, qu'añade a la concencia individual la condición de ser, amás, una concencia responsable. Ye dicir, que cola primera caún rellaciónase coles demás, pero la concencia ética responsabilízanos na forma de tratu hacia eses otres persones. Amás d'estes dos hai una clas de concencia más, constituida como un conceutu mui importante rellacionau cola deontoloxía profesional: la concencia profesional. La concencia profesional ye una dimensión esencial de la concencia ética, a la que añade la responsabilidá que cada persona tien. Manifiéstase nun comportamientu socialmente responsable acerca de los deberes específicos de una profesión dempués de haber interiorizao, asumío y personalizao un códigu de valores referentes a dicha profesión, pa dempués analizar, aplicar y resolver problemas específicos de la profesión cola meyor competencia y rectitú posibles y socialmente exixibles. Puese falar de cuatro niveles de la concencia profesional:

1) La concencia profesional ye intransferible e individual, nadie ye responsable por ninguna otra persona.

2) Nivel de los deberes específicos, aprendíoos, asumíos y personalizaos por socialización ética. Cada persona tien que habese socializao nel códigu deontolóxicu de la so profesión.

3) Nivel de madurez y equilibriu psíquicu. Pa que la concencia profesional puea funcionar hai que gozar d'un grau de madurez mínimu.

4) Aptitú profesional pal exerciciu dignu d'una profesión.

Teoría de Parsons[editar | editar la fonte]

Parsons estudia la concencia profesional nuna perspeutiva qu'analiza la socioloxía de la ética de les profesiones. Pa Parsons, profesional ye aquel expertu que nun se dedica al so lucro profesional, sinón a la realización de servicios sociales pa los sos clientes, o prestando serviciu a valores impersonales tales como'l progresu de la ciencia. Les profesiones distínguense pol "desinterés". Parsons establez cuatro finalidaes d'una profesión:

1) El profesional cultiva la racionalidá. Lo que busca ofrecer al cliente ye una verdá oxetiva científica.

2) Esto implica la formulación de autointerrogase responsablemente estes dos cuestiones: a) ¿Cuál ye la forma más eficaz de realizar la mio tarea? b) ¿Cuál ye la mejor fórmula que debo emplegar pa qu'en cada situación dea respuesta a la demanda de los mios clientes? ¿Cómo debo oponeme a fórmulas alternatives pa que'l cliente nunviva del engañu comunicacional?

3) El profesional tien autoridá ante'l so cliente, ante otros profesionales ya incluso ante los poderes públicos. La autoridá fai que represente na sociedá un estáu de competencia téunica. Sólo él pue dar órdenes, aconseyar ya imponer el so criteriu. Esiste tamién la especificidáfuncional, esto ye, el cliente sabe a quién recurre cuando necesita d'un profesional, y esti debe-y una gran responsabilidá, respetando unos llímites ente profesional y cliente.

4) Control social. El profesional representa un mecanismu de control social, de tal forma que, nel so campu, son los que puen resolver problemas, los que puen controlar a los pacientes. Na sociedá hai cuatro tipos de control: a) Control llegal. b) Control moral o éticu. c) Control social, que Parsons establez como'l más importante d'una sociedá. d) Control profesional.

Colexos profesionales[editar | editar la fonte]

Los códigos deontolóxicos nel nuesu país, son elaboraos polos Colexos Profesionales que, tal como los define la llei, “son corporaciones de drechu públicu, amparaes pola ley y reconocies pol Estáu, con personalidá xurídica propia y plena capacidá pal cumplimientu de los sos fines, ente los que s'atopa la ordenación del exerciciu de les profesiones”. Nel casu de les profesiones que requieren colexación profesional, por exemplu, la abogacía y la medicina, sí esiste una institucionalización de la sanción, como nel casu del drechu. Pero hai profesiones, como'l periodismu, que s'exercen ensin colexación obligatoria. Nestos casos, l'incumplimientu de les normes deontolóxiques lleva consigo una sanción asemeyada a la que-y corresponde a la vulneración de les normes morales: mala imagen pública, reproche, expulsión del grupu, etc. Esto les diferencia de les normes xurídiques, caracterizaes pola institucionalización de la sanción. Ello nun implica falta de gravedá. Un profesional pue considerar de mayor gravedá una sanción por infraición del códigu de deontoloxía profesional qu'una sanción alministrativa.

Autorregulación[editar | editar la fonte]

La deontoloxía ye un de los tres órdenes normativos que regulen l'exerciciu de les profesiones, junto al Drechu y la moral. Cabe señalar que les normes deontolóxiques atópense a mediu camín entrambos órdenes normativos, hasta'l puntu que dependiendo de les circunstancies históriques la deontoloxía profesional inclínase más hacia ún llau u otro. La carauterística de la deontoloxía ye que tien un fuerte componente de autorregulación, entendía nun sentido coleutivu. Trátase d'una interiorización de les normes propies de la to profesión. Diferenciaríase del Drechu en que ésti ye creau pol Estáu, y de la moral en que la deontoloxía tien un caráuter coleutivu, nun se basa nos principios individuales. Otra diferencia clave frente al Drechu, ye que ésti tien un marcáu caráuter coactivu, impón sanciones al incumplimientu de les sos normes. Mentanto que la deontoloxía pue o non incluir sanciones, y siempre serán menos graves que les rellacionaes col Drechu (surdíes de institucionesxurídiques). La deontoloxía pue institucionalizase al traviés de los Códigos Deontolóxicos, la colexación... (instrumentos o mecanismos que doten de más efectividá ya institucionalización a la deontoloxía), pero siempres presenta una institucionalización muncho menor a la del Drechu. Les normes del Drechu son "ayenes" al mesmu, creaes por fuentes esternes, mientres que lo carauterístico de la deontoloxía profesional ye la autorregulación. Los profesionales son creadores, suxetos y oxetos de les normes deontolóxiques de la so profesión correspondiente. Participen (al traviés de les sos asociaciones, por exemplu) na creación de los códigos deontolóxicos que, a la so vegada, deberán aplicar.

Referencies[editar | editar la fonte]

Enllaces esternos[editar | editar la fonte]