De sexu plantarum epistola

De sexu plantarum epistola
	obra escrita
Datos
Autor	Rudolf Jakob Camerarius (es)

De sexu plantarum epistola («Epístola sobre'l sexu de les plantes») ye una obra escrita por Rudolf Jakob Camerarius, publicada en 1694, que marca'l descubrimientu de la reproducción sexual nes plantes. La comprobación de la esistencia de sexualidá nes plantes foi un descubrimientu científicu fundamental, non solo pa la Botánica, sinón pa tola Bioloxía, yá que demostró la esistencia de fenómenos fisiolóxicos comunes a les plantes y a los animales.

La obra ye una carta de 80 páxines escrita en llatín por Camerarius, Profesor de Medicina y direutor del xardín botánicu de Tubinga (Alemaña), y empobinada al científicu Valentinus, profesor de Medicina en Giessen. De primeres, Camerarius revisó tola lliteratura esistente alrodiu de la reproducción de les plantes, les que dende los tiempos de Aristóteles yeren consideraes entidaes asexuaes, pa depués concentrase na estructura de la flor. Asina, describió la estructura básica d'esi órganu en distintes families de plantes ysobremanera, punxo especial atención al polen producíu poles anteres y al pistilu, que lleva los óvulos. Al traviés de les sos observaciones de flores hermafrodites y aquelles que producen les especies dioicas, Camerarius razonó que nestes últimes especies nes que les anteres y los pistilos tópense separaos, el polen tenía de ser tresportáu dende les anteres hasta'l pistilu por que se produzan les granes. Dedució, amás, que les especies dioiques yeren los organismos fayadizos pa poder comprobar el so hipótesis. Trabayando con plantes de los xéneros Morus, Mercurialis y Zea, demostró que les plantes femenines cultivaes n'aislamientu d'otres plantes nun producíen frutos nin granes. Amás, reparó que si s'esaniciaben les inflorescencies que lleven les anteres de les plantes de maíz (Zea) (esto ye, nun hai fonte de polen) la planta tampoco producía granes.

Esti trabayu tuvo gran trescendencia yá que punxo n'evidencia'l calter sexual de les flores, órganos qu'a partir d'entós adquiriríen gran importancia como criteriu na clasificación de les plantes. Cola idea de Camerarius sobre la sexualidá de les flores empecipió la obra d'unu de los botánicos más influyentes nel desenvolvimientu posterior de la ciencia de los vexetales: Carlos Linneo.

Ver tamién[editar | editar la fonte]

Bibliografía[editar | editar la fonte]

V. Žárský, J. Tupý. 1995. A missed anniversary: 300 years after Rudolf Jacob Camerarius' “De sexu plantarum epistola’. Sexual Plant Reproduction 8: 375- 376 DOI 10.1007/BF00243206

Referencies[editar | editar la fonte]

Enllaces esternos[editar | editar la fonte]

Wikimedia Commons tien conteníu multimedia tocante a De sexu plantarum epistola.