Carretera ensin barru

Carretera ensin barru
novela
Datos
Autor	Naciu Varillas
Llingua de la obra	asturianu
Editorial orixinal	Ediciones Trabe
ISBN	ISBN 978-84-8053-379-9
Premios	Premiu de la Crítica d'Asturies  (2005)

Carretera ensin barru ye la primer novela del periodista y escritor Naciu Varillas (Xixón, 1975). La obra compónse d'una historia principal que tien rellación con siete rellatos que funcionen por sí solos. La novela ye una de les más vendíes de les letres asturianes y la empresa editora, Ediciones Trabe, publicó una segunda edición seis meses depués de que fora espublizada la primera, dalgo que nunca pasara con un llibru publicáu n'asturianu.

Argumentu

L’indianu Ánxel Santianes de Rozada nunca pensara que diba perder la segunda de les apuestes qu'echara col so collaciu Carlos al salir de casa pa facer les amériques. Tampoco que diba acabar morriendo en medio l'océanu ensin tornar a Les Ablanales, el pueblu que lu viera ñacer, pa disfrutar de la casería que lu taba esperando y que se mercara coles perres que fuera mandando. Y muncho menos que la so muerte diba trayer una maldición pa tolos sos descendientes, hasta los díes d'anguaño.

Temes

Con una prosa áxil, cenciella y fresca, Naciu Varillas compón una novela ambiciosa, na que’l desaniciu del mundu rural ye l'asuntu central. Al rodiu d'Ana, una moza que torna dende Madrid a Les Ablanales naguando por afayar dalgo que-y dea sentíu a la so vida, vamos dir conociendo una bayura personaxes bien perfilaos y el so enfrentamientu colos planes urbanísticos que quieren destruyir el pueblu y la so forma de vida, hasta acabar nuna espiral d'amor, llocura, incestu y ambiciones qu'algama un final inesperáu.

Una novela moderna, que trata un tema de rabiosa actualidá, pero práuticamente escaecíu hasta agora na nuestra narrativa, entevenada con un puñáu de cuentos que nun son un añadíu más pol caprichu del autor, sinón que van dir apurriéndomos delles claves pa entender la hestoria principal.

Enllaces esternos

• Wikimedia Commons tien conteníu multimedia tocante a Carretera ensin barru.

• Datos: Q13146878