Carrera de llecheres

De Wikipedia
Saltar a navegación Saltar a la gueta

La carrera de llecheres ye un deporte tradicional asturianu. Trátase de facer un recorríu con dos pesos iguales, ún en cada mano, a un circuitu previamente estipuláu. Nos campeonatos ye de 25 metros de llargor polo que cada vuelta que da el corredor fai 50 metros.

Fundamentu del xuegu[editar | editar la fonte]

Consiste en tresportar dos llecheres (peses), una en cada mano, dando vueltes nun circuitu y ensin tiempu limitáu. Tamién pue facese nun tiempu qu'acordie la organización. Gana'l xugador que más distancia percuerra.

Elementos del xuegu[editar | editar la fonte]

  • El campu: La midida de la zona de xuegu sedrá de 25 metros de llargor. La salida y la llegada tarán marcaes por dos llinies paraleles ente sí de 5 cm d'anchor por un metru de llargor, ente elles fadránse marques en cada metru.
  • Les llecheres: Les llecheres sedrán dos, puen ser de fundición o un tochu de fierro macizu fabricaes n'esclusive pa esti xuegu. Esceicionalmente almitiránse llecheres distintes a les indicaes enantes.

El xuegu[editar | editar la fonte]

  • Artículu primeru: Nos Campeonatos procederáse a sortéu pa determinar l'orde d'actuación.
  • Artículu segundu: Al glayíu de “¡preparaos!”, l'atleta habrá ponese en posición de salida, colos pies na marca de salida, ensin sobrepasala y coles manes nes llecheres. Al xiblíu habrá garrales y apenzará correr.
  • Artículu terceru: El corredor ha tocar con cualesquier de los pies o arrodiar pel esterior les marques de salida y torna, pa que'l percorríu seya valible.
  • Artículu cuartu: Los participantes dirán al pasu que-yos convenga, puen llegar a aparase, pero nunca nun puen dexar les llecheres en suelu. Tresgredir esti artículu ye motivu de descalificación.
  • Artículu quintu: Queda prohibío so pena de descalificación sofitar una o entrambes llecheres en dalguna parte'l cuerpu.
  • Artículu sestu: Nun s'almite'l trabayu fechu si'l xugador llanza p'alantre les llecheres o fai qu'estes rueden, nesti casu descalificaráse.
  • Artículu sétimu: En finando l'actuación, la organización encargaráse d'asitiar les llecheres nel puntu salida.
  • Artículu octavu: Xeneralmente, nun va haber retrasos perriba los tres minutos ente'l momentu en que fine un corredor y entame'l siguiente.
  • Artículu nonu: Va haber dos árbitros:
    • L'árbitru de salida, sedrá'l que controle'’l tiempu, durante los últimos 15 segundos colocarase dando'l llombu al tarrén de xuegu, pasáu'l tiempu xiblará.
    • L'árbitru de torna cuntará les vegaes que'l corredor pasa pola so marca. Na postrer vuelta dirá al delláu del deportista cola fin de marcar el llugar esautu au posa les llecheres.
  • Artículu décimu: La midición fadráse hasta la señal que dexe la primer llechera que l'atleta pose en suelu que-y caya. Tomaráse como puntu midición la parte más avanzada de la marca (que correspuenda a la bas de la llechera).
  • Artículu oncenu: Les manes de tolos concursantes habrán tar llimpies de tou productu a esceición de la magnesia.
  • Artículu docenu: Si'l participante quier competir con unes llecheres de la so propiedá, va poder facelo siempres que les mesmes cumplan les midíes reglamentaries no que cinca a pesu y seyan cilíndriques, y la organización-yos dea'l preste enantes del sortéu. Estes llecheres habrán tar a disposición del restu deportistes.

Propuesta d'adaptaciones didáctiques[editar | editar la fonte]

  • Adaptar el circuitu al terrén que se tien
  • Propuesta de pesos:
categoría Neñes Neños
Alevines
(10-11 años)
2 Kg 2 Kg
Infantiles
(12-13 años)
3 Kg 4 Kg
Cadetes
(14-15 años)
4 Kg 6 Kg
  • Unes garrafes de les d'agua mineral puen facer de llecheres, amás que se puede xugar colos pesos enllenándoles más d'agua o quitándo-yosla*