Bowling

De Wikipedia
Saltar a: navegación, buscar
Bowling
Bowling pictogram.svg
Pictograma del bowling nos Xuegos Olímpicos.
Autoridá deportiva Fédération Internationale deas Quilleurs
Otros nomes Bolos, boliche
Carauterístiques
Categoría Espacios Zarraos
Pelota Con forma esférica, tien trés furacos pa sostenela.
Formatu del puntaxe Máx. 300
Meta Tratar de faer chuzas o strikes valtando bolos o pines.
Olímpicu Deporte convidáu nunos xuegos olímpicos
[editar datos en Wikidata]
Bolera.
Boles de bowling. El númberu señala'l so pesu en llibres.

El bolu americanu, boliche o bowling ye un deporte de salón que consiste en valtar un conxuntu de pieces de madera (llamaos bolos, pinos o palitroques) por aciu el llanzamientu d'una pesada bola contra ellos. A diferencia d'otres modalidaes de xuegos de bolos, n'ésta, la bola rueda o s'esmuz y nun se llanza al aire. La pista tien unes dimensiones de 19,20 metros de llongura por 1,06m d'ancho y una zona d'aproximamientu a lo menos de 4,60 metros. La construcción de la mesma antes facíase con llistones de madera de pládanu americanu con un anchu de 39 llistones de 27,17 milímetros. Anguaño utilícense pistes sintétiques, asemeyando les llinies de los llistones que sirven de referencia a'l xugadores nos sos llanzamientos. La bola ye esférica y dispon de tres furacos de forma que pueda ser tomada con poca fuerza. El pesu d'esta bola suel tar ente les 9 y les 16 llibres (aproximao ente 4,08 y 7,25 kilogramos) y el so diámetru ye de 218,3 milímetros.

Historia[editar | editar la fonte]

Les formes más primitives de boliche puede ser dataes nel antiguu Exiptu y l'imperiu romanu. Fai 2000 años un xuegu asemeyáu evolucionó ente les lexones romanes, ésti implicaba llanzar oxetos de piedra tan cerca como fuera posible d'otros. Esti xuegu fíxose popular ente soldaos romanos, y finalmente evolucionó nel bocce italianu.

Les primeres regles estandarizaes pa boliche fueron establecíes na ciudá de Nueva York el 9 de setiembre de 1894, 50 años dempués de la llegada a esos llugares. Anguaño esti deporte ye esfrutáu por 95 millones de persones en más de noventa paises alredor del mundu, y siguió la so crecedera al traviés del entretenimientu electrónicu como los videuxuegos.

Partida[editar | editar la fonte]

Diagrama de la distribución de los bolos (pinos).

Una partida típica de bolos consiste en 10 xuegos o tiraes onde cada xuegu consta de dos llanzamientos nun siendo que se realice un plenu (o strike o chuza o moñona, valtar los 10 bolos con un solu tiru de la bola), y nesi casu nun se vuelve llanzar nesi xuegu. En dellos tipos del xuegu cunta'l plenu con 15 puntos y el semi-plenu con 13. L'últimu xuegu ye especial, yá que, dependiendo de les resultancies de los llanzamientos nel xuegu anterior, puede optase a unu o dos llanzamientos estra. Ésti produciráse nel casu de consiguir llanzar nel décimu xuegu tolos bolos de dos tiraes (semiplenu o spare) o una tirada (plenu o strike), respeutivamente.

Los bolos (en total 10), tán asitiaos equidistantes unos d'otros a 30,5 cm, a la fin de la pista, en forma de triángulu equilláteru.

Pa competir precísase un mínimu de dos xugadores y caún d'ellos nos llanzamientos va intentar valtar el mayor númberu de bolos o pines posibles.

Hai una xugada denominada split, furacu, cuernos o banderilles, que consiste en que remanezan de pie dos o más bolos (el bolu 1 ten de valtase) a una distancia mínima d'un bolu ente cualesquiera d'ellos (por exemplu, los bolos 7-10, considerada la más malo de realizar,[1] yá que s'atopen a cada estremu de la pista). Nel marcador, el Split señálase con un círculu enriba del númberu de bolos valtaos nesi llanzamientu.

Forma de tirar la bola[editar | editar la fonte]

Allugamientu.
Primer pasu.
Segundu pasu.
Tercer pasu.
Cuartu pasu.

Allugamientu[editar | editar la fonte]

Asitiase a unos cuatro pasos de la llinia de falta. Sostener la bola coles dos manes a un altor cómodu ente la cintura y el pechu, col brazu n'ángulu rectu y en llinia col costazu.

Pasos[editar | editar la fonte]

De vezu son cuatro pasos. Pa una persona diestra, son los indicaos embaxo. Una persona maniega tien de faer la conversión correspondiente.

Llanzamientu.

Primer pasu[editar | editar la fonte]

Avanzar el primer pasu col pie derechu mientres s'alloña la bola del cuerpu escontra alantre coles dos manes, siempres mirando escontra l'oxetivu deseáu; puede ser la flecha o'l puntu específicu per onde se quier qu'ésta pase.

Segundu pasu[editar | editar la fonte]

Ensin retirar la mirada del oxetivu, banciar escontra baxo la bola, cola mano que la sostien, en movimientu pendular, al empar que'l pie contrariu muévese alantre en llinia reuta.

Tercer pasu[editar | editar la fonte]

Ensin quitar los güeyos del oxetivu, avanzar el pie derechu y, siguiendo'l movimientu pendular, banciar la bola escontra atrás hasta'l so puntu más altu.

Cuartu pasu[editar | editar la fonte]

Ensin quitar la mirada del oxetivu, caltener los costazos paralelos a la llinia de falta. Esmucir escontra alantre'l pie esquierdu, flexonando la rodía esquierda. Dexar que la bola siga'l so valumbu escontra baxo y soltala cuando llegue al altor del pie. Siguir el movimientu del brazu escontra alantre na dirección que se-y quier dar a la bola y finalmente escontra riba hasta l'altor de la cabeza.

Sistema de puntuación[editar | editar la fonte]

Posición de los bolos.

Per cada bolu valtáu va sumase un puntu al marcador del xugador siempres y cuando nun se dean les siguientes circunstancies:

  • Valtar tolos bolos nel primer llanzamientu d'un xuegu. A esta xugada suélse-y llamar strike (plenu, moñona, o chuza) y represéntase nel marcador con una X. Nesti casu'l xugador nun va poder utilizar el so segundu llanzamientu del xuegu. van sumase diez puntos, más los puntos totales que se consigan nos dos siguientes llanzamientos de bola.
  • Valtar tolos bolos utilizando los dos llanzamientos del xuegu. A esta xugada llámase spare, mediu strike, semiplenu, media chuza, o a cencielles media. Represéntase nel marcador con una /. Nesti casu sumaránse diez puntos más los que se consigan nel siguiente llanzamientu de bola.

La máxima puntuación posible ye 300 puntos, y pa consiguilo necesítase consiguir 12 strikes dafechu (de la tirada 1 a la 10 y los dos tiros correspondientes).

Si'l xugador triya o traviesa la llinia de falta, anótase-y un cero nel marcador de la tirada, sía nel primer o nel segundu llanzamientu.

Por casu: nel so primer llanzamientu faese strike (X), nel segundu llanzamientu faese strike nuevamente (X), nel primer llanzamientu sumen 10 bolos más los que se consigan nos dos tiros posteriores, (30 bolos si se consiguen 3 strikes siguíos - esi ye'l máximu por partida), agora si nel segundu llanzamientu en cuenta de consiguir otru strike (X) se consigue un spare (/) nel primer tiru llévense acumulaos 20 bolos.

Agora si nel primer llanzamientu o en cualquier llanzamientu (nun tien que ser específicamente'l primeru) consíguese spare, (por exemplu: si se valten nun tiru (9) y llueu el bolu que quedó (/) va consiguise el spare (9/), esto quier dicir que se valtaron 10 bolos, y a esos 10 bolos súmense lo que se faiga nel próximu llanzamientu; Si nel próximu llanzamientu valten (8) bolos, nel caxellu onde se marcó esi (9/) van asitiase (18) bolos como puntuación.

A partir de 200 bolos, considérase una bona puntuación en Bowling; de 180 pa riba, un xuegu normal, y de 180 escontra baxo puede considerase como una mala partida.

Hai qu'apuntar qu'estos rangos de puntuación refiérense a un prauticante frecuente del xuegu. Pa un xugador profesional una puntuación de más de 200 ye considerada como normal o promediu, mentanto qu'un principiante nun puntuara de vezu más de 150. Y pa un xugador que tenga esti deporte como pasatiempu, llograr una puntuación de 100 o menos va ser más que satisfactoriu.

Equipamientu[editar | editar la fonte]

Zapatos[editar | editar la fonte]

Los zapatos de bowling son una parte imprescindible del equipamientu, la razón ye que nenguna bolera permite l'usu de calzáu de cai pa xugar porque les pistes suelen ser delicaes y podríen estropiase. Los zapatos de bowling tienen una suela especial que permite l'esnidiamientu del pie esquierdu (en xugadores diestros) nel llanzamientu, ente que frena'l pie derechu pa nun esnidiar.

En zapatos de gama alta esiste la posibilidá d'intercambiar suela y tacones, de forma que puede escoyese el qu'ufierte'l meyor esnidiamientu en cada bolera. Cada bolera puede tener distintes condiciones d'esnidiamientu según la zona (si ye más seca o húmeda), pola temperatura, según los productos de llimpieza que s'usen na zona d'aproximamientu.[2] Esiste una gran variedá de marques en zapatos pa bowling.

Boles[editar | editar la fonte]

Artículu principal: Bola de Bowling

Hai dos tipos básicos de boles: boles reactives y boles de remate (o de spare).[3]

Boles de remate[editar | editar la fonte]

Les boles de remate tán feches d'un material plástico y nun suelen coyer efectu al ser llanzaes, lo que les fai ideales pa llanzar rectu independientemente de les condiciones d'esnidiamientu de la pista. Suelen utilizase cuando se debe realizar el segundu tiru y queden unu o dos bolos.

Les boles propies de la bolera (house) suelen ser boles de remate.

Boles reactives[editar | editar la fonte]

Les boles reactives son les que suelen usase pa realizar el primer tiru. Estes boles cueyen efectu al llanzase, lo que dexa aumentar les posibilidaes de facer un plenu al atacar los bolos con un determináuu ángulu. La forma de la curva y la fuerza de xiru de la bola dependen de munchos factores, dellos esternos como la técnica de llanzamientu y l'aceitáu de la pista y otros como la cubierta (coverstock) o'l nucleu de la bola.

Les boles reactives fabríquense con una cubierta de resines reactives o de resina con carga de partícules. Estes partícules pueden ser de diamante, carbonu y distintos polímeros. Gran parte del efectu que cueyen estes boles débese a la cubierta y al pulíu que se-y da.

Los nucleos (core) de les boles reactives suelen ser asimétricos, de forma que al rodar la bola tien un radiu de xiru preferíu y tien enclín a xirar según esi radiu. Polo tanto, el tamañu, la forma y densidá del nucleu tienen gran influencia na forma que rueda la bola.

Guantes y moñequeres[editar | editar la fonte]

Los guantes de bowling suelen tar fabricaos con un refuerzu metálicu pa la muñeca, de forma que facilita l'agarre y llanzamientu de la bola. Hai de distintos estilos, dende dalgunos bien cenciellos hasta otros que dexen afaer la forma y posición de la mano.

Reglamentu[editar | editar la fonte]

Anguaño, el bolu estaunidense ta reglamentáu pola Fédération Internationale deas Quilleurs (FIQ) y tien, en caún de los continentes, delegaciones encargaes del so control. La Professional Bowlers Association (PBA) nos EE. XX. ye la división profesional pal xuegu.

Ver tamién[editar | editar la fonte]

Referencies[editar | editar la fonte]

  1. «Información del Split 7-10». lainformacion.com. Consultáu'l 1 de payares de 2013.
  2. «El Material Básico Pa Xugar a Los Bolos editorial=losrascadores.com». Consultáu'l 1 de payares de 2013.
  3. «Les nueves boles de bolos editorial=losrascadores.com». Consultáu'l 1 de payares de 2013.

Enllaces esternos[editar | editar la fonte]


Bowling