Bokken

De Uiquipedia
Saltar a: navegación, buscar
Diferentes tipos de bokken.

Un bokken (木剣: bok(u), "madera", y ken, "espada"), cuasi siempre llamáu bokuto (木刀: bokutō) en Xapón, ye una espada xaponesa de madera utilizada nel entrenamientu, de cutiu col tamañu y forma d’una katana, pero a veces cola forma d’otres espaes, como’l wakizashi y el tanto. Dellos bokken pa ornamientu tán decoraos con trabayos de madreperla o con ellaboraes talles.

Nun hai que tracamundiar el bokken col shinai, una espada fecha de bambú usada pa la práutica del kendo.

Hestoria[editar | editar la fonte]

Históricamente’l bokken ye tan antiguu como los nihonto (espaes xaponeses), y emplegóse pal entrenamientu de los guerreros. Ye un preséu d’entrenamientu en madera pa los artistes marciales interesaos en deprender l’usu d’una espada. En Xapón, la espada y l’arte d’usala entamen enantes de los tiempos de la hestoria escrita y hai al respeutive lleendes que falen del periodu míticu de los dioses.

Miyamoto Musashi, un maestru del kenjutsu, algamó nomadía por enfrentase con solamente unu o dos bokken a enemigos armaos dafechu. Una famosa lleenda cunta que derrotó a Sasaki Kojiro con un bokken que tayara d’un remu cuando viaxaba nuna barca hasta la isla alcordada pal duelu.

Tipos de bokken[editar | editar la fonte]

Los siguientes son los estilos básicos de bokken:

  1. daito o tachi: espada llarga con forma de katana
  2. shoto, kodachi o wakizashi bo: espada corta, col tamañu del wakizashi;
  3. tanto bo: col tamañu del tanto;
  4. suburito: úsense pal entrenamientu en solitario. En tamañu pueden ser como’l daito o’l shoto, pero al ser de “fueya” más gruesa son muncho más pesaos y difíciles d’usar, desenrrollen más intensamente los músculos y acaben ufriendo más arremangu que los bokken de tamañu normal. Ún de los bokken tipu suburi más célebres foi'l qu'usó Miyamoto Musashi nel so duelu contra Sasaki Kojiro.

Un bokken atamañáu pue dir en cualquier estilu d’arma que lu requiera, como por exemplu, ente les de más usu: nagamaki, nodachi, yari, naginata, kama, etc.

La Federación Xaponesa de Kendo especifica les dimensiones de los bokken que pueden usase nos kates de Kendo:[1]

  • Tachi: Llargor total, aprox. 102 cm; tsuka (mangu) aprox. 24 cm.
  • Kodachi: Llargor total, aprox. 55 cm; tsuka (mangu) aprox. 14 cm.

Amás dellos koryu (estilos tradicionales de les artes marciales xaponeses) tienen estilos particulares de bokken que pueden estremase llixeramente en llargor, forma de la punta, o en si lleven tsuba (proteición de manes) o non.

Construcción[editar | editar la fonte]

La calidá del bokken depende de dellos factores. El tipu y calidá de la madera, y la destreza del artesanu, son factores decisivos na manufactura d’un bokken de bona calidá. Cuasi tolos bokken producíos en masa tán fechos de madera poroso y de veta dondo del sureste d’Asia. Estos bokken pueden francer fácilmente cuando s’empleguen inclusive n’exercicios de contautu llixeru o mediu, y ye meyor usalos nel trabayu ensin contautu, como nos kates. Amás la madera suel ser tan poroso que si’l barniz escascaria nun bokken económicu hailos qu’usen masilla de madera pa rellenar los furacos. Pal trabayu por pareyes ye meyor siempre buscar maderes que nun produzan estielles o sedadures al francer, pa evitar mancadures.

La mayoría de los bokken tán fechos de carbayu. Xapón produz y esporta munchos fechos de carbayu roxo asiático, que tienen una veta mui bien más apertao que-yos da un fustax suave y llisu y que los fai capaces a resistir impautos repetíos, colo que son afayadices pa la construcción d’estes armes. Dellos espertos opinen que’l carbayu albar xaponés ye inclusive meyor que’l roxo, porque nun abanga tanto y nun tien munchos nuedos.

Maderes como’l carbayu albar americano, tamién conocío como kashi, resultaron ser tamién un productu de probada calidá al tener una veta entá más apertao que la de la madera de carbayu roxo. Otra eleición pue ser la madera d’una especie de nocéu americano llamáu hickory nos Estaos Xuníos, que paez presentar una bona mecedura de durez y resistencia al impautu, al tiempu que caltién un costu relativamente baxu. Otres maderes dures que s’usen pa esti fin son el nocéu, el caqui, l’ébanu, el carbayu, o’l pláganu.[2]

L’usu de maderes exótiques dures nun ye raru cuando se constrúin bokken más caros. Fáense bokken de zrezal brasileño (“jatoba”), amarantu o guayacu. Les maderes tropicales son davezu pesaes abondo, daqué deseable nun bokken a pesar de lo fácil que seden estes maderes pesaes y dures. Munches maderes exótiques son afayadices pa los suburi (práutica en solitario), pero non pa la práutica por pareyes onde tienen que chocar con otros bokken, o contra “jo” o otres armes.

En delles tiendes online úfrense bokken construyíos en materiales plásticos. Les verdaderes aplicaciones y beneficios d’estes armes varien dependiendo del usuariu, yá qu’inclusive’l fabricante d’unu d’estos modelos demostró que yera capaz a destruyir bloques de cementu y palés de carga.

Utilización[editar | editar la fonte]

Los bokken úsense como sustitutos baratos y seguros de les espaes reales en delles artes marciales como’l kendo, aikido y kenjutsu.

Nel 2003, la Federación Xaponesa de Kendo (AJKF) introduxo un conxuntu d’exercicios básicos fechos con bokuto: Bokuto Ni Yoru Kendo Kihon-waza Keiko-ho. Ye una forma de práutica pensada principalmente pa kendokes hasta 2u Dan, pero ye mui útil pa tolos estudiantes de kendo en xeneral.[3]

Referencies[editar | editar la fonte]

  1. Japanese-English Dictionary of Kendo. 1 February 2000, All Japan Kendo Federation, Tokyo, Japan.
  2. The Martial Arts: Bokken
  3. Bokuto Ni Yoru Kendo Kihon-waza Keiko-ho 1 June 2003, All Japan Kendo Federation, Tokyo, Japan.

Enllaces esternos[editar | editar la fonte]