Axenda personal

De Wikipedia
Saltar a navegación Saltar a la gueta
Axenda de sobremesa.

La axenda (del llatín axenda, coses que s'han de faer) ye un llibru o cuadiernu col so parte principal originalmente en blancu, pero que col so usu dirá rellenándose coles anotaciones que nos dexen recordar y planiar los diversos eventos previstos pa faer en tiempu de ociu o nel exerciciu profesional, y los asuntos pindios. Ye una ferramienta de trabayu imprescindible pa un "executivu", y una bona ayuda pa les persones comenenciudes na optimización del so tiempu.

Pol so tamañu, pueden ser de bolsu, de cartera, o de sobremesa. Pueden cuntar con una páxina per mes, pa recordatorios elementales, delles más pa programaciones selmanales, o con una páxina completa p'acaldía, que dexen rexistrar les diverses actividaes más refechamente.

En toa axenda la parte principal "vacida", la seición pa les anotaciones personales ordenada según el calendariu, sueli tar precedida por unes páxines p'anotar esos datos personales que siempres tienen de tar a mano sobre'l nuesu vehículu, seguros, médicos, bancos, etc., pero pueden atopase ediciones corporatives específiques con seiciones complementaries qu'inclúin particularidaes personalizaes útiles pa casi cada gremiu profesional o les xeneralistas, que típicamente tamién inclúin múltiples datos y accesorios como un santoral local, los nomes de los díes de la selmana y el mes nos idiomes más populares, el mapa con planos de carreteres del país y distancies ente les sos ciudaes, direcciones útiles y teléfonos d'establecimientos de hostelería, aeropuertus, embaxadas, instituciones diverses, conversiones de midíes, fases llunares, distintos zodiacus, listín telefónicu y de direcciones privaes -en blancu, p'anotar unu mesmu-, un marcapáginas -o una cinta- pa señalar el día actual...

El so periodu de vida útil ye d'un añu, de normal un añu natural, pero puede afaese a un específicu calendariu escolar o deportivu, por casu, y pasáu este, yá cumplió la so función y refúgase.

Hai dende les versiones más económiques hasta les ellaboraes colos materiales más nobles y consideraes como oxetos de regalu o de luxu, o casi obres d'arte.

L'axenda ye similar pol so usu al dietario y el diario, anque cada unu coles sos peculiaridaes.

La versión de los tiempos modernos ye la axenda electrónica, como parte fundamental d'una PDA, teléfonu intelixente, reló intelixente y d'otros dispositivos.



Agenda personal