Armando Felgueroso

De Wikipedia
Saltar a navegación Saltar a la gueta
Armando Felgueroso

Armando Felgueroso ye un actor de teatru y monologuista asturianu.

Inicios[editar | editar la fonte]

Inicia la so carrera artística a la temprana edá de 9 años, en 1973, embaxo les directrices y enseñances de José Luis Cueto Arias, "Pin el Cuetu", quien, amás de dirixilu, escribe-y los sos primeros monólogos.

Dos años más tarde, xúntase al cuadru escénicu del grupu folklóricu "Atapecer", creáu pola collaboración de Cueto y "La Mariñana", sitiu onde s'aposienta hasta la desapaición del mesmo nel añu 85, interpretando diálogos y obres de teatru de "Pachín de Melás" y del mesmu "Pin el Cuetu" y acompañando too ello col so llabor monologuista como "Min de les Pieces", que lu llevará a ganar premios en diferentes concursos, como'l d'Avilés, la muestra "Ciudad de Oviedo", el de la "Universidá Popular de Xixón" y el de "Mercaplana", qu'algama dos vegaes.

Tres la creación de la Sociedad Artística Popular, nel añu 1986, entra na Xunta Direutiva, pa que lu nomen bien llueu direutor artísticu y coordinador d'actividaes.

Actor de la Compañía Asturiana de Comedias[editar | editar la fonte]

Armando Felgueroso nel papel de chigreru na obra d'Alfonso Iglesias, El Pariente d'América

Acabante 1987, súmase al repartu de la Compañía Asturiana de Comedias, participando hasta anguaño nos montaxes del grupu, tanto como actor como responsable d'illuminación y, dende 2007, como axudante de direición.

Monologuista: "Min de les Pieces"[editar | editar la fonte]

Min de les Pieces

En mayu de 1991, fúndase l'AICA (Asociación d'Intérpretes de la Canción Asturiana), formando parte d'ella tamién cuasi dende la so fundación, sofitando dende dientro la dignificación del monólogu asturianu y guetando siempre pola participación en certámenes de costumbrismu, como'l Salón de Teatru Costumbrista de Candás o'l de Piedrasblancas, ente otros.

Otros trabayos[editar | editar la fonte]

Per otru llau, collabora en dos curtiumetraxes asturianos a principios de los años 90: Xicu'l toperu, de Gonzalo Tapia y Paisaxe con figura, d'Arturo Castro. Nel añu 2000, escomienza el so camín televisivu nel programa "La Gran Manzana" de Teleasturias, onde dará vida al intrépidu reporteru "James Corigos" durante tres años y mediu. Más recientemente rueda, embaxo la direición de Juan José Campanella, la serie de televisión Vientos de agua y participa nel rodaxe de la película Oviedo Express, de Gonzálo Suárez.

Premios y reconocimientos[editar | editar la fonte]

El Salón de Teatru Costumbrista de Candás-y diera'l premiu "Aurora Sánchez" al Meyor Actor del añu 2009.