Aristocracia obrera

De Wikipedia
Saltar a navegación Saltar a la gueta

El términu aristocracia obrera o aristocracia del trabayu fai referencia a dos conceutos, unu usáu na teoría leninista y otru como crítica a cierta forma de sindicalismu.

Nel marxismo-leninismu[editar | editar la fonte]

Na teoría leninista l'aristocracia obrera utilízase pa referise a los trabayadores de los países desenvueltos que se beneficien de la plusvalía estrayida de los trabayadores de los países depauperaos. Esta teoría, introducida por Karl Kautsky, señala que les empreses nel primer mundu esploten a los trabayadores de los países en desenvolvimientu (nos cuales los xornales son muncho más baxos), lo que provoca un aumentu de los beneficios. Per aciu d'estos beneficios, les empreses pueden pagar xornales más altos a los sos emplegaos del primer mundu, y esto lleva a qu'esta clase obrera tea satisfecha col so nivel de vida y refugue la revolución social.

Lenin consideraba que, por cuenta d'esta práutica, promovida pol imperialismu, la revolución obrera namás podría producise al empiezu nun país subdesendolcáu o semidesendolcáu, nel eslabón más débil. Hai que señalar que nos sos primeros escritos consideraba tamién la posibilidá de que surdiera nun país desenvueltu, como Alemaña. Darréu Stalin y Mao tamién defenderíen esta teoría.

Esta teoría de l'aristocracia obrera ye revesosa nel movimientu marxista. Esisten dellos partíos minoritarios qu'inciden en dicha teoría, xeneralmente de calter leninista o maoísta. Destacó pola so persistencia en dellos partíos políticos, por casu, el Movimientu Internacionalista Maoísta. Munchos trotskistes nel presente, a partir d'Ernest Mandel, tienden a refugar esta teoría -a pesar que Trotsky mesmu acéptola- por considerar que tien implicaciones tercermundistes.

Crítica sindical[editar | editar la fonte]

Nos Estaos Xuníos y el Reinu Xuníu, el términu aristocracia del trabayu úsase como una crítica implícita a los sindicatos qu'entamaron a trabayadores de rentes elevaes y nun tienen interés en sindicar a trabayadores de rentes medies o baxes, inclusive nos casos nos que la organización d'esos trabayadores consolidaría a los sindicatos implicaos. D'esos sindicatos coméntase que contienen reminiscencies d'aristocracia obrera. Dellos exemplos pueden ser los sindicatos de deportistes profesionales, que consiguieron alzar los xornales de cierta clase de trabayadores que yá percibíen de mano rentes altes —los deportistes profesionales— pero que refuguen entamar a otros trabayadores, incluyendo otros emplegaos nos equipos pa los que trabayen.

Crítica anarquista[editar | editar la fonte]

El términu "aristocracies obreres" o "aristocracia del trabayu" foi utilizáu por primer vegada por Mijaíl Bakunin en 1872 como una crítica a la noción de que los trabayadores entamaos son los más radicales. Bakunin escribió: Pa min la flor del proletariáu nun ye, como ye pa los marxistes, la capa superior, l'aristocracia del trabayu, toos aquéllos que tán más cultivaos, los qu'aprienden más y viven más confortablemente que tolos demás trabayadores". Consecuentemente los anarquistes cuestionaron les "vanguardies" y dirixencies de los partíos obreros, especialmente nos estaos socialistes, llamandolos peyorativamante "aristocracies obreres" y/o "burocracies coloraes".

Ver tamién[editar | editar la fonte]