Luciano Castañón

Luciano Castañón
Vida
Nacimientu	Xixón, 7 d'abril de 1926
Nacionalidá	España
Muerte	Xixón, 5 de xineru de 1987 (60 años)
Causa de la muerte	cáncanu colorrectal
Estudios
Llingües falaes	castellanu
Oficiu
Oficiu	escritor, investigador, futbolista
Trayeutoria
Posición o especialidá	centrocampista
Seudónimos	Chano

Luciano Castañón (7 d'abril de 1926, Xixón – 5 de xineru de 1987, Xixón) foi un destacáu escritor ya investigador asturianu. Foi miembru del Institutu d'Estudios Asturianos y codireutor de la Gran Enciclopedia Asturiana xunto a José Antonio Mases.

Biografía

Luciano Castañón estudió Bachiller Cimeru nel Real Institutu Xovellanos y realizó estudios de Peritaxe Mercantil y de Filosofía y Lletres, que nun concluyó. Dende 1953 hasta'l momentu de la so muerte (por causa de un cáncer de colon) trabayó como alministrativu nel Institutu Nacional de la Salú (antes Instituto Nacional de Previsión). Foi amás, na so mocedá, un destacáu futbolista. En xugando en dellos equipos del barriu de L'Arena ficha pol Real Sporting de Xixón a los 18 años. Ellí permanez mientres cinco temporaes (1944-1949). De 1949 a 1951 xuega col Real Avilés y, finalmente, ente 1951 y 1953, col Cádiz Club de Fútbol. Nesi añu vese obligáu a abandonar el fútbol por una afección renal. El so nome futbolísticu yera Chano.

Dende bien nuevu compaxinó la so afición al deporte coles moliciones lliteraries y a lo llargo de la so vida encetó casi tolos xéneros: narrativa, poesía, teatru, investigación, erudición y crítica. Foi miembru de númberu del Institutu d'Estudios Asturianos, codireutor de la Gran Enciclopedia Asturiana y coordinador de la Enciclopedia Temática Asturiana, ente otros cargos. Collaboró davezu na prensa asturiana (páxines culturales de El Comercio, Voluntá, Rexón, L'Oriente d'Asturies, Asturies Selmanal, Ensidesa...) y nacional (Cuadiernos Hispanoamericanos, El Llibru Español, Gazeta d'Arte, Cuadiernos de Bibliofilia…). En numberoses ocasiones participó como xuráu de concursos lliterarios y artísticos, coles mesmes que pronunció conferencies y charres sobre temática asturiana y cultural.

Ente los sos premios cabo señalar el Premiu de novela curtia Club Universitariu de Tortosa por Del cielu una mirada (1953), premiu de cuentos La Felguera por Trés hermanes (1958), premiu Guipúzcoa de teatru por El deteníu (1964), premiu de novela Puente Colgante de Bilbao por Los fuxíos (1972), premiu de la Cámara de Comerciu de Xixón pol Estudiu históricu sobre los periódicos y revistes d'Asturies (1973), premiu Filo Poéticu de Xixón a la so obra lliteraria (1982) y premiu de la Conseyería de Cultura destináu a la investigación del patrimoniu folklórico rexonal pol Diccionariu xeográficu popular d'Asturies (1986).

El 11 de mayu de 1990 dáse-y el so nome a una cai de Xixón, dientro d'una reforma xeneral del nomenclátor xixonés, por alcuerdu del Conceyu Plenu.

Bibliografía

Narrativa

El viento dobló la esquina (1958)
Los días como pájaros (1962)
Vivimos de noche (1964, reeditada en 2008)
Los huidos (1973)
Siete cuentos asturianos (1983)
Saldo humano (1992)

Poesía

Barrio de Cimadevilla (1967, reeditada en 2012)
De la mina y lo minero (1968)
Poemario Asturiano I (1979)

Teatru

Payasos (1959)
El detenido (1964)

Investigación

Notas sobre la pesca de la ballena en relación con Asturias (1964)
Supersticiones y creencias de Asturias (1976)
Asturias vista por los no asturianos (1977)
Refranero asturiano (1962 y 1977)
Vocabulario gijonés (1964 y 1979)
Las comunicaciones entre Asturias y León (1980)
Gijón (1980)
El Gremio de Mareantes de Gijón (1982)
Mitología asturiana (1983)
Noticias en torno a la vida airada en Asturias (1983)
Apodos y sobrenombres de Gijón (1985)
Aportación a la biografía de Rosario de Acuña (1986)
La causa de los sablazos (1986)
Vida y obra de Fabricio (1987)
Diccionario geográfico popular de Asturias (1990)
Escritos gijoneses (2001)

Estudios sobre arte

Carreño de Miranda y Manuel Medina Díaz (1970)
Ángel García Carrió (1973)
Asturias y el pintor José Ramón Zaragoza (1974)
José Ramón Zaragoza y Augusto Junquera (1976)
Lombardía (1978)
Apunte biográfico de Sebastián Miranda (1978)
Jovellanos y Goya (1981)
Piñole, pintor de Asturias (1986)

Trabayos bibliográficos

Bibliografía de novelas asturianas (1970)
Bibliografía sobre Piñole (1973)
Bibliografía de Gijón (1976)
Índices generales del Boletín del Instituto de Estudios Asturianos (1980)
Bibliografía artístico-asturiana de Jesús Villa Pastur (1982)
Bibliografía de la emigración asturiana (1984)
Aproximación a una bibliografía de Llanes (1985)
Bibliografía del carbón en Asturias (1985)

Llibros editaos na so alcordanza

Homenaje a Luciano Castañón, por la IV Bienal Nacional de Pintura La Carbonera (1987)
Efraim, pintor, libro y exposición homenaje de los pintores asturianos (1988)

Fuentes

↑ Afirmao en: Diccionario biográfico español. Identificador DBE: 72715/luciano-castanon-fernandez. Apaez como: Luciano Castañón Fernández. Editorial: Real Academia de la Historia. Llingua de la obra o nome: castellanu. Data d'espublización: 2011.

[1] Noticia del homenaxe a Luciano Castañón]
[2] 20 años ensin Luciano Castañón Fernández, por José Luis Campal ]

[2c5fd0c0b256b29730e502e7447c3f5b14c11be5-1] Afirmao en: Diccionario biográfico español. Identificador DBE: 72715/luciano-castanon-fernandez. Apaez como: Luciano Castañón Fernández. Editorial: Real Academia de la Historia. Llingua de la obra o nome: castellanu. Data d'espublización: 2011.

[1]