Tercer Coalición
Plantía:Campaña Tercer Coalición
La Tercer Coalición foi una alianza militar creada en 1805 pol Reinu Xuníu, Austria, Rusia, Nápoles y Suecia contra Francia col fin de derrocar a Napoleón del poder y eslleir la influencia militar francesa nel continente européu.[1]
Napoleón entamara la invasión de Gran Bretaña dende la rotura pol gabinete de Londres del Tratáu de Amiens (1802) en 1803, y axuntara un exércitu de 150 000 soldaos en Boulogne. Sicasí, precisaba consiguir la superioridá naval antes de poner en marcha la invasión, o siquier, distrayer a la flota británica llevándo-yos lloñe de la canal de la Mancha. El complexu plan de distracción, lleváu a cabu pol almirante Villeneuve fracasó tres la batalla del Cabu Finisterre y la posterior destrucción de la flota francu-española na batalla de Trafalgar. Entós, Napoleón viose forzáu a abandonar los sos planes contra Inglaterra y a centrar la so atención nos sos enemigos continentales.
La coalición, buscando tomar ventaya de la concentración de les fuercies franceses en Boulogne, fixo planes p'atacar Italia y Baviera. Los exércitos aliaos entamaos n'Alemaña ya Italia, al mandu de Karl Mack von Leiberich prepararon la invasión de Baviera mientres esperaben a los exércitos rusos de Mijaíl Illariónovich Kutúzov que-yos reforzaríen. L'exércitu de Baviera, aliáu de Napoleón, viose forzáu a retirase escontra'l norte, abandonando Múnich.
Napoleón dexó Boulogne n'agostu, colando con rapidez escontra'l Rin. Crució'l Rin a finales de setiembre, cayendo sobre'l lladral derechu del exércitu de Lieberich y arrodiando al exércitu austriacu en Ulm. Esbarató los intentos austriacos por reagrupase, aisllando a Ulm d'Austria y forzando a Lieberich a capitular n'ochobre. Kutúzov, na frontera austru-bávara, tuvo que retirase a Viena, y tomar el camín escontra Moravia pa consiguir refuerzos el 13 de payares. Napoleón coló entós escontra'l norte pa enfrentase a los exércitos aliaos, atopándolos finalmente en posición defensiva n'Austerlitz. Na batalla d'Austerlitz, Napoleón engañó a los austriacos con un asaltu y una retirada asonsañaes, pa depués atacar les posiciones elevaes que l'enemigu había dexáu, arrodiando y destruyéndolos a toos sacante a l'ala derecha, sol mandu de Piotr Bagratión.
L'exércitu austriacu d'Italia, sol mandu del Archiduque Carlos viose forzáu a retirase ensin lluchar poles victories franceses n'Alemaña, y los desembarcos aliaos nel norte d'Alemaña y Nápoles fueron albortaos. Austria foi esaniciada de la coalición y espulsada definitivamente d'Italia pol Tratáu de Pressburg.
Napoleón ganó a Rusia en combate, anque ésta siguió na guerra, y Prusia entró na guerra en 1806, en protesta pola violación francesa del so territoriu na campaña de 1805. Daba entós empiezo la guerra de la Cuarta Coalición.
Ver tamién[editar | editar la fonte]
- Guerres Napoleóniques
- Primer Coalición
- Segunda Coalición
- Cuarta Coalición
- Quinta Coalición
- Sesta Coalición
- Séptima Coalición
Referencies[editar | editar la fonte]
- ↑ Pereira, 2008; 652
Bibliografía[editar | editar la fonte]
- Pereira, Juan Carlos, et al (2008). Diccionariu de rellaciones internacionales y política esterior. Barcelona: Ariel. ISBN 978-84-344-1829-5. Consultáu'l 6 d'avientu de 2010.
Enllaces esternos[editar | editar la fonte]
Wikimedia Commons acueye conteníu multimedia sobre la Tercer Coalición.
