Horru
L'horru o horriu ye una construcción tradicional asturiana emplegada dende antaño pa guardar la collecha. Nun se ye a entender la casería asturiana o el paisaxe asturianu ensin l'horru, alcontrándose miles (30.000 mil [1] ) dellos esparcíos per tola xeografía asturiana.
El cuerpu principal de forma cúbica, fechu delles maderes especialmente selecionaes según les sos carauterístiques, entaramíngase enriba cuatro columnes de piedra (los pegollos) que lu aisllen del suelu, la humedanza y los roedores. Na so construcción empléguense materiales propios de cada zona.
Delles partes más importantes del horru son: Los pilpayos, los pegollos, les mueles, les colondres, los lliños y el teyáu.
Les sos colondres (muries feches de tables de madera enxeraes nunes otres) yeren antaño decoraes con motivos de dibuxos y talles xeométriques de diseñu tradicional.
Tamién hai horros en Galicia, Llión, País Vascu, Portugal, Noruega, Suecia, Suiza, Eslovenia, Francia, Inglaterra, Finlandia, Alemaña, Bélxica y otros países tanto europeos como de fuera del continente, como Turquía, Irán, Benín, Burkina Fasu, Malí, Sierra Lleona, El Níxer, Uganda, Kenia, Madagascar, China, Xapón, Filipines, Indonesia, Australia o Nueva Zelanda.
Horros asturianos[editar | editar la fonte]
Según el su estilu decorativu xebrense tres escueles: estilu Villaviciosa, estilu Carreño y estilu Allande. Anguaño guárdense algunos diseños y horrios d'altu valor etnográficu.
Estilu decorativu[editar | editar la fonte]
- Estilu Villaviciosa: la mayor concentración preséntase nos conceyos de Colunga, Cabranes y Piloña, col focu principal en Villaviciosa. Esti estilu correspuende a los horros más antiguos conservaos. A la hora de decorar los sos horros, los carpinteros taríen influenciaos polo que víen nes sos illesies, colo que parez surdir un sutil parentescu ente les decoraciones romániques y l'estilu Villaviciosa. La madera pue tar tallao o pintao, los pintaos presenten diseños xeométricos basaos en colores planos (roxu, azul o blancu). Les carauterístiques más representatives del estilu se refiérense a la decoración de los lliños.
- Estilu Carreño: constutúilu grandes paneres na zona costera del centru d'Asturies, nel que les sos fachaes tán cobiertes por una guapa talla de florones, xarres y formes xeométriques pintaes e colores vives. L'adornu procura enllenar tol espaciu disponible y amuesa cierta influyencia de les talles barroques. Ello quiciabes seya debío a que delles paneres meyor decoraes pudieron ser construyíes polos mesmos tallistes que llabraron pequeños retablos rurales.
- Estilu Allande: esti estilu afáyase nel occidente interior d'Asturies. La decoración básase en motivos independientes alcontrándose estos principalmente nos llaterales de la puerta. Los motivos representaos son los habituales nel maxín popular, con fuertes raigaños simbólicos o máxico-relixoses. Predominen les figures xeométriques tarabazaes con regla y compás: tetrasqueles, rosetes radiales o entrellazaos, toos ellos tradicionales.
Nel occidente asturiano encontrase tamién el horreo galego qu'en la occidental llamase cabazo.
En delles ocasiones tamién pue tener seis u ocho pegollos. Entós, nun se-y llama horru sinón panera.
Ver tamién[editar | editar la fonte]
Referencies[editar | editar la fonte]
Enllaces esternos[editar | editar la fonte]
Wikimedia Commons tien conteníu multimedia tocante a Horros.- Hórreos asturianos
