Zeta Leporis

De Wikipedia
Saltar a navegación Saltar a la gueta
Zeta Leporis
Zeta Leporis
Constelación Lepus
Ascensión reuta α 05h 46min 57,34s
Declinación δ -14º 49’ 19,0’’
Distancia 70,2 años lluz
Magnitú visual +3,55
Magnitú absoluta +1,89
Lluminosidá 15 soles
Temperatura 8940 K (aprox)
Masa 1,9 soles (aprox)
Radiu 1,6 soles
Tipu espectral A3Vn
Velocidá radial +20 km/s

Zeta Leporis (ζ Lep / 14 Leporis / HD 38678 / HR 1998) ye una estrella de magnitú aparente +3,55, la cuarta más brillosa de la constelación de Lepus, la llebre, superada en rellumu por Arneb (α Leporis), Nihal (β Leporis) y μ Leporis. Polo xeneral catalogada como una estrella blanca de la secuencia principal de tipu espectral A3Vn,[1][2] na base de datos SIMBAD apaez como una posible subxigante de tipu A2IV-Vn.[3]

Con una lluminosidá 15 vegaes mayor que la del Sol, envalórase que la masa de Zeta Leporis ye casi'l doble que la masa solar y el so radiu ye un 60% más grande qu'el del Sol. Piénsase que ye una estrella nueva de 230 millones d'años d'edá, lo que supón apenes un 15% de la so estancia na secuencia principal.[4] Distintos midíes de la so temperatura superficial dan valores ente 8360 y 9910 K; tan ampliu rangu puede tener el so orixe na enorme velocidá de rotación, dando llugar a que tea esnachada polos polos, que tán más calientes que la zona ecuatorial. La so velocidá de rotación proyeutada ye de 220 km/s, pero la so velocidá real puede algamar los 300 km/s, cerca de la llende cimera a partir del cual la estrella se desintegraría.[4] Ye posible que sía una binaria espectroscópica, fechu qu'entá nun foi confirmáu.[2] Alcuéntrase a unos 70,2 años lluz de distancia de la Tierra.

En 2001 anuncióse que Zeta Leporis ta envolubrada nuna nube de polvu xiratorio, que la so cantidá y temperatura indiquen que tán topetando roques sólides xenerando polvu nun cinturón d'asteroides, similar al esistente nel Sistema Solar. Piénsase que bien pueden ser restos de la formación planetaria o, otra manera, material que va dar llugar a planetes. Envalórase que la temperatura medio d'esti polvu ye de 340 K, lo que suxure que los granos de polvu pueden tar tan cerca como 2,5 UA de la estrella. La masa del cinturón d'asteroides puede ser unes 200 vegaes mayor que la del cinturón d'asteroides del Sistema Solar, y la so edá averada ye de 300 millones d'años. Alcuéntrase a una distancia de la estrella igual o inferior a 6 UA, magar cierta cantidá de polvu estiéndese hasta 9 UA.[5]

Referencies[editar | editar la fonte]