Xuvencu

Xuvencu
Vida
Nacimientu	sieglu de IV
Nacionalidá	Antigua Roma
Muerte	sieglu de IV
Estudios
Llingües falaes	llatín
Oficiu	poeta, escritor
Creencies
Relixón	Ilesia Católica

Cayu Vetiu Aquilinu Xuvencu (en llatín Gaius Vettius Aquilinus Juvencus), poeta hispanollatinu del sieglu IV d. C., fundador xunto a Seduliu de la épica cristiana.

Biografía

Vivió en tiempu del emperador Constantín el Grande y foi de noble ascendencia. De confesión católica, foi amás presbíteru y hacia l'añu 330 espublizó'l primer poema épicu llatín cristianu, Evangeliorum libri quattuor, una versificación bastante lliteral de los evanxelios, sobremanera del de San Matéu, compuesta de 3219 hexámetros y partida en cuatro llibros. Nel prólogu de la so obra afirma la so intención de cantar les fazañes salvadores de Cristu, don de Dios a los homes. Nel primer llibru narra la venida de Xuan Bautista, la nacencia de Xesús y la so actividá hasta l'empiezu de la so vida pública; nel segundu, los milagros y les paráboles; nel terceru, sigue cola narración de milagros y paráboles y nel cuartu termina cola pasión y resurrección de Cristu.

L'estilu d'esti testu debe abondo a Virxiliu y hai resabios de Lucreciu, Horaciu, Ovidiu, Lucanu y Estaciu que demuestren que Xuvencu tenía una estensa cultura poética. Sicasí, la carauterística más acusada del poema ye una cenciellez qu'oldea cola ampulosidá pagana, quiciabes pol enfotu de cinxise escrupulosamente al testu sagráu. Déxase sicasí'l poeta delicioses descripciones de la Natura; otres vegaes arriésgase a prudentes interpretaciones de calter alegóricu, y utiliza una axetivación profusa p'amplificar el testu per aciu procedimientos parafrásticos y abusa de l'alliteración. Xuvencu foi bien celebráu na Edá Media, na que mereció'l calificativu de "Virxiliu cristianu". Tres el Conceyu de Nicea yera necesariu un poeta cristianu que contrapunxera na educación cristiana al poeta llatín Virxiliu y el poeta hispanollatinu enllenó esi buecu satisfactoriamente, como demuestren los numberosos códices de la so obra que llegaron hasta nós. San Xerónimu menta otres obres sos, dalgún sobre la tema de los sacramentos, que nun llegaron hasta nós. Les noticies que tresmite son les siguientes:

Nel tiempu de Constantín, el presbíteru Xuvencu punxo en versu la hestoria del nuesu Señor y Salvador y nun la amenorgó nin siquier al versificar les maxestoses frases del evanxeliu. (San Xerónimu, Epístola a Magnum)

Xuvencu, español de noble ascendencia, presbíteru, compunxo cuatro llibros, tresponiendo los cuatro evanxelios casi a la lletra, en versos hexámetros, y dalgunes otres coses nel mesmu metro, relatives al orde de los sacramentos. Vivió en tiempos del emperador Constantín. (San Xerónimu, De viris ilustribus)

L'humanista y xesuita estremeñu Faustino Arévalo, espulsáu d'España colos demás del so orde al empezar el postreru terciu del sieglu XVIII, fixo una edición crítica del testu en Bolonia y en Roma.

Bibliografía

Edición del testu llatín *

Iohannes Huemer (1891 - reimpresión 1968). Gai Vetti Aquilini Juvenci Evangeliorum libri quattuor. New/Jork /London: Johnson Reprint Corporation.

Edición en castellanu *

Juvenco, Cayo Aquilino Vecio (1998). Historia evanxélica. Madrid: Editorial Gredos. ISBN 978-84-249-1890-3.

Bibliografía analítica *

Cornel Heinsdorff (2003). Christus, Nikodemus und die Samaritanerin bei Juvencus. Mit einem Anhang zur lateinischen Evangelienvorlage, Untersuchungen zur antiken Literatur und Geschichte 67. Berlin/New York: De Gruyter. ISBN 3-11-017851-6.

• Esperanza Borrell Vidal (1991). Les pallabres de Virxiliu en Juvenco. Barcelona: Publicacions de la Universitat de Barcelona. ISBN 84-7875-560-8.

Enllaces esternos

• Sobre Juvenco y l'exéxesis evanxélica
• Artículu sobre Juvenco de la Enciclopedia GER