Wolf 940

De Wikipedia
Saltar a navegación Saltar a la gueta
Wolf 940
Wolf 940
Constelación Acuariu
Ascensión reuta α 21h 46min 40,47s
Declinación δ -00º 10’ 25,4’’
Distancia 39,9 años lluz
Magnitú visual +12,70
Magnitú absoluta +12,21
Lluminosidá 0,0011 soles (aprox)
Masa < 0,25 soles (aprox)
Radiu < 0,5 soles (aprox)
Tipu espectral M3.5-4V
Velocidá radial -31,6 km/s

Wolf 940 (GJ 1263 / LHS 3708 / G 93-35)[1] ye una estrella na constelación d'Acuariu asitiada al sureste de Sadalmelik (α Aquarii), nordeste de Sadalsuud (β Aquarii), sur d'Enif (ε Pegasi) y norte de Deneb Algedi (δ Capricorni). De magnitú aparente +12,70, alcuéntrase a 39,9 años lluz del Sistema Solar. Dende 2009 conozse la esistencia d'una compañera subestelar, una nana marrón, n'órbita alredor d'esta estrella.[2]

Wolf 940 ye una nana colorada de tipu espectral M3.5-4V. Tomando como referencia les estimaciones de RECONS, la masa de Wolf 940 pue ser inferior a una quinta parte de la masa solar, con un diámetru probablemente daqué menor de la metá del diámetru solar.[3] Ye una estrella fría de carauterístiques asemeyaes a Ross 154, Ross 128 o G 99-49, anque s'atopa más alloñada de nós que cualesquier d'elles. La so lluminosidá puede equivalir a un 0,11% de la que tien el Sol. Al nun tar catalogada como estrella acandilante nin como variable polo xeneral, piénsase que la so edá posiblemente ye mayor de 1000 millones d'años.[3]

La estrella conocida más cercana a Wolf 940 ye otra nana colorada, LHS 516, distante 4,2 años lluz. El sistema estelar Deneb Algedi alcuéntrase a 11 años lluz de distancia de Wolf 940.[3]

Compañera subestelar[editar | editar la fonte]

Wolf 940 forma un sistema binariu con una nana marrón, denomada Wolf 940 b.[3] En 2009 llogróse una imaxe direuta d'esti oxetu,[4] siendo una de les nanes marrones más fríes detectaes, yá que la so temperatura superficial ye d'aprosimao 300 ºC. Por cuenta de la so baxa temperatura, apaez como un oxetu brillosu nel infrarroxu pero bien tenue nel espectru visible. La so masa ta entendida ente 20 y 30 vegaes la masa de Xúpiter y el so diámetru ye asemeyáu al d'esti planeta.[2] Al igual que la nana marrón Gliese 229 B, na so superficie ye abondosa'l metanu, tando clasificada como de tipu espectral T8.5. Anguaño ta dixebrada 440 UA de Wolf 940, envalorándose el so periodu orbital en 18.000 años.[3]

Referencies[editar | editar la fonte]

Coordenaes: Sky map 21h 46m 40.423s, -0° 10 23.772