Saltar al conteníu

Windows Vista

De Wikipedia
Ficha de softwareWindows Vista
Desendolcador(es) Microsoft
Versión inicial 30 xineru 2007
Última versión Service Pack 2 (6.0.6002) (versión estable, 26 mayu 2009)
Plataforma IA-32 y x86_64
Formatu de ficheru d'escritura Windows Portable Executable file format, 32-bit (en) Traducir y Windows thumbnail cache (en) Traducir
Llingua orixinal distintes llingües
Tipu sistema operativu y software privativu
Llicencia end-user license agreement (en) Traducir
Distribución DVD-ROM (en) Traducir
Parte de Windows NT
N'asturianu Non Non
Más información
Sitiu web Web oficial
Etiqueta de Stack Exchange Stack Exchange
Cambiar los datos en Wikidata

Windows Vista ye una versión importante del sistema operativu Windows NT desendolcáu por Microsoft. Foi'l socesor direutu de Windows XP, llanzáu cinco años antes, lo que supunxo entós el periodu más llargu ente versiones consecutives de Microsoft Windows. Foi llanzáu pa fabricación el 8 de payares de 2006, y nos dos meses siguientes, llanzóse per etapes a clientes empresariales, fabricantes d'equipos orixinales (OEMs) y canales de venta al por menor. El 30 de xineru de 2007, llanzóse internacionalmente y púnxose disponible pa la compra y descarga dende Windows Marketplace; ye la primer versión de Windows disponible a través d'una plataforma de distribución dixital.[1]

El desendolcu de Windows Vista entamó en 2001 col nome en clave "Longhorn"; concebíu inicialmente como un socesor menor de Windows XP, incluyó adulces numberoses carauterístiques nueves de la entós futura versión mayor de Windows col nome en clave "Blackcomb", tres lo cual reposicionóse como una versión mayor de Windows, y sufrió un periodu de desendolcu estensu ensin precedentes en Microsoft. La mayoría de les carauterístiques nueves basábense prominentemente nun nuevu sistema de presentación col nome en clave Avalon, una arquitectura de comunicación nueva llamada Indigo, y una plataforma de almacenamientu relacional llamada WinFS — tolo cual construyíu sobre .NET Framework; sicasí, esto nun resultó factible por cuenta del cálter incompletu de les teunoloxíes y la forma en que s'añadieron les carauterístiques nueves, y Microsoft reinició'l proyectu en 2004. Delles carauterístiques fueron reimplementaes tres el reiniciu, pero Microsoft dexó d'usar códigu xestionáu pa desendolcar el sistema operativu.[2]

Les carauterístiques nueves de Windows Vista inclúin una interfaz gráfica d'usuariu y un estilu visual conocíu como Windows Aero; una plataforma d'índiz de conteníu y busqueda en escritoriu llamada Windows Search; nueves teunoloxíes peer-to-peer pa facilitar el compartimientu de ficheros y conteníu multimedia ente ordenadores y dispositivos nuna rede doméstica; y ferramientes multimedia nueves como Windows DVD Maker. Windows Vista incluyó la versión 3.0 de la .NET Framework, lo que permite a los desendolcadores de software escribir aplicaciones ensin usar les Windows API tradicionales. Hai reformes arquitectóniques importantes nos subsistemes d'audiu, pantalla, rede y impresión; los procedimientos de despliegue, instalación, serviciu y arranque tamién fueron revisaos. Ye la primer versión de Windows construyida sobre la iniciativa de Trustworthy Computing de Microsoft y enfatiza la seguridá cola introducción de munches nueves carauterístiques de seguridá y protección en Windows Vista como BitLocker y Control de Cuentas d'Usuariu.

L'ambición y l'alcuerdu d'estos cambeos, y l'abundancia de carauterístiques nueves recibieron reseñes positives, pero Windows Vista foi oxetu de prensa negativa frecuente y crítica significativa. La crítica a Windows Vista centróse na incompatibilidá con controladores, periféricos y programes; la xestión de derechos dixitales; l'autorización excesiva del nuevu Control de Cuentas d'Usuariu; los requisitos del sistema escesivos en comparanza con Windows XP; el so desendolcu estensu; el tiempu d'arranque más llargu; y una llicencia de productu más restrictiva. La implantación y el grau de satisfación de Windows Vista fueron inferiores a los de Windows XP, y considérase un fracasu nel mercáu;[3][4] sicasí, el so usu superó les previsiones de Microsoft de dos años antes del llanzamientu, que esperaben algamar 200 millones d'usuarios[5] (con una estimación de 330 millones d'usuarios en 2009).[6] Llanzáronse dos service packs, en 2008 y 2009 respeutivamente. Windows Vista foi socedíu por Windows 7 en 2009, y el 22 d'ochobre de 2010, Microsoft cesó la distribución al por menor de Windows Vista; el suministru pa OEM cesó un añu más tarde.[7] El soporte estándar pa Windows Vista acabó'l 10 d'abril de 2012, y el soporte estendíu'l 11 d'abril de 2017.[8]

Requisitos de hardware

[editar | editar la fonte]

Los ordenadores capaces d'executar Windows Vista clasifíquense como Vista Capable y Vista Premium Ready.[9] Un PC Vista Capable o equivalente ye capaz d'executar toles ediciones de Windows Vista, anque dalgunes carauterístiques especiales y opciones gráfiques avanzaes pueden requerir hardware adicional o más potente. Un PC Vista Premium Ready puede aprovechar les carauterístiques avanzaes de Vista.[10]

Les interfaces Basic y Classic de Windows Vista funcionen con prácticamente cualquier hardware gráficu que soporte Windows XP o 2000; poro, la mayoría de les discusiones sobre los requisitos gráficos de Vista centráronse na interfaz Windows Aero. A partir de la Beta 2 de Windows Vista, son compatibles les series NVIDIA GeForce 6 y posteriores, ATI Radeon 9500 y posteriores, los gráficos integraos GMA 950 d'Intel y posteriores, y dellos chipsets VIA y chips discretos de S3 Graphics. Anque en principiu yeren compatibles, la serie GeForce FX 5 dexó de recibir controladores nuevos de NVIDIA. L'últimu controlador de NVIDIA que soportó la serie GeForce FX en Vista foi'l 96.85.[11][12] Microsoft ofrecía una ferramienta llamada Windows Vista Upgrade Advisor[10] pa ayudar a los usuarios de Windows XP y Vista a determinar qué versiones de Windows podía executar la so máquina. Les conexones de servidor necesaries pa esta utilidá yá nun tán disponibles. Anque los paquetes de venta al por menor inclúin un DVD de 32 bits, los clientes que necesiten un CD-ROM o que deseyen un mediu d'instalación de 64 bits pueden consiguilu a través del programa Windows Vista Alternate Media.[13] La edición Ultimate inclúi medios de 32 y 64 bits.[14] La versión descargada dixitalmente d'Ultimate inclúi solo una versión, 32 bits o 64 bits, dende Windows Marketplace.

Requisitos del sistema de Windows Vista[15][16]
Componente del PC Requisitu mínimu Recomendáu
Procesador 800 MHz 1 GHz
Memoria RAM 512 MB
(384 MB pa la edición Starter)		 1 GB
Tarxeta gráfica Super VGA Compatible con WDDM 1.0
32 bits por píxel
Soporte pa DirectX 9.0
Soporte pa Pixel Shader 2.0
Memoria gráfica — 128 MB
Capacidá total del discu duru 20 GB 40 GB
Espaciu llibre nel discu duru 15 GB 15 GB
Unidaes óptiques CD-ROM DVD-ROM
Otros — Tarxeta sintonizadora de TV (Premium, Ultimate)
Pantalla táctil (Premium, Business, Ultimate)
Memoria USB (Ultimate)
Trusted Platform Module (Ultimate)

Llímites de memoria física

[editar | editar la fonte]

La cantidá máxima de RAM que soporta Windows Vista varia según la edición y l'arquitectura del procesador, como se muestra na tabla darréu.[17][18]

EdiciónArquitectura del procesador
IA-32x86-64
Ultimate4 GB128 GB
Enterprise
Business
Home Premium16 GB
Home Basic8 GB
Starter1 GB—

Llímites de procesadores

[editar | editar la fonte]

El númberu máximu de procesadores físicos que soporta Windows Vista ye: 1 pa Starter, Home Basic y Home Premium; y 2 pa Business, Enterprise y Ultimate.[19]

El númberu máximu de procesadores lóxicos[nota 1] que soporta Windows Vista ye: 32 pa la versión de 32 bits (x86-32) y 64 pa la de 64 bits (x86-64).[19]

  1. ↑ Un procesador lóxicu ye: o bien un nucleu d'un procesador físicu ensin SMT, o bien unu de los dos fíos que manexa un nucleu con SMT.

Referencies

[editar | editar la fonte]
  1. ↑ «Microsoft Unveils New Ways for Consumers to Get Windows Vista». News Center. Microsoft (17 de xineru de 2007). Archiváu dende l'orixinal, el 3 de xineru de 2017. Consultáu'l 9 de setiembre de 2022.
  2. ↑ Gunnerson, Eric (9 de xineru de 2006). «Windows DVD Maker FAQ». Archiváu dende l'orixinal, el 25 de mayu de 2007. Consultáu'l 25 d'avientu de 2022. «
    I would have loved to use managed code for the UI part, which is what I own. I won't go into the details, but suffice it to say that it wasn't the team's decision.
    Hubiérame prestáu usar códigu xestionáu pa la parte de la interfaz, que ye lo que yo llevo. Nun voi entrar en detalles, pero basta con dicir que nun foi decisión del equipu.
    »
  3. ↑ Hiner, Jason (5 d'ochobre de 2008). «The top five reasons why Windows Vista failed». ZDNet. Red Ventures. Archiváu dende l'orixinal, el 23 de febreru de 2024. Consultáu'l 25 d'agostu de 2023.
  4. ↑ Krishnaraj, Nithil (22 de xunu de 2020). «Windows Vista: Why did it fail?». Medium. Archiváu dende l'orixinal, el 7 de xineru de 2024. Consultáu'l 16 de xunu de 2023.
  5. ↑ Broersma, Matthew (19 de setiembre de 2006). «Microsoft rallies developers behind Vista». ZDNet. Red Ventures. Archiváu dende l'orixinal, el 1 de xunetu de 2022. Consultáu'l 9 de setiembre de 2022.
  6. ↑ «Windows 7: 350 million licenses sold in 18 months». Ars Technica. Condé Nast (22 d'abril de 2011). Archiváu dende l'orixinal, el 13 de marzu de 2023. Consultáu'l 25 d'agostu de 2023.
  7. ↑ Oiaga, Marius (3 d'avientu de 2010). «Slow Death for Windows Vista - Packaged Software End of Sales Reached in October». Softpedia. SoftNews NET SRL. Archiváu dende l'orixinal, el 6 d'avientu de 2010. Consultáu'l 7 de setiembre de 2022.
  8. ↑ «Microsoft Lifecycle — Windows Vista». Microsoft. Archiváu dende l'orixinal, el September 2, 2022. Consultáu'l September 7, 2022.
  9. ↑ «Microsoft and PC Manufacturers Make It Easier for Customers to Get Ready for Windows Vista». PressPass. Microsoft (18 de mayu de 2006). Archiváu dende l'orixinal, el 15 de xunu de 2006. Consultáu'l 18 de mayu de 2006.
  10. 1 2 «Windows Vista Upgrade Advisor». Archiváu dende l'orixinal, el 1 de xunetu de 2006. Consultáu'l 25 de xunu de 2006.
  11. ↑ «ForceWare Release 95». Archiváu dende l'orixinal, el 22 d'ochobre de 2007. Consultáu'l 2 d'ochobre de 2008.
  12. ↑ «MsBetas' List of Vista Ready GPUs». Archiváu dende l'orixinal, el 13 de marzu de 2007. Consultáu'l 30 de xunetu de 2007.
  13. ↑ «Windows Vista Alternate Media». Archiváu dende l'orixinal, el 6 d'ochobre de 2007. Consultáu'l 20 d'agostu de 2007.
  14. ↑ Windows Vista 64-bit Editions Archiváu 2008-07-24 en Wayback Machine. Microsoft.com. Retrieved on 14 d'ochobre de 2011.
  15. ↑ «Windows Vista: Recommended System Requirements». Microsoft. Archiváu dende l'orixinal, el 1 de xineru de 2008. Consultáu'l 13 de marzu de 2008.
  16. ↑ «Vista Starter - The Easy Button For Vista». Network World (International Data Group). 31 de xineru de 2008. https://www.networkworld.com/article/2350639/vista-starter---the-easy-button-for-vista.html. Consultáu'l 3 de xunu de 2019.
  17. ↑ «Windows Vista Product Guide». Microsoft (2006). Archiváu dende l'orixinal, el September 30, 2011. Consultáu'l February 21, 2021.
  18. ↑ «Windows Vista Product Guide — Revisions». Microsoft. Archiváu dende l'orixinal, el January 31, 2009. Consultáu'l October 25, 2019.
  19. 1 2 Microsoft. «How to add processors to a computer that is running Windows Server 2003, Windows Server 2008, Windows Server 2008 R2, Windows Server 2008, Windows Server 2008 R2, Windows Vista, Windows 7 o Windows XP Professional x64 Edition». Support. Archiváu dende l'orixinal, el 4 de xineru de 2015. Consultáu'l 26 de mayu de 2015.

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Windows_Vista&oldid=4437078»