Wikipedia:Publicidá

De Wikipedia
Saltar a navegación Saltar a la gueta
Logotipu de la Wikipedia.

Wikipedia, la Wikipedia n'asturianu, ye una enciclopedia llibre que cunta con más de 300 wikipedistes qu'escribieren, iguaren y desendolcaren más de 10.000 artículos que tien. D'ellos, una ventena collaboren d'un mou regular nel desenvolvimientu de la Wikipedia y la so cadarma temática. La cifra de wikipedistes foi medrando enforma dende que'l 2 d'agostu de 2004 entamara la Wikipedia, col so primer artículu sobro'l Zazaki (llingua de la etnia Zaza, de Turquía). Dende entós, desendolcóse un trabayu valoratible, pero qu'entá nun dexó de ser un proyeutu. El volume d'artículos y la calidá de bien d'ellos nun permiten inda considerar la Wikipedia n'asturianu como ferramienta de consulta básica, pero sí como un proyeutu que yá entamó a cuayar y que tien de medrar cola incorporación de nuevos wikipedistes. Cualquiera pue colaborar con Wikipedia: creando nuevos artículos naquellos temes del so interés, iguando los que yá esisten, o trabayando na xera d'estructurar los conteníos de la enciclopedia llibre. La Wikipedia forma parte d'un enfotu mundial por desenvolver una enciclopedia d'usu xeneral, de distribución llibre y de calidá, al traviés d'una rede de llibre participación de voluntarios per tol mundu. Les condiciones d'usu del conteníu de la Wikipedia tán baxo los términos de llicencia GFDL. Eso significa que cualquiera ye llibre d'utilizar los artículos, copialos, igualos y distribuyilos, cumpliendo namás que dos requisitos: mentar l'orixe de la información, y que les condiciones d'usu del nuevu trabayu seyan de la mesma llicencia GFDL, o compatible. El proyeutu Wikipedia ye dafechu internacional y multillingüe: hai más de 200 ediciones en llingües estremaes, que funcionen de manera autónoma y que, globalmente, contienen cerca de 10 millones d'artículos.